នៅរសៀលថ្ងៃទី១៦ ខែកញ្ញា ឆ្នាំ២០២២ នាសណ្ឋាគារសូហ្វីតែល ខេត្តសៀមរាប ក្រសួងពាណិជ្ជកម្មនៃប្រទេសកម្ពុជា និងក្រសួងពាណិជ្ជកម្មនៃប្រទេសអូស្ត្រាលី បានបើកដំណើរការកម្មវិធី នៃគម្រោងភាពជាដៃគូ នៃកិច្ចការពារអ្នកប្រើប្រាស់ កម្ពុជា-អូស្ត្រាលី ជាផ្លូវការ ក្នុងទំហំទឹកប្រាក់១.៣៥លានដុល្លារអូស្ត្រាលី សម្រាប់រយៈពេល៣ឆ្នាំ ដែដឹកនាំដោយឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម នៃប្រទេសកម្ពុជា និងឯកឧត្តម ព្រឹទ្ឋសមាជិក ធីម អៀរីស(Tim Ayres) ឧបការីរដ្ឋមន្ត្រីក្រសួពាណិជ្ជកម្មនិងជាឧបការីរដ្ឋមន្ត្រីក្រសួងផលិតកម្មរបស់អូស្ត្រាលី។
កម្មវិធី នៃគម្រោងភាពជាដៃគូរវាងគណៈកម្មការកិច្ចការប្រកួតប្រជែងនិងការពារអ្នកប្រើប្រាស់អូស្ត្រាលី និងអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំកម្ពុជានេះ មានគោលបំណងពង្រឹងសមត្ថភាពមន្ត្រីកម្ពុជា ដើម្បីគាំទ្រដល់ការអនុវត្តច្បាប់ ការការពារអ្នកប្រើប្រាស់ និងកិច្ចការប្រកួតប្រជែងឱ្យមានប្រសិទ្ឋិភាព។ កម្មវិធីនេះដែរ មានគម្រោងសកម្មភាពមួយចំនួនដូចជា ការបង្កើតជំនាញស៊ើបអង្កេតនិងទំនាក់ទំនងជាមួយស្ថាប័នផ្សេងៗខាងក្រៅ ការបង្កើតវិធានការស៊ើបអង្កេត ការផ្តល់ការណែនាំដល់បុគ្គលិក និងការសម្របសម្រួលទំនាក់ទំនងអន្តរជាតិឱ្យកាន់តែទូលំទូលាយ។ ក្នុងនោះកម្មវិធីនេះ ក៏បានគាំទ្រដល់ការអនុវត្តច្បាប់របស់កម្ពុជា នូវច្បាប់ស្តីពីកិច្ចការពារអ្នកប្រើប្រាស់ឆ្នាំ២០១៩ និងច្បាប់ស្តីពីការប្រកួតប្រជែងឆ្នាំ២០២១ ដែលជាផ្នែកមួយនៃកញ្ចប់ជំនួយរួម ដើម្បីជំរុញការស្តារសេដ្ឋកិច្ចក្នុងតំបន់ក្រោយវិបត្តិជំងឺកូវីដ-១៩។
កម្មវិធីនៃគម្រោងភាពជាដៃគូនៃកិច្ចការពារអ្នកប្រើប្រាស់ កម្ពុជា-អូស្ត្រាលី គឺជានិមិត្តរូបនៃសាមគ្គីភាព ផ្សារភ្ជាប់ទំនាក់ទំនងរវាងប្រទេសទាំងពីរកម្ពុជា-អូស្ត្រាលី ដែលនឹងជួយដល់មន្ត្រីកម្ពុជាមានទំនាក់ទំនង និងកិច្ចសហការល្អជាមួយអ្នកជំនាញជាន់ខ្ពស់ក្នុងវិស័យពាណិជ្ជកម្មរបស់អូស្ត្រាលី និងទំនាក់ទំនងកាន់តែរឹងមាំ និងជិតស្និទ្ឋជាមួយសហការីផ្នែកកិច្ចការពារអ្នកប្រើប្រាស់ និងកិច្ចការប្រកួតប្រជែងនៅតាមបណ្តាប្រទេសនៅអាស៊ានផងដែរ។
ឯកឧត្តម ផាន អូន ប្រតិភូរាជរដ្ឋាភិបាទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែងនិងបង្ក្រាបការក្លែងបន្លំ នៃប្រទេសកម្ពុជា បង្ហាញថា៖ ថវិកាចំនួន ១.៣៥លានដុល្លារអូស្ត្រាលី ដែលមានរយៈពេល៣ឆ្នាំនេះ នឹងចាប់ផ្ដើមអនុវត្តន៍ពីឆ្នាំ២០២៤ទៅ ជាគម្រោងបន្តពីគម្រោងមុន។ សម្រាប់កម្ពុជា ក្នុងរយៈពេល៨ខែ ឆ្នាំ២០២២នេះ អគ្គនាយកនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បង្ក្រាបករណីមិនប្រក្រតីនៅតាមទីផ្សារបានជាច្រើនករណី ក្នុងនោះដកហូតទំនិញខូចគុណភាពហួសកាលបរិច្ឆេទ បានចំនួនជាង២០០តោន និងចុះពិនិត្យបទល្មើសសេដ្ឋកិច្ចពីករណីឆបោក កិបកេងចំនួនលីត្រនូវប្រេងឥន្ទនៈជាដើម នៅតាមស្ថានីយជាង២០០០ស្ថានីយ ក្នុងនោះជា៤០ភាគរយ មានភាពមិនអនុលោម ប៉ុន្តែអត្រានៃភាពមិនអនុលោមបានថយចុះជាងមុន ដែលបង្ហាញឱ្យឃើញពីការចូលរួមអនុវត្តន៍ច្បាប់កាន់តែច្រើនឡើងៗរបស់អាជីវករ៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
