នៅថ្ងៃទី១១ ខែកញ្ញា ឆ្នាំ២០២២នេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលេខាធិការ ក្រសួងការពារជាតិ តំណាងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានចុះជួបសួរសុខទុក្ខនាយទាហាន នាយទាហានរង និង ពលទាហាន សរុបចំនួន២៩០ គ្រួសារ ក្នុងឱកាសពិធីដាក់បិណ្ឌទី១ នៃបុណ្យភ្ជុំបិណ្ឌប្រពៃណីខ្មែរ នៅមជ្ឈមណ្ឌលអភិវឌ្ឍន៍យោធិនពិការ សម្ដេចតេជោ ហ៊ុន សែន គូលែន៣១៧ ខេត្តសៀមរាប។
ថ្លែងក្នុងឱកាសនោះ ឯកឧត្តមឧត្តសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧សៀមរាប លើកឡើងថា ក្រោមការយកចិត្តទុកដាក់ខ្ពស់ពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ព្រមទាំងសម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្ត្រីក្រសួងការពារជាតិ និង លោកជំទាវ លោកតែងតែបានគិតគូរពីសុខទុក្ខ និង ជីវភាពរស់នៅរបស់កងកម្លាំងនៃកងយោធពល ខេមរភូមិន្ទគ្រប់លំដាប់ថ្នាក់ រួមទាំងមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ផងដែរ។
ជាមួយនិងការជួបសំណេះសំណាលសួរសុខទុក្ខនេះ ឯកឧត្តមនាយឧត្តមសេនីយ៍ ឃឹម ប៊ុនសុង បានកោតសរសើរពីគំរូវីរភាព របស់បងប្អូនយោធិនពិការទាំងអស់ រួមនិងគ្រួសារ ដែលបានលះបង់ខ្លួន ដើម្បីបុព្វហេតុការពារជាតិមាតុភូមិ។ ដោយមាននយោបាយ ឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្រ្តី បានបង្រួបបង្រួមជាតិ សាមគ្គីភាព ឯកភាពផ្ទៃក្នុង និងបានបញ្ចប់សង្គ្រាមនៅកម្ពុជាទាំងស្រុងក្នុងឆ្នាំ១៩៩៨ ដែលនាំឱ្យជីវភាពរស់នៅរបស់ប្រជាពលរដ្ឋកាន់តែប្រសើរឡើង និង ប្រទេសជាតិមានការអភិវឌ្ឍរីកចម្រើនលើគ្រប់វិស័យ។
ឯកឧត្តមនាយឧត្តមសេនីយ៍ ក៏បានផ្តាំផ្ញើដល់បងប្អូនយោធិនពិការទាំងអស់ ត្រូវខិតខំថែរក្សាសុខភាព និងបន្តការពារខ្លួនពីជំងឺកូវិដ-១៩ ៣កុំ ៣ការពារ ឱ្យបានខ្ជាប់ខ្ជួន និងជំរុញសមាជិកគ្រួសារទៅចាក់វ៉ាក់សាំង ដូសជំរុញទី៤,ទី៥ ឲ្យបានគ្រប់ៗគ្នា។
ក្នុងនោះឯកឧត្តមនាយឧត្តមសេនីយ៍ ឃឹម ប៊ុនសុង បាននាំយកអំណោយសម្តេចពិជ័យសេនា ទៀ បាញ់ រួមមានថវិកា ចំនួន៣លានរៀល ប្រគល់ជូនមជ្ឈមណ្ឌលអភិវឌ្ឍយោធិនពិការ សម្ដេចតេជោ ហ៊ុន សែន គូលែន៣១៧ សៀមរាប និង គ្រួសារយោធិនពិការទាំង២៩០គ្រួសារ ក្នុងមួយគ្រួសារទទួល បាន ត្រីខ មី ស្ករស ទឹកដោះគោ និង ថវិកា៣ម៉ីនរៀល៕
អត្ថបទ និងរូបភាព៖ លោក ម៉ី សុខារិទ្ធ
កែសម្រួល៖ លោក សេង ផល្លី
