នៅព្រឹកថ្ងៃទី១៨ ខែកញ្ញា ឆ្នាំ២០២២នេះ ឯកឧត្តម លីវ សុខុន ទីប្រឹក្សាក្រសួង និងជាប្រធានមន្ទីរព័ត៌មានខេត្តសៀមរាប និងលោកជំទាវ ព្រមទាំងមន្ត្រីក្រោមឱវាទ រួមជាមួយលោក ហ៊ុន ប្ញទ្ធិ និងលោកស្រី ព្រមទាំងមន្ត្រីរដ្ឋបាលស្រុកស្រីស្នំ ដោយមានការជួយឧបត្តម្ភគាំទ្រពី ឯកឧត្តម លន់ សុធី ប្រធានក្រុមការងារគណបក្សចុះមូលដ្ឋានស្រុកស្រីស្នំ បាននាំយកទេយ្យវត្ថុមាន គ្រឿងឧបភោគបរិភោគ និងបច័្ចយ រួមមាន៖ អង្ករ, មី, ស្ករស, ត្រីខ, ទឹកត្រី, ទឹកស៊ីអ៊ីវ និងថវិកាមួយចំនួន ប្រគេនដល់ព្រះភិក្ខុសង្ឃគង់ចាំព្រះវស្សា ក្នុងវត្តចំនួន២ គឺ វត្តសុវណ្ណគីរីកេសត្រោះ និងវត្តសុវណ្ណគីរីកេសធ្លក ស្ថិតក្នុងឃុំស្លែងស្ពាន ស្រុកស្រីស្នំ ខេត្តសៀមរាប។
នាឱកាសនោះ ឯកឧត្តម លីវ សុខុន មានប្រសាសន៍ថា ពិធីបុណ្យភ្ជុំបិណ្ឌជាបុណ្យប្រពៃណីខ្មែរ ដែលប្រជាពុទ្ធបរិស័ទខ្មែរគ្រប់រូបតែងតែធ្វើជារៀងរាល់ឆ្នាំ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធ ជីដូនជីតា ញាតិការទាំង ៧សណ្តាន ដែលលោកបានចែកឋានទៅកាន់លោកខាងមុខ សូមឲ្យលោកបានទៅកាន់សុគតិភព និងសូមឧទ្ទិសជូនដល់ដួងវិញ្ញាណក្ខន្ធ កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិ កសាងការពារមាតុភូមិ ព្រមទាំងបងប្អូនរងគ្រោះ ដែលបានស្លាប់ទៅដោយភាពអយុត្តិធម៌ និងជួយរំដោះឲ្យរួចចាកផុតពីទុក្ខទោសទាំងឡាយដែលជាឧបាយភូមិណាមួយ បានទៅកាន់សុគតិភពថ្មីនោះ។
ឯកឧត្តម បានបញ្ជាក់ថា ព្រះពុទ្ធសាសនានៅកម្ពុជា អាចរីកចម្រើនទៅបាន គឺអាស្រ័យដោយប្រទេសជាតិមានសុខសន្តិភាពពេញលេញ។ ម្យ៉ាងទៀត សុខសន្តិភាពនេះហើយ ទើបប្រជាពុទ្ធបរិស័ទ មានឱកាសប្រតិបត្តិធម៌ ប្រារព្ធពិធីបុណ្យទានដូចវេលានេះ និងបានប្រកបកិច្ចការរកស៊ីចិញ្ចឹមជីវិត និងអភិវឌ្ឍន៍សង្គមជាតិឲ្យមានការរីកចម្រើន។ ក្រោយថ្ងៃជ័យជំនះ ៧មករា ឆ្នាំ១៩៧៩ ក្រោមការបើកទូលាយរបស់រាជរដ្ឋាភិបាលកម្ពុជា បានធ្វើឲ្យប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ ក្រោមគោលនយោបាយឈ្នះៗ ជាមួយគ្នានោះវិស័យព្រះពុទ្ធសាសនា បានប្រតិបត្តិតាមគន្លងប្រពៃណីពីជីដូនជីតាបានពេញលេញ ដោយគ្មានក្តីបារម្ភ។ ហេតុនេះសូមពុកម៉ែបងប្អូននាំគ្នារក្សាសុខសន្តិភាពនេះ ឱ្យនៅស្ថិតស្ថេរគង់វង្ស សម្រាប់ជាគ្រឹះក្នុងកិច្ចការអភិវឌ្ឍជាតិមាតុភូមិយើងជាបន្តទៅទៀត ដើម្បីទុកជាកេរដំណែលដល់កូនចៅជំនាន់ក្រោយរបស់យើង៕
ព័ត៌មានជាតិ ថ្មីៗ
អត្ថបទ និងរូបភាព: មន្ត្រី នៃមន្ទីរព័ត៌មានខេត្តសៀមរាប!!!
