នៅមណ្ឌលរដ្ឋបាលមន្ទីរខេត្តសៀមរាប ព្រឹកថ្ងៃទី១៥ ខែកញ្ញា ឆ្នាំ២០២២នេះ សមាជិកគ្រួសារសពអតីតយុទ្ធជនរស់នៅក្នុងខេត្តសៀមរាបចំនួន ៤៣គ្រួសារ បានទទួលប្រាក់គោលនយោបាយ ពីរាជរដ្ឋាភិបាលកម្ពុជា តាមរយៈក្រសួងសង្គមកិច្ច អតីតយុទ្ធជន ដែលក្នុងនោះរួមមានប្រាក់បូជាសព និងឧបត្ថម្ភជូនជនពិការ ចំនួន ១៧គ្រួសារ និងប្រាក់ធានារាប់រងសង្គមជូននិវត្តជន និងជនបាត់បង់សមត្ថភាពការងារ ចំនួន ២៦គ្រួសារ។
ឯកឧត្តម ឈួរ សុបញ្ញា ប្រតិភូរាជរដ្ឋាភិបាលកម្ពុជា ទទួលបន្ទុកអគ្គនាយកមូលនិធិជាតិជំនួយសង្គម និងជានាយបេឡាជាតិអតីតយុទ្ធជន បានលើកឡើងថា អតីតយុទ្ធជន ដែលមានគុណបំណាច់ ចំពោះជាតិមាតុភូមិ ពួកគាត់គឺជានិមិត្តរូបនៃស្មារតីលះបង់ ពលិកម្ម ដើម្បីជាតិ និងត្រូវបានចារឹកទុកនូវគំរូវីរភាព ដ៏ឧត្តុង្គឧត្តមនេះ។ ជាមួយនិងទឹកចិត្តស្នេហាជាតិរបស់វីរយុទ្ធជន សកម្មភាពឆ្លើយតបទៅលើវិស័យអតីតយុទ្ធជន មិនមែនជាកាតព្វកិច្ចផ្តាច់មុខ របស់រាជារដ្ឋាភិបាល ឬជនណាមួយនោះទេ តែគឺជាការរួមចំណែករបស់មហាជនខ្មែរទូទៅ។ ជាក់ស្ដែងការយកចិត្តទុកដាក់របស់រាជរដ្ឋាភិបាល គឺធ្វើយ៉ាងណានាំយកនូវថវិកា គោលនយោបាយរបស់រាជរដ្ឋាភិបាល ប្រគល់ជូនដល់ដៃគ្រួសារសពអតីតយុទ្ធជន និងអតីតជនយុទ្ធ។
តាមការបញ្ជាក់របស់ ឯកឧត្តម ឈួរ សុបញ្ញា បង្ហាញថា បច្ចុប្បន្ននេះ មានអតីតយុទ្ធជនចំនួន ១០៣,៧៩៧នាក់ ព្រមទាំងអ្នកនៅក្នុងបន្ទុកចំនួន ១៥០,៥៣៩នាក់ កំពុងទទួលបានប្រាក់របបសន្តិសុខសង្គមប្រចាំខែពីរដ្ឋ។ បន្ថែមពីនោះ គិតចាប់ពីខែមេសា ឆ្នាំ២០២០មក រាជរដ្ឋាភិបាលបានតម្លើងប្រាក់របបសន្តិសុខសង្គម ប្រចាំខែជូននិវត្តជន ជនបាត់បង់សមត្ថភាពការងារ និងជនពិការ ចាប់ពី ៥៦ម៉ឺនរៀល ដល់ ៦៤ម៉ឺនរៀល។ ឯកឧត្តមបន្ថែមថា សម្រាប់ឆ្នាំ២០២២នេះ រាជរដ្ឋាភិបាលកម្ពុជាបានរៀបចំតម្លើងប្រាក់សោធននិវត្តន៍ ដល់អតីតយុទ្ធជន និងនិវត្តជន និងត្រូវបន្ថែមពី ៦៤ម៉ឺនរៀល ដល់ ៦៩ម៉ឺនរៀលក្នុងមួយខែ។ ក្នុងនោះអតីតយុទ្ធជន និងគ្រួសារអតីតយុទ្ធជន ត្រូវបានធ្វើបច្ចុប្បន្នភាព និងគ្រប់គ្រងតាមប្រព័ន្ធទិន្នន័យព័ត៌មានវិទ្យា ដើម្បីធានាបាននូវប្រសិទ្ធភាព និងសុវត្ថិភាពក្នុងការបើករបបសន្តិសសុខសង្គមប្រចាំខែ ដែលកំពុងអនុវត្តជាមួយធនាគារដៃគូនៅទូទាំង ២៥រាជធានី-ខេត្ត និងបើកប្រាក់របបសន្តិសុខសង្គម រៀងរាល់ពីរសប្តាហ៍ម្តង ក្នុងខែនីមួយៗ ដោយត្រូវបានដាក់ឲ្យអនុវត្តន៍ចាប់ពីខែមករាឆ្នាំ២០១៩មកម្ល៉េះ។ ជាមួយគ្នានោះរាជរដ្ឋាភិបាល ក៏បានផ្តល់បណ្ណថែទាំសុខភាព (ប.ស.ស) ជូនជនពិការ និវត្តជន និងជនបាត់បង់ សមត្ថភាពការងារ និងផ្ដល់ជូនបណ្ណមូលនិធិសមធម៌សុខាភិបាល ជូនអ្នកកាន់សៀវភៅ របស់គ្រួសារជនពលី និងគ្រួសារជនមរណៈ ជាអតីតយុទ្ធជន ដើម្បីទៅពិនិត្យ និងព្យាបាលជំងឺ នៅតាមមន្ទីរពេទ្យ ដែលបានចុះកិច្ចសន្យា ជាមួយ ប.ស.ស ដោយមិនបង់ប្រាក់។
ឯកឧត្តមប្រតិភូរាជរដ្ឋាភិបាល ក៏បានបញ្ជាក់បន្ថែមផងដែរថា ចំពោះការគាំទ្រផ្នែកសង្គមពីរាជរដ្ឋាភិបាល តាមរយៈការផ្តល់ប្រាក់ឧបត្ថម្ថ ការតម្លើងប្រាក់បៀវត្ស ដល់មន្ត្រីរាជការចូលនិវត្តន៍ ព្រមទាំងការមើលថែពីសំណាក់ក្រុមគ្រួសារ គឺពិតជាមានសារៈសំខាន់ណាស់ សម្រាប់មនុស្សចាស់គ្រប់រូប ដែលធ្វើឲ្យពួកគាត់មានភាពកក់ក្តៅ មិនឯកា មានអារម្មណ៍សប្បាយចិត្ត និងរស់នៅបានអាយុវែង។ មិនត្រឹមតែប៉ុណ្ណោះទេ ការគិតគូរដល់មន្ត្រីចូលនិវត្តន៍នេះ មិនត្រឹមតែជាការផ្តល់កម្លាំងចិត្តដល់ពួកគាត់ ដែលមានវ័យចាស់ជរានោះទេ តែក៏បានផ្តល់កម្លាំងចិត្តដល់មន្ត្រីរាជការជំនាន់ក្រោយ ដែលនឹងចូលនិវត្តន៍នាពេលអនាគត រឹតតែខិតធ្វើការបម្រើជាតិមាតុភូមិ អស់ពីកម្លាំងកាយចិត្ត ដោយមិនព្រួយបារម្ភពីបញ្ហាជីវភាព ពេលចូលនិវត្តន៍នោះឡើយ៕
អត្ថបទ និង រូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
អត្ថបទ និង រូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
