កិច្ចប្រជុំរដ្ឋមន្ដ្រី សេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធ បានបិទបញ្ចប់ដោយជោគជ័យជាមួយនឹងលទ្ធផលលើចំណុចអាទិភាពចំនួន៥ក្រោយពីដំណើរការទៅអស់រយ:ពេល ៨ថ្ងៃ ពីថ្ងៃទី១១ ដល់ថ្ងៃទី១៨ ខែកញ្ញាឆ្នាំ២០២២។ កិច្ចប្រជុំរដ្ឋមន្ដ្រី សេដ្ឋកិច្ចអាស៊ានលើកទី៥៤ និងកិច្ចប្រជុំពាក់ព័ន្ធនេះ បានប្រាព្ឋពិធីបិទ និងបានរៀបចំសន្និសីទសារព័ត៌មាន កាលពីរល្ងាចថ្ងៃទី១៨ ខែកញ្ញា ឆ្នាំ២០២២។ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានកិច្ចប្រជុំរដ្ឋមន្ត្រីសេដ្ឋកិច្ចអាស៊ាន បានបង្ហាញអំពីចំណុចអាទិភាពសេដ្ឋកិច្ច៥ ក្នុងចំណោម៩ ត្រូវបានបញ្ចប់ដោយជោគជ័យទាំងស្រុង។ ឯកឧត្តម មានប្រសាសន៍ថា៖ កម្ពុជាកំពុងឆ្ពោះទៅរកការបញ្ចប់នូវសមិទ្ធផលអាទិភាពសេដ្ឋកិច្ចទាំង១៩ សម្រាប់ភាពជាប្រធានអាស៊ានក្នុងឆ្នាំ២០២២នេះ ជាមួយនឹងការគាំទ្រយ៉ាងខ្លាំងពីគ្រប់រដ្ឋសមាជិកអាស៊ាន។ អាទិភាពសេដ្ឋកិច្ច៥ ក្នុងចំណោម៩ ត្រូវបានបញ្ចប់ដោយជោគជ័យទាំងស្រុង ក្នុងនោះរួមមាន: កម្មវិធីការងារ ដើម្បីគាំទ្រដល់ការអនុវត្តក្របខ័ណ្ឌសេដ្ឋកិច្ចវិលជុំ សម្រាប់សហគមន៍សេដ្ឋកិច្ចអាស៊ាន កញ្ចប់គោលនយោបាយ៖ អនុសាសន៍រួមផ្ដោតសំខាន់លើសហគ្រិនភាពស្រ្តី សម្រាប់គោលនយោបាយអាស៊ាន ពាក់ព័ន្ធនឹងសហគ្រាសមីក្រូ ធនតូច និងមធ្យម។ ការប្រកាសលើការចរចាកិច្ចព្រមព្រៀងក្របខ័ណ្ឌអាស៊ាន ស្ដីពីកិច្ចការប្រកួតប្រជែង ការប្រកាសលើការចរចាដំឡើងកម្រិតនូវកិច្ចព្រមព្រៀងអាស៊ាន ស្តីពីពាណិជ្ជកម្មទំនិញ ពិធីសារធ្វើវិសោធនកម្មកិច្ចព្រមព្រៀងអាស៊ាន ស្តីពីរូបវន្តបុគ្គល (ដោយរងចាំតែការចុះហត្ថលេខា តែប៉ុណ្ណោះ)។
ឯកឧត្តម ប៉ាន សូរស័ក្តិ បញ្ជាក់ទៀតថា៖ សមិទ្ធផលអាទិភាពសេដ្ឋកិច្ចដ៏ទៃទៀត ក៏កំពុងឆ្ពោះទៅរកការបញ្ចប់ក្នុង ឆ្នាំ២០២២ នេះផងដែរ។ ការបញ្ចប់នូវសមិទ្ធផលអាទិភាពសេដ្ឋកិច្ចទាំងនេះនឹងធានាថាអាស៊ាននឹងមាន មូលដ្ឋានគ្រឹះថារឹងមាំសម្រាប់តំបន់ ក្នុងការ (១) គាំទ្រការតភ្ជាប់ឌីជីថល វិទ្យាសាស្ត្រ និងបច្ចេកវិទ្យា (២) កាត់បន្ថយគម្លាតការអភិវឌ្ឍសម្រាប់ភាពប្រកួតប្រជែងអាស៊ាន (៣) ការជំរុញសមាហរណកម្ម បរិយាប័ន្ន ភាពធន់ និងភាពប្រកួតប្រជែងអាស៊ាន និង(៤) ពង្រឹងអាស៊ានជាសាកលសម្រាប់កំណើន និងការអភិវឌ្ឍ។ ឯកឧត្តម មានប្រសាសន៍ទៀតថា៖ រដ្ឋមន្ត្រីសេដ្ឋកិច្ចអាស៊ានបានទទួលស្គាល់នូវបញ្ហាប្រឈមដែលកំពុងកើតមានទាំងក្នុងកម្រិតតំបន់និងសាកលហើយ ក៏បានបញ្ជាក់ជាថ្មីផងដែរ អំពីការប្តេជ្ញាចិត្តរបស់ខ្លួនចំពោះការអនុវត្តរាល់សកម្មភាពទាំងឡាយ ដូចមានចែងក្នុងក្របខណ្ឌស្តារឡើងវិញគ្រប់ជ្រុងជ្រោយអាស៊ានASEAN Comprehensive Recovery Framework-ACRF) ព្រមទាំងពិនិត្យលើលទ្ធភាពក្នុងការដោះស្រាយបញ្ហាប្រឈមថ្មីៗទាំងឡាយ ដែលស្ថិតក្រោមក្របខណ្ឌរបស់ ACRF ក៏ដូចជាក្រោមយន្តការផ្សេងៗទៀតរបស់អាស៊ាន។
សូមបញ្ជាក់ថា៖ ក្នុងអំឡុងពេលនៃកិច្ចប្រជុំដែលបានរៀបចំឡើងនៅសណ្ឋាគារសុខាខេត្តសៀមរាបនេះ កម្ពុជាក៏មានកិត្តិយសបានរៀបចំឡើងនូវកិច្ចប្រជុំលើកដំបូងថ្នាក់រដ្ឋមន្ត្រីអាសិប ក្នុងខណ:ពេលដែលភាគីអាសិបកំពុងរៀបចំដាក់ឱ្យអនុវត្តនូវកិច្ចព្រមព្រៀងនេះ ក្រោយពេលកិច្ចព្រមព្រៀងនេះចូលជាធរមានហើយ ចាប់តាំងពីខែមករា ឆ្នាំ២០២២ ដែលរដ្ឋមន្ត្រីសេដ្ឋកិច្ចអាស៊ានជួបប្រជុំគ្នាដោយផ្ទាល់នៅសៀមរាបនេះ គឺជាសក្ខីភាពបង្ហាញនូវការប្តេជ្ញារបស់កម្ពុជា ក្នុងការដឹកនាំអាស៊ានឆ្ពោះទៅរកការស្ដារឡើងវិញពីវិបត្តិកូវិដ-១៩ ប្រកបដោយនិរន្តរភាព របៀបរៀបរយ និងជាជំហានៗ ប្រកបដោយនិរន្តរភាព បរិយាប័ន្ន និងភាពធន់រឹងមាំ។ ក្នុងគោលបំណងកសាងសហគមន៍អាស៊ាន ជារួមកិច្ចប្រជុំរដ្ឋមន្ត្រីសេដ្ឋកិច្ចលើកទី៥៤ បានគូសបញ្ជាក់នូវ របៀបវារ: ក្នុងការតភ្ជាប់ និងសមាហរណកម្មសេដ្ឋកិច្ចក្នុងចំណោមរដ្ឋសមាជិកអាស៊ាននៅតែជារបៀបវារ:អាទិភាព ដើម្បីធានាថាអាស៊ាន នៅតែជាសហគមន៍ដែលផ្ដល់កាលានុវត្តភាពដល់មនុស្សគ្រប់គ្នា៕
អត្ថបទ និងរូបភាព: លោកយូ វង្ស និងលោកជា ស្រស់ កែសម្រួលដោយ លីវ សុខុន!!!
