នៅព្រឹកថ្ងៃទី១៩ ខែកញ្ញា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានដឹកនាំកិច្ចប្រជុំសាមញ្ញថ្នាក់ដឹកនាំក្រសួងព័ត៌មាន សម្រាប់សប្តាហ៍ទី៣ ប្រចាំខែកញ្ញា ដើម្បីពិនិត្យវឌ្ឍនភាពការងារដែលសម្រេចអនុវត្តន៍បាននាពេលកន្លងមក និងផែនការ ការងារដែលត្រូវបំពេញបន្តបន្ទាប់ខាងមុខទៀត។
ក្នុងកិច្ចប្រជុំនេះ ឯកឧត្តម ខៀវ កាញារីទ្ធ បានលើកឡើង ពីគម្រោងបន្តបណ្តុះបណ្តាល ក្នុង និងក្រៅប្រទេស ដល់មន្រ្តីជំនាញបច្ចេកទេស និងផ្នែកនានាជាច្រើនទៀតទាក់ទងកិច្ចការងារព័ត៌មាន និងសោតទស្សន៍ ព្រោះថានៅក្នុងខែវិច្ឆិកា មានព្រឹត្តការណ៍ជាប្រវត្តិសាស្រ្តមួយទៀត ដែលកម្ពុជាធ្វើជាម្ចាស់ផ្ទះនៃកិច្ចប្រជុំកំពូលអាស៊ាន ដែលមានប្រមុខថ្នាក់ដឹកនាំ ក្នុងតំបន់ និងពិភពលោក មកចូលរួមជាច្រើន ។ ទន្ទឹមគ្នានេះដែរ នៅក្នុងឆ្នាំ២០២៣ ក៏មានព្រឹត្តការណ៍នៃការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះផងដែរ។ ដូច្នេះក្រសួងព័ត៌មាន ត្រូវពង្រឹងសមត្ថភាព មន្រ្តី ដើម្បីបំពេញការងារឱ្យបានល្អ។
កិច្ចប្រជុំនេះដែរ ថ្នាក់ដឹកនាំនៃអគ្គនាយកដ្ឋាន ទាំង៥ចំណុះឱ្យក្រសួងព័ត៌មាន រួមទាំង ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ ជាប្រធានគណ:កម្មការ អនុគណ: កម្មការ បានធ្វើរបាយការណ៍ពីវឌ្ឍនភាពការងារ សំខាន់ៗមួយចំនួន ដែលមន្រ្តី និងថ្នាក់ដឹកនាំគ្រប់ផ្នែក គ្រប់ជំនាញ សម្រេចបំពេញ និងអនុវត្តន៍បានកាលពីពេលកន្លងទៅនេះ។ ទន្ទឹមគ្នានេះដែរ ថ្នាក់ដឹកនាំ តាមបណ្តាផ្នែកជំនាញនីមួយៗក៏បានលើកពីផែនការសកម្មភាពការងារ ដែល ត្រូវបន្តធ្វើ សម្រាប់សប្តាហ៍បន្តបន្ទាប់ទៀតឱ្យបានកាន់តែល្អប្រសើរ។
ក្រៅពីកិច្ចពិភាក្សាការទទួលខុសត្រូវ ថត និងផ្សព្វផ្សាយនៃព្រឹត្តិការណ៍ការប្រកួតកីឡាស៊ីហ្គេមឆ្នាំ២០២៣នេះ ឯកឧត្តម ខៀវ កាញារីទ្ធ បានជំរុញលើកទឹកចិត្ត ដល់គ្រប់ផ្នែកពាក់ព័ន្ធ ពិសេសអគ្គនាយកដ្ឋានទូរទស្សន៍ជាតិកម្ពុជា ត្រៀមរៀបចំកម្មវិធីប្រកួតរ៉ូបូត ABU Robocon លក្ខណៈអន្តរជាតិ ដែលគ្រោងធ្វើឡើងនៅក្នុងខែសីហា ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ ដោយរៀបចំការប្រកួត តាមរយៈកិច្ចសហការជាមួយទូរទស្សន៍ជប៉ុន NHK ។
ឯកឧត្តម ខៀវ កាញារីទ្ធ បានសម្ដែងនូវការកោតសរសើរ និងវាយតម្លៃខ្ពស់ចំពោះលទ្ធផលការងារ ដែលបណ្តាអគ្គនាយកដ្ឋានទាំង ៥ ចំណុះឱ្យក្រសួងព័ត៌មាន សម្រេចអនុវត្តន៍កន្លងមកនេះ ពិសេសការខិតខំប្រឹងប្រែងរបស់ អគ្គនាយកដ្ឋានផ្សព្វផ្សាយទាំង៣ គឺ ទូរទស្សន៍ជាតិកម្ពុជា វិទ្យុជាតិកម្ពុជា និងទីភ្នាក់ងារសារព័ត៌មានកម្ពុជា(AKP) ដែលផ្សព្វផ្សាយបាន យ៉ាងទូលំទូលាយនូវរាល់ព្រឹត្តការណ៍សំខាន់ៗ និងកម្មវិធីជាច្រើនទៀត បានទូលំទូលាយ ជាពិសេសកម្មវិធីកម្សាន្តសប្បាយរបស់ប្រជាពលរដ្ឋ ក្នុងឱកាសនៃពិធីបុណ្យ កាន់បិណ្ឌ និងភ្ជុំបិណ្ឌ ។
អត្ថបទ និង រូបភាព៖ ក្រសួងព័ត៌មាន
