ការបណ្តុះបណ្តាលសិស្សឱ្យមានគ្រឹះរឹងមាំពីតូច គឺជាចំណុចចាំបាច់បំផុត ព្រោះកុមារគឺជាក្រដាសស ដូច្នេះបើសិស្សានុសិស្សទទួលបានចំណេះដឹងជាមូលដ្ឋាន ដែលជាគ្រឹះរឹងមាំតាំងពីនៅតូចនោះ ការបន្តការសិក្សារបស់ពួកគេចាប់ពីថ្នាក់បឋម រហូតដល់ឧត្តមសិក្សា នឹងទទួលបានជោគជ័យ នេះបើតាមការលើកឡើងរបស់ឯកឧត្តម ស៊ាន បូរ៉ាត ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកស្រីស្នំ ខេត្តសៀមរាប ក្នុងវេទិកាសាធារណៈ ការពង្រឹងគុណភាពសិក្សាក្នុងបរិបទឌីជីថល និងដោះស្រាយបញ្ហាប្រឈមនានា ស្ថិតនៅសាលាវិទ្យាល័យ២៨មករា ក្នុងស្រុកស្រីស្នំ ខេត្តសៀមរាប នៅព្រឹកថ្ងៃទី១៦ ខែកញ្ញា ឆ្នាំ២០២២។
ឯកឧត្តមប្រធានក្រុមការងារ បញ្ជាក់ថា ក្នុងគោលដៅឱ្យសិស្សានុសិស្សនៅតាមតំបន់ជនបទ ទទួលបានការបណ្តុះបណ្តាល និងសិក្សារៀនសូត្រឱ្យមានភាពរឹងមាំពីតូចនោះ ក្រសួងអប់រំយុវជននិងកីឡា បានបង្កើតឱ្យមានសាលាមត្តេយ្យ បឋមសិក្សា រហូតដល់វិទ្យាល័យជាច្រើន នៅតាមមូលដ្ឋាន ដើម្បីឱ្យនៅកៀកនឹងលំនៅដ្ឋានរបស់ប្រជាពលរដ្ឋ ដែលជាការផ្តល់ឱកាសឱ្យកុមារតូចៗ និងសិស្សានុសិស្សទាំងអស់ ទៅសាលាបានទៀងទាត់ និងកាត់បន្ថយការបង់ការសិក្សា។ ទន្ទឹមនឹងការអភិវឌ្ឍន៍សង្គម សេដ្ឋកិច្ចកម្ពុជា និងស្របតាមគោលនយោបាយរបស់រាជរដ្ឋាភិបាលកម្ពុជា ក្រៅពីសាលារៀនរបស់រដ្ឋ សាលារៀនឯកជនជាច្រើន ត្រូវបានបង្កើតឡើងគ្រប់កម្រិត និងសំបូរបែបផងដែរ។
គួរជម្រាបថា ការបើកវេទិកាសាធារណៈ របស់ក្រុមការងាររាជរដ្ឋាភិបាលចុះជួយស្រុកស្រីស្នំនាពេលនេះ មានការចូលរួមពីសមាគមលើកកម្ពស់ពលករ និងអតីតពលករ ដើម្បីសប្បុរសធម៌ មន្ទីរ អង្គភាពពាក់ព័ន្ធនានា ព្រមទាំងលោកគ្រូ អ្នកគ្រូ សិស្សានុសិស្សប្រមាណជាង៣០០នាក់។ វេទិកានេះដែរ មានគោលបំណងរកដំណោះស្រាយជូនប្រជាពលរដ្ឋទៅលើបញ្ហាប្រឈមនានា ដែលកើតមាននៅក្នុងមូលដ្ឋានប្រចាំថ្ងៃ ក្នុងនោះក្មួយៗសិស្សានុសិស្ស ដែលមានបញ្ហាផ្សេងៗក្នុងការសិក្សា និងការរស់នៅប្រចាំថ្ងៃក៏អាចចូលរួមលើកជាយោបល់បាននផងដែរ។
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក សេង ផល្លី
