ដើម្បីបំរើដល់សាធារៈជនក្នុងការប្រើប្រាស់រថយន្ដអគ្គិសនី និងដើម្បីលើកកំពស់បរិស្ថាន ថ្ងៃទី១៤ ខែកញ្ញា ឆ្នាំ២០២២នេះ ក្រសួងសាធារណៈការ និងដឹកជញ្ជូន បានដាក់ឱ្យដំណើរការស្ថានីយបញ្ចូលថាមពលអគ្គិសនីមួយទៀត នៅក្នុងខេត្ដសៀមរាប បន្តាប់ពីរាជធានីភ្នំពេញ និងក្រុងព្រះសហនុ ដែលស្ថានីយបញ្ចូលនេះ ស្ថិតនៅសួនច្បារព្រះរាជដំណាក់ ក្រុងសៀមរាប។
ឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណៈការ និងដឹកជញ្ជូន មានប្រសាសន៍ថា ការដំឡើងស្ថានីយបញ្ចូលថាមពលអគ្គិសនី នៅក្នុងខេត្ដទេសចរណ៍មួយនេះ បន្ទាប់ពីបានតំឡើងនៅក្រសួងសាធារណៈការ និងដឹកជញ្ជូន ក្នុងរាជធានីភ្នំពេញ ដាក់ក្នុងខេត្ដព្រះសីហនុ ហើយនឹងនៅក្នុងខេត្ដបាត់ដំបង។ ស្ថានីយបញ្ចូលអគ្គិសនីរថយន្ដចំនួន ៤កន្លែងនេះ ជាជំហ៊ានទី១ ដែលក្រសួងបានជំនួយពីអង្គការ UNDP មានចំនួន ៤គ្រឿង។ ឯកឧត្ដមបញ្ជាក់ថា តម្លៃការបញ្ចូលអគ្គីសនីយជាង ១ពាន់រៀល ហើយអាចប្រើបានប្រវែងចំងាយពី ៣០០គីឡូម៉ែត្រឡើងទៅ តាមប្រភេទរថយន្ដអគ្គិសនី។
ព័ត៌មានជាតិ ថ្មីៗ
ឯកឧត្ដម ស៊ុន ចាន់ថុល បានបញ្ជាក់ថា ក្រសួងគ្រោងបន្ដដាក់ស្ថានីយបញ្ចូលអាគុយរថយន្ដនេះ នៅតាមបណ្ដាខេត្ដផ្សេងៗទៀត ដោយក្រសួងសាធារណៈការ ស្នើរឱ្យស្ថានីយប្រេងឯកជន ដាក់ស្ថានីយបញ្ចូលថាមពលអគ្គិសនីនេះ ឱ្យបានច្រើននៅតាមស្ថានីយប្រេងឥន្ទនៈនៅទូទាំងប្រទេស ដើម្បីឱ្យប្រជាពលរដ្ឋ ដែលមានរថយន្ដប្រើប្រាស់អគ្គិសនីនេះ មានភាពងាយស្រួល ក្នុងការធ្វើដំណើរផ្លូវឆ្ងាយ ហើយស្ថានីយមួយចំនួនបានរៀបចំរួចរាល់ហើយដែរ។ ឯកឧត្ដមថា ការស្នើរសុំឱ្យមានស្ថានីយបញ្ចូលអគ្គិសនីរថយន្ដនៅតាមស្ថានីយប្រេងឥន្ទនៈ ដោយសារវិស័យឯកជនជាដៃគូរយ៉ាងសំខាន់ និងជាក្បាលរទេះភ្លើង ដើម្បីអូសទាញសេដ្ឋកិច្ចឱ្យមានការរីកចំរើន ។
ឯកឧត្ដម ទេសរដ្ឋមន្ដ្រី បានបញ្ជាក់បន្ថែមថា មកដល់បច្ចុប្បន្ននេះ កម្ពុជាមានរថយន្ដប្រភេទប្រើដោយអាគុយនេះ ចំនួនជិត ១ពាន់គ្រឿង និងមានក្រុមហ៊ុនជាច្រើន ដាក់លក់នៅក្នុងប្រទេសកម្ពុជា។ ក្រុមហ៊ុនទាំងមកពីក្រៅប្រទេស រួមមានប្រទេសចិន អង់គ្លេស មកពីអឺរ៉ុប សហរដ្ឋអាមេរិកជាដើម។ ឯកឧត្ដមបានអំពាវនាវ ឱ្យប្រជាពលរដ្ឋ ប្រើប្រាស់រថយន្ដប្រភេទអគ្គិសនីនេះ ដើម្បីជួយកាត់បន្ថយការចំណាយថវិកាលើប្រេងឥន្ទនៈ និងជួយលើកកំពស់បរិស្ថានល្អ កាត់បន្ថយការប្រែប្រួលអាកាសធាតុ៕
អត្ថបទ និងរូបភាព៖ លោក បូ សាវី លោក យូ វង្ស
កែសម្រួល៖ លោក អ៊ុន ណារាជ្យ
