តបតាមការអញ្ជើញរបស់ឯកឧត្ដម លី ធុជ ទេសរដ្ឋមន្ដ្រី និងជាអនុប្រធានទី១ អាជ្ញាធរមីន ឯកឧត្តមព្រឹទ្ធសមាជិក អៀរីស(Tim Ayres) ឧបការីរដ្ឋមន្រ្តីក្រសួងពាណិជ្ជកម្មពាណិជ្ជកម្ម និងជាឧបការីរដ្ឋមន្រ្តីក្រសួងផលិតកម្ម របស់អូស្ត្រាលី នៅថ្ងៃទី១៦ ខែកញ្ញា ឆ្នាំ២០២២ បានទៅធ្វើទស្សនកិច្ចនៅអង្គការ Apopo ក្នុងក្រុងសៀមរាប ដែលជាទីស្នាក់ការចិញ្ចឹម និងបង្វឹកសត្វកណ្តុររាវរកគ្រាប់មីនក្នុងដីនៅកម្ពុជា។
ឯកឧត្ដម លី ធុជ មានប្រសាសន៍ថា ក្នុងនាមសម្តេចតេជោ នាយករដ្ឋមន្រ្តី បានថ្លែងអំណរគុណយ៉ាងជ្រាលជ្រៅដល់រដ្ឋាភិបាល និងប្រជាជនអូស្ត្រាលី ដែលបានចូលរួមដល់វិស័យសកម្មភាពមីន មនុស្សធម៌នៅកម្ពុជាចាប់តាំងពីឆ្នាំ១៩៩៤ ក្នុងគោលដៅចូលរួមកាត់បន្ថយការគ្រោះថ្នាក់ដល់អាយុជីវិត និងកាត់បន្ថយភាពក្រីក្រនៅកម្ពុជា។ ជាមួយគ្នានេះ ឯកឧត្ដមទេសរដ្ឋមន្រ្តី ក៏បានស្នើសុំដល់ប្រទេសអូស្ត្រាលី បន្តជួយគាំទ្រដល់ការងារបោសសម្អាតមីនរហូតដល់កម្ទេចគ្រាប់មីនចុងក្រោយនៅកម្ពុជា។ ជាមួយគ្នានោះ ឯកឧត្ដមក៏បានថ្លែងអំណរគុណដល់អង្គការ Apopo ប្រចាំនៅកម្ពុជា ដែលបានធ្វើការហ្វឹកហ្វឺនជំនាញរាវមីនដល់សត្វកណ្តុរ និងសត្វឆ្កែចាប់តាំងពីឆ្នាំ២០១៤ ក្នុងការចូលរួមដល់ការងារបោសសម្អាតមីននៅកម្ពុជា ដែលគិតត្រឹមឆ្នាំ២០២១ អង្គការ Apopo បានធ្វើការរំដោះផ្ទៃដីមានមីនប្រមាណជិត១០គីឡូម៉ែត្រក្រឡា។
ថ្លែងនាឱកាសនោះ ឯកឧត្តមព្រឹទ្ធសមាជិក បានកោតសរសើរ និងវាយតម្លៃខ្ពស់ចំពោះការងារបោសសម្អាតមីននៅកម្ពុជា ហើយឯកឧត្តម មានសេចក្តីរីករាយចំពោះការរីកចម្រើនរបស់កម្ពុជា ព្រមទាំងសង្ឃឹមថា កម្ពុជា នឹងរួចផុតពីការគម្រាមកំហែងដោយសារគ្រាប់មីន និងអាចសម្រេចតាមគោលដៅរបស់ខ្លួន។
សូមបញ្ជាក់ថា ប្រទេសអូស្ត្រាលី គឺជាដៃគូអភិវឌ្ឍន៍ដ៏លេចធ្លោមួយ ក្នុងការចូលរួមវិស័យសកម្មភាពមនុស្សធម៌នៅកម្ពុជា ដែលបានបរិច្ចាគថវិកាប្រមាណជាង ១០០លានដុល្លារអូស្ត្រាលី ចាប់តាំងពីឆ្នាំ ១៩៩៤ និងក្រោយមកបានចូលរួមគាំទ្រដល់គម្រោងបោសសម្អាតមីនចាប់តាំងពីឆ្នាំ២០០៦ ដោយផ្តល់ដីមានសុវត្ថិភាព និងបានជួយសង្រ្គោះដល់អាយុជីវិតមនុស្សរាប់លាននាក់ឱ្យរួចផុតពីគ្រាប់មីន និងសំណល់គ្រាប់មិនទាន់ផ្ទុះពីសង្រ្គាម នៅកម្ពុជា៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
