នៅព្រឹកថ្ងៃទី១៦ ខែកញ្ញា ឆ្នាំ២០២២នេះ ឯកឧត្តម ស៊ាន បូរ៉ាត រដ្ឋលេខាធិការក្រសួងអប់រំយុវជន និងកីឡា និងជាប្រធានក្រុមការងាររាជរដ្ឋាភិបាល ចុះជួយមូលដ្ឋានស្រុកស្រីស្នំ ខេត្តសៀមរាប រួមជាមួយតំណាងមន្ទីរអង្គភាព ស្ថាប័ននានា និងសមាគមលើកកម្ពស់ពលករ និងអតីតពលករ ដើម្បីសប្បុរសធម៌ បាននាំយកទេយ្យវត្ថុមានគ្រឿងឧបភោគបរិភោគ រួមមាន៖ អង្ករ, មី, ស្ករស, ត្រីខ, ទឹកត្រី, ទឹកស៊ីអ៊ីវ និងថវិកាមួយចំនួន ប្រគេនដល់ព្រះភិក្ខុសង្ឃគង់ចាំព្រះវស្សា ក្នុងវត្តចំនួន១០ នៃស្រុកស្រីស្នំ ខេត្តសៀមរាប។
នាឱកាសនោះ ឯកឧត្តម ស៊ាន បូរ៉ាត មានប្រសាសន៍ថា ពិធីបុណ្យភ្ជុំបិណ្ឌជាបុណ្យប្រពៃណីខ្មែរ ដែលប្រជាពុទ្ធបរិស័ទខ្មែរគ្រប់រូបតែងតែធ្វើជារៀងរាល់ឆ្នាំ ដើម្បីឧទ្ទិសកុសលផលបុណ្យជូនជីដូនជីតា ញាតិការទាំង ៧សណ្តាន ដែលលោកបានចែកឋានទៅកាន់លោកខាងមុខ សូមឲ្យលោកបានទៅកាន់សុគតិភព និងសូមឧទ្ទិសជូនដល់ដួងវិញ្ញាណក្ខ័ន្ត កម្មាភិបាល យុទ្ធជន យុទ្ធនារី ដែលបានពលីក្នុងបុព្វហេតុរំដោះជាតិ កសាងការពារមាតុភូមិ ព្រមទាំងបងប្អូនរងគ្រោះ ដែលបានស្លាប់ទៅដោយភាពអយុត្តិធម៌ និងជួយរំដោះឲ្យរួចចាកផុតពីទុក្ខទោសទាំងឡាយមដែលជាឧបាយភូមិណាមួយ បានទៅកាន់សុគតិភពថ្មីនោះ។
ឯកឧត្តម បានបញ្ជាក់ថា ព្រះពុទ្ឋសាសនានៅកម្ពុជា អាចរីកចម្រើនទៅបាន គឺអាស្រ័យដោយប្រទេសជាតិមានសុខសន្តិភាពពេញលេញ។ ម្យ៉ាងទៀត សុខសន្តិភាពនេះហើយ ទើបប្រជាពុទ្ធបរិស័ទ មានឱកាសប្រតិបត្តិធម៌ ប្រារព្ធពិធីបុណ្យទានដូចវេលានេះ និងបានប្រកបកិច្ចការរកស៊ីចិញ្ចឹមជីវិត និងអភិវឌ្ឍន៍សង្គមជាតិឲ្យមានការរីកចម្រើន។ ក្រោយថ្ងៃជ័យជំនះ ៧មករា ឆ្នាំ១៩៧៩ ក្រោមការបើកទូលាយរបស់រាជរដ្ឋាភិបាលកម្ពុជា បានធ្វើឲ្យប្រទេសជាតិមានការអភិវឌ្ឍន៍រីកចម្រើនលើគ្រប់វិស័យ ក្រោមគោលនយោបាយឈ្នះៗ។ ជាមួយគ្នានោះវិស័យព្រះពុទ្ធសាសនា បានប្រតិបត្តិតាមគន្លងប្រពៃណីពីជីដូនជីតាបានពេញលេញ ដោយគ្មានក្តីបារម្ភ។ ហេតុនេះសូមពុកម៉ែបងប្អូននាំគ្នារក្សាសុខសន្តិភាពនេះ ឱ្យនៅស្ថិតស្ថេរគង់វង្ស សម្រាប់ជាគ្រឹះក្នុងកិច្ចការអភិវឌ្ឍជាតិមាតុភូមិយើងជាបន្តទៅទៀត ដើម្បីទុកជាកេរដំណែលដល់កូនចៅជំនាន់ក្រោយរបស់យើង៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
