ឯកឧត្តម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម មានប្រសាសន៍ក្នុងឱកាសផ្តល់កិច្ចសម្ភាសន៍ដល់អ្នកសារព័ត៌មាន នាល្ងាចថ្ងៃទី១១ ខែកញ្ញា ឆ្នាំ២០២២នេះ នាសណ្ឋាគាសុខាខេត្តសៀមរាបថា កិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥៤ និងកិច្ចប្រជុំពាក់ព័ន្ធ ព្រះរាជាណាចក្រកម្ពុជា ទទួលរៀបចំធ្វើជាម្ចាស់ផ្ទះ ក្នុងនោះក្រសួងពាណិជ្ជកម្ម ជាសេនាធិការដើរតួនាទីផ្ទាល់ ក្នុងការរៀបចំកិច្ចប្រជុំនេះ។
ឯកឧត្តមបន្តថា កិច្ចប្រជុំនេះ ត្រូវបានចាប់ផ្តើមទ្បើងពីថ្ងៃទី១១ ដល់ថ្ងៃទី១៨ ខែកញ្ញា ឆ្នាំ២០២២នេះ ដោយមានថ្នាក់រដ្ឋមន្ត្រីជាច្រើនប្រទេស ដែលបានអញ្ជើញចូលរួមក្នុងកិច្ចប្រជុំនេះ ក្នុងនោះ ក្រៅពីរដ្ឋមន្ត្រីអាស៊ានទាំង១០ ក៏នៅមានរដ្ឋមន្ត្រីប្រទេសដៃគូរមួយចំនួនទៀតអញ្ជើញចូលរួមផងដែរ។ ក្នុងនោះកិច្ចប្រជុំរដ្ឋមន្ត្រីសេដ្ឋកិច្ចអាស៊ានលើកទី៥៤ នឹងប្រព្រឹត្តទៅនៅថ្ងៃទី១៤ ទី១៥ និងទី១៦ ខែកញ្ញា ឆ្នាំ២០២២ ដែលក្នុងអំឡុងពេលនោះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នឹងផ្តល់កិត្តិយសដ៏ខ្ពង់ខ្ពស់អញ្ជើញជាអធិបតី ក្នុងពិធីបើកនៃកិច្ចប្រជុំនៅថ្ងៃទី១៤ ខែកញ្ញា ឆ្នាំ២០២២។ ដោយឡែក មុននឹងមានកិច្ចប្រជុំថ្នាក់រដ្ឋមន្ត្រីចូលមកដល់ សម្រាប់ទី១១ និងទី១២ ខែកញ្ញា ក៏មានកិច្ចប្រជុំត្រៀមដែលហៅថា កិច្ចប្រជុំឧត្តមមន្ត្រីសេដ្ឋកិច្ចអាស៊ាន ដែលនឹងប្រជុំពិនិត្យ ពិភាក្សាទៅលើឯកសារផ្សេងៗ និងឯកសារសំខាន់មួយចំនួន សម្រាប់ប្រមូលធាតុចូល និងរៀបចំរបៀបវារ:សម្រាប់កិច្ចប្រជុំថ្នាក់រដ្ឋមន្ត្រី។
សូមជម្រាបផងដែរថា កិច្ចប្រជុំរដ្ឋមន្ត្រីសេដ្ឋកិច្ចអាស៊ាន លើកទី៥៤ និងកិច្ចប្រជុំពាក់ព័ន្ធ នឹងប្រព្រឹត្តទៅនៅក្នុងខេត្តសៀមរាប ចាប់ពីថ្ងៃទី១១ ដល់១៨ខែកញ្ញា ឆ្នាំ២០២២។ ក្រៅពីប្រទេសអាស៊ានទាំង១០ កម្ពុជាបានអញ្ជើញប្រទេស និងអង្គការជាដៃគូមួយចំនួនទៀតរូមមាន៖ ប្រទេសនចិន ជប៉ុន សាធារណ:រដ្ឋកូរ៉េ (ROK កូរ៉េខាងត្បូង) អូស្ត្រាលី ញូហ្សីឡែន (New Zealand ) ហុងកុង ឥណ្ឌា សហភាពអឺរ៉ុប ( EU ) សហរដ្ឋអាមេរិក (USA) កាណាដា រុស្សី ចក្រភពអង់គ្លេស(UK) និងអង្គការកម្មសិទ្ធិបញ្ញាពិភពលោក ហៅកាត់ថា WIPO (World Intellectual Property Organisation) ផងដែរ។នេះជាលើកទី៣ ដែលកម្ពុជាទទួលរៀបចំធ្វើជាម្ចាស់ផ្ទះ នៃកិច្ចប្រជុំ ខណ:ដែលព្រះរាជាណាចក្រកម្ពុជាជាប្រធានប្តូរវេនអាស៊ាន កាលពីឆ្នាំ២០០២ ឆ្នាំ២០១២ និងឆ្នាំ២០២២នេះ៕
អត្ថបទ និងរូបភាព: លោកយូ វង្ស និងលោកបូ សាវី កែសម្រួលដោយ លីវ សុខុន!!!
