រយៈពេល២ថ្ងៃ ចាប់ពីថ្ងៃទី៧ ដល់ថ្ងៃទី៨ ខែកញ្ញា ឆ្នាំ២០២២នេះ គណៈកម្មាធិការជាតិវាយតម្លៃទីក្រុងស្អាត នៃក្រសួងទេសចរណ៍ វាយតម្លៃថា សហគមន៍ទេសចរណ៍ចំនួន២ ក្នុងចំណោម៣ នៅលើបឹងទន្លេសាប ស្ថិតក្នុងភូមិសាស្ត្រខេត្ដសៀមរាប បានរៀបចំបរិស្ថានល្អប្រសើរទៅតាមគោលការណ៍ដែលបានកំណត់។
ក្នុងការវាយតម្លៃនោះ លោក ចែម រ៉ាណែល អនុប្រធាននាយកដ្ឋានសេវាគាំពារទីក្រុងស្អាត និងជំរុញការប្រឡងប្រណាំង បានបង្ហាញថា តាមរយៈការចុះពិនិត្យនៅតាមសហគមន៍ទាំង៣ ក្នុងនោះសហគមន៍ចុងឃ្លៀស និង សហគមន៍កំពង់ភ្លុក រៀបចំការវេចខ្ចប់ និងទុកដាក់សំរាមក្នុងធុងបានល្អ។ ដោយឡែក សហគមន៍កំពង់ឃ្លាំង នៅមានការខ្វះចន្លោះមួយចំនួន ពុំទាន់អនុវត្តន៍បានតាមផែនការ Clean and Greenនៅឡើយ។
លោក ចែម រ៉ាណែល ក៏បានបញ្ជាក់ជូនអាជ្ញាធរមូលដ្ឋាន នៃសហគមន៍ទាំង៣ថា តំបន់សហគមន៍កំពង់ភ្លុក សហគមន៍ចុងឃ្លៀស និងសហគមន៍កំពង់ឃ្លាំង គឺជាតំបន់ត្រូវបានដាក់បញ្ចូលទៅក្នុងដំណើការរៀបចំផែនការ Clean and Green ដើម្បីធ្វើឱ្យតំបន់ទាំង៣នេះ អាចមានលទ្ធភាពចូលរួមក្នុងចលនាប្រឡងប្រណាំងទីក្រុងស្អាត សកម្មភាពនេះដែរក៏នឹងចូលរួមលើកស្ទួយមុខមាត់តំបន់ ដែលជាប៉ូលទេសចរណ៍ដ៏សំខាន់បំផុតមួយរបស់កម្ពុជា។
ព័ត៌មានជាតិ ថ្មីៗ
តាមរយៈការវាយតម្លៃនេះដែរ គណៈកម្មាធិការជាតិវាយតម្លៃទីក្រុងស្អាត រួមនិងអាជ្ញាធរខេត្តសៀមរាប បានណែនាំដល់អាជ្ញាធរមូលដ្ឋាននៅតាមក្រុង ស្រុក ឃុំ សង្កាត់ ត្រូវបង្កើតគណកម្មការចាត់តាំងយុវជនបង្គោលដើម្បីឲ្យពួកគាត់ជួយកិច្ចការនេះ យុវជនបង្គោលដែលយើងត្រូវបង្កើតនោះ ក្នុងមួយភូមិៗ យ៉ាងហោចណាស់ក៏ចាប់ពី ១០នាក់ឡើងទៅបើអាច។ តាមរយៈក្រុមយុវជនស្ម័គ្រចិត្តនេះ យើងត្រូវពន្យល់ពួកគាត់ឲ្យបានច្បាស់ជាមុនសិន ទើបឲ្យពួកគាត់ចុះទៅអប់រំតាមសហគមន៍នានាឱ្យចេះវេចខ្ចប់ និងញែកសំរាមឱ្យបានត្រឹមត្រូវ ហើយឈានដល់ការបង្កើតជង្រុកប្លាស្ទិកជាផ្លូវការនៅសហគមន៍ផងដែរ។ បន្ថែមពីនោះ សហគមន៍ទាំងបី ត្រូវដាក់ធុងសំរាមយ៉ាងតិច ១០ នៅតាមបណ្ដាភូមិនីមួយៗ ទៅតាមទីតាំងដែលអាជ្ញាធរបានកំណត់ ក្នុងឃុំរបស់ខ្លួន។ ជាមួយនោះ អាជ្ញាធរ និងមន្ទីរ អង្គភាពពាក់ព័ន្ធ ត្រូវចូលរួមផ្សព្វផ្សាយដល់ប្រជាពលរដ្ឋ យកសំរាមទៅដាក់ក្នុងសំរាមឱ្យបានត្រឹមត្រូវ និងញែកសំណល់កាកសំណល់ចេញពីគ្នា ជាពិសេសសំណល់ប្លាស្ទិច។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក សេង ផល្លី
