ផ្លូវបេតុង១ខ្សែប្រវែងជាង៧០០ម៉ែត្រ ស្ថិតនៅភូមិវត្តស្វាយ សង្កាត់សាលាកំរើក ក្រុងសៀមរាប ខេត្តសៀមរាប ដែល ជាគម្រោងមូលនិធិរបស់សង្កាត់សាលាកំរើក ត្រូវបានដាក់ជូនប្រជាពលរដ្ឋប្រើប្រាស់ជាផ្លូវការហើយ នៅព្រឹកថ្ងៃទី១៩ ខែកញ្ញា ឆ្នាំ២០២២នេះ។
អញ្ជើញជាអធិបតីក្នុងពិធីនោះ លោក សាម ឡន ចៅសង្កាត់សាលាកំរើក លើកឡើងថា ផ្លូវបេតុងមួយខ្សែនេះ ជាសមិទ្ធផលថ្មីមួយទៀតនៅក្នុងភូមិវត្តស្វាយ ដែលពីមុនផ្លូវនេះជាផ្លូវលំ។ ផ្លូវបេតុងថ្មីនេះ បានតភ្ជាប់ពីផ្លូវគោកស្រិតផ្នែកខាងត្បូង ទៅដល់ផ្លូវបេតុងទៅភ្នំក្រោម(មុខវត្តស្វាយ) ដែលវានឹងជួយសម្រួលដល់ការធ្វើដំណើររបស់បងប្អូនប្រជាពលរដ្ឋទូទៅ ឱ្យមានភាពងាយស្រួល ទាំងការទៅបំពេញការងារប្រចាំថ្ងៃ ការប្រកបអាជីវកម្ម ដឹកកសិផលយកទៅលក់នៅទីផ្សារជាដើម។
លោកចៅសង្កាត់ បានបន្ថែមថា សមិទ្ធផលក្នុងមូលដ្ឋានទាំងនេះ គឺជាគម្រោងផែនការអភិវឌ្ឍន៍ជាក់ស្តែងត្រឹមត្រូវ របស់រដ្ឋបាលសង្កាត់សាលាកំរើក ក្នុងគោលដៅបម្រើផលប្រយោជន៍រួមរបស់ប្រជាពលរដ្ឋ និងបង្កើនល្បឿននៃការអភិវឌ្ឍតាមមូលដ្ឋាន និងពង្រឹងប្រជាធិបតេយ្យនៅរដ្ឋបាលថ្នាក់ក្រោមជាតិ ព្រមទាំងចូលរួមលើកស្ទួយជីវភាពរស់នៅរបស់ប្រជាពលរដ្ឋ ដើម្បីចូលរួមកាត់បន្ថយភាពក្រីក្រ។
លោកចៅសង្កាត់ ក៏បានអំពាវនាវជាថ្មីម្តងទៀត ដល់បងប្អូនប្រជាពលរដ្ឋ ដែលរស់នៅអាស្រ័យផលតាមបណ្តោយដងផ្លូវនេះ សូមជួយថែរក្សាត្រូវចូលរួមថែរក្សាសមិទ្ធផលប្រយោជន៍សាធារណៈទាំងអស់នេះ រក្សាសណ្ដាប់ធ្នាប់បរិស្ថាន និងគ្រប់គ្រងសំរាមឱ្យបានល្អ ដើម្បីចូលរួមចំណែកលើកកម្ពស់សោភណ្ឌភាពទីក្រុងសៀមរាបរបស់យើង ឱ្យសាកសមជាទីក្រុងទេសចរណ៍។
នៅក្នុងពិធីសម្ពោធដាក់ឱ្យប្រើប្រាស់ផ្លូវបេតុងនាពេលនោះផងដែរ អង្គការស្រលាញ់ការរីកចម្រើនប្រជាជន រួមជាមួយនិងអាជ្ញាធរសង្កាត់ ក៏បាននាំយកនូវគ្រឿងឧបភោគបរិភោគ ចែកជូនដល់បងប្អូនប្រជាពលរដ្ឋចំនួន១៥០គ្រួសារ រស់នៅក្នុងសង្កាត់សាលាកំរើក ដែលមានជីវភាពក្រលំបាក និង ជួយសម្រួលដល់ជីវភាពប្រចាំថ្ងៃ ពិសេសក្នុងបរិបទនៃការរៀនរស់ជាមួយកូវីដ-១៩ កន្លងមក ដោយក្នុងមួយគ្រួសារៗ ទទួលបានអង្ករចំនួន២០គីឡូក្រាម និងគ្រឿងឧបភោគបរិភោគ១កញ្ចប់៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក សេង ផល្លី
