កាលពីថ្ងៃទី១៨ ខែកញ្ញា ឆ្នាំ២០២២ ក្រុមការងារចុះមូលដ្ឋានឃុំពាក់ស្នែង ស្រុកអង្គរធំ ខេត្ដសៀមរាប បានអញ្ជើញកាន់បិណ្ឌវេណទី៨ នៅវត្ដចំនួន៣ នៅឃុំពាក់ស្នែង ដឹកនាំដោយឯកឧត្ដម ផៃ សុខខេង ប្រធានក្រុមការងារប្រចាំការចុៈជួយឃុំពាក់ស្នែង។
ឯកឧត្ដម ផៃ សុខខេង បានសម្ដែងនូវមោទនភាព ដែលឃើញប្រជាពលរដ្ឋមានលទ្ធភាព និងចូលរួមធ្វើបុណ្យទានតាមប្រពៃណីខ្មែរ ដែលពីការសាមគ្គីភាពគ្នា រវាងវិស័យអាណាចក្រ និងពុទ្ធចក្រ ក្នុងពេលដែលប្រទេសជាតិមានសន្ដិភាពពេញលេញ។ ទន្ទឹមនោះ ការចូលរួមធ្វើពិធីបុណ្យយ៉ាងឱឡារឹកនេះ គឺដោយសារការដឹកនាំដ៏ត្រឹមត្រូវ របស់រាជរដ្ឋាភិបាលក្នុងការទប់ស្កាត់ការឆ្លងជំងឺកូវីដ-១៩ ប្រកបដោយជោគជ័យយ៉ាងត្រចះត្រចង់។
គួរជម្រាបថា ពិធីកាន់បិណ្ឌ ឬដាក់បិណ្ឌ និងបុណ្យភ្ជុំបិណ្ឌ ប្រារព្ធឡើងក្នុងគោលបំណង ទំនុកបម្រុងបច្ច័យ៤ ដល់ព្រះសង្ឃ ដែលគង់ចាំវស្សា ដោយមានគោលបំណងធំៗ ៣យ៉ាងគឺ៖ ទី១-ដើម្បីតបសងគុណ ឧទ្ទិសកុសលទៅឱ្យបុព្វការីជន ដែលបានចែកឋានទៅកាន់លោកខាងមុខហើយ។ ទី២-ដើម្បីយើងបានធ្វើបុណ្យកុសល សន្សំសេចក្តីសុខ សេចក្តីចម្រើន សម្រាប់ខ្លួនយើងម្នាក់ៗ ហើយយើងបានបុណ្យទៅដល់អ្នក មានគុណរបស់យើង និងទី៣ ចូលមកអប់រំខ្លួនឯង ក្នុងនាមអ្នកកាន់ព្រះពុទ្ធសាសនា។
ឆ្លៀតក្នុងឱកាសនោះ ឯកឧត្ដមប្រធានក្រុមការងារ ក៏បានចុះសួរសុខទុក្ខ និងសំណេះសំណាលជាមួយក្រុមការងារ នៃមណ្ឌលសុខភាពពាក់ស្នែង ប៉ុស្តិ៍នគរបាលរដ្ឋបាលពាក់ស្នែង និងចូលបុណ្យសពប្រជាពលរដ្ឋចំនួន ២គ្រួសារផងដែរ។
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
