ប្រទេសកម្ពុជា និងអូស្ត្រាលី បានចាប់ផ្តើមដំណើរការកម្មវិធីសម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAP-RED) ដែលមានទំហំជាទឹកប្រាក់៨៧លានដុល្លារអូស្ត្រាលី និងមានរយ:ពេល ៥ឆ្នាំ។
ថ្លែងនៅក្នុងពិធីបើកដំណើរការកម្មវិធីថ្មីនេះ នៅក្រុសៀមរាប នារសៀលថ្ងៃទី១៧ ខែកញ្ញា ឆ្នាំ២០២២នេះ ព្រឹទ្ធសមាជិក Tim Ayres ឧបការីរដ្ឋមន្ត្រីក្រសួងពាណិជ្ជកម្ម និងជាឧបការីរដ្ឋមន្ត្រីក្រសួងផលិតកម្ម របស់អូស្ត្រាលី បានមានប្រសាសន៍ថា “ឆ្នាំនេះជាខួបទី៧០ឆ្នាំ នៃទំនាក់ ទំនងការទូតរវាងកម្ពុជា និងអូស្ត្រាលី ហើយកម្មវិធី CAP-RED ជាភស្តុតាងរឹតតែច្បាស់ បន្ថែមទៀតនៅភាពជាដៃគូដ៏យូរអង្វែងរបស់យើងជាមួយប្រទេសកម្ពុជា។ យើងរង់ចាំចែករំលែកចំណេះដឹង និងជំនាញ ជាមួយសមភាគីកម្ពុជារបស់យើង ដើម្បីបង្កើតបរិយាកាសអំណោយផលសម្រាប់ការវិនិយោគ ផលិតភាព និងពាណិជ្ជកម្ម»។
ដើម្បីសម្រេចបាននូវលទ្ធផលទាំងនេះ កម្មវិធីនេះនឹងធ្វើការយ៉ាងជិតស្និទ្ធជាមួយក្រសួងពាក់ព័ន្ធ និងផ្នែកពាក់ព័ន្ធនានា ក្នុងវិស័យចំនួនបី ដើម្បីជំរុញកំណើន សេវាហេដ្ឋារចនាសម្ព័ន្ធកសិកម្ម និងកសិ-កែច្នៃ ព្រមទាំងការអភិវឌ្ឍ ពាណិជ្ជកម្ម ការវិនិយោគ និងសហគ្រាស។ កម្មវិធីនេះនឹងផ្ដោតសំខាន់ ខ្លាំងលើ ការចែករំលែកការស្រាវជ្រាវ និងចំណេះដឹង ព្រមទាំងផ្ដោតលើសមភាពយេនឌ័រ ពិការភាព និងបរិយាបន្នសង្គម ផងដែរ។
CAP-RED ជាកម្មវិធីថ្មី មានរយ:ពេល ៥ឆ្នាំ ដែលត្រូវបានបង្កើតឡើង ផ្អែកលើជំនួយជាងមួយទសវត្សរ៍របស់អូស្ត្រាលី ដល់វិស័យកសិកម្ម និងហេដ្ឋារចនាសម្ព័ន្ធនៅកម្ពុជា តាមរយ:កម្មវិធីខ្សែសង្វាក់ តម្លៃកសិកម្មកម្ពុជា-អូស្ត្រាលី (CAVAC) និងកម្មវិធីវិនិយោគលើវិស័យហេដ្ឋារចនាសម្ព័ន្ធ (3i) ដែលទើប តែបានបញ្ចប់ថ្មីៗនេះ។ កម្មវិធីទាំងពីរដែលទើបតែបានបញ្ចប់នេះ បានផ្ដល់អត្ថប្រយោជន៍ដល់ប្រជាជនកម្ពុជា នៅតាមជនបទ ជាងពីរលាននាក់។
កម្មវិធី CAP-RED ត្រូវបានបង្កើតឡើង បន្ទាប់ពីមានការពិគ្រោះយោបល់ដ៏ទូលំទូលាយជាមួយទាំងវិស័យសាធារណ: និងឯកជន អំពីមធ្យោបាយដ៏ល្អប្រសើរបំផុត ដើម្បីជួយសេដ្ឋកិច្ចកម្ពុជាស្ដារឡើងវិញបន្ទាប់ពីជំងឺកូវីដ-១៩។ កម្មវិធី CAP-RED នឹងជួយដល់រាជរដ្ឋាភិបាលកម្ពុជា និងសមភាគីពាក់ព័ន្ធផ្សេងៗទៀត បង្កើតគោលនយោបាយនានា ដែលជំរុញកំណើនសេដ្ឋកិច្ចប្រកបដោយបរិយាបន្ន ភាពធន់ និងនិរន្តរភាព។
ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការ នៃក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា “កម្មវិធី CAP-RED ជាការរួមចំណែកយ៉ាងសំខាន់ ទៅដល់របៀបវារ:នៃការអភិវឌ្ឍសេដ្ឋកិច្ចរបស់កម្ពុជា ដែលគាំទ្រដល់ការស្ដារឡើងវិញ ភាពធន់ និងកំណែទម្រង់។ កម្មវិធីនេះនឹងលើកទឹកចិត្តដល់ការវិនិយោគសាធារណ: និងឯកជនប្រកបដោយបរិយាបន្ន ដើម្បីជួយជំរុញ សេដ្ឋកិច្ចអោយកាន់តែមានភាពចម្រុះ និងបរិយាបន្ន។
តាមរយ:ភាពជាដៃគូនេះ យើងរំពឹងថា គ្រួសារកម្ពុជាមួយចំនួន ជាពិសេសគ្រួសារមកពីជនបទ ក្នុងប្រទេសកម្ពុជា ជាពិសេសស្ត្រី កុមារ មនុស្សចាស់ ជនមានពិការភាព និងក្រុមងាយរងគ្រោះ នឹងមានជីវភាពប្រសើរឡើង ៕
អត្ថបទ និងរូបភាព: លោកជា ស្រស់ និងលោកយូ វង្ស កែសម្រួលដោយ លីវ សុខុន!!!