ក្នុងដំណើរចុះពិនិត្យសិក្សាគុណភាពសេវាទូរគមនាគមន៍ នៅតាមគោលដៅទេសចរណ៍អាទិភាព តំបន់ការពារធម្មជាតិ និងតំបន់ទេសចរណ៍ដាច់ស្រយាលនៅទូទាំងប្រទេស នៅរសៀលថ្ងៃទី១៥ ខែកញ្ញា ឆ្នាំ២០២២ ប្រតិភូក្រុមការងារអន្តរក្រសួងរួមមាន ក្រសួងប្រៃសណីយនិងទូរគមនាគមន៍ និងក្រសួងទេសចរណ៍ បានជួបប្រជុំពិភាក្សាជាមួយរដ្ឋបាលខេត្តសៀមរាប ក្រុមហ៊ុនទូរគមនាគមន៍ចំនួន១២ និង មន្ទីរ អង្គភាពពាក់ព័ន្ឋក្នុងខេត្ត ដើម្បីសាងសង់បង្គោលអង់តែនទូរស័ព្ទចល័ត និងការតភ្ជាប់បណ្តាញអ៊ីនធើណិត ក្នុងន័យពង្រីកវិសាលភាព និងគុណភាពនៃប្រព័ន្ធទូរគមនាគមន៍។
តាមការឱ្យដឹងពីឯកឧត្តម សូ វីសុទ្ឋី រដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានប្រតិភូដឹកនាំកិច្ចប្រជុំ បង្ហាញថា យោងតាមប្រសាសន៍ណែនាំដ៏ខ្ពង់ខ្ពស់ សម្តេចតេជោ ហ៊ុន សែន ក្រសួងប្រៃសណីយ៍ និងទូរគមនាគមន៍(ក.ប.ទ.) ក្រុមការងារអន្តរក្រសួង និងស្ថាប័នពាក់ព័ន្ធ ត្រូវរៀបចំកិច្ចប្រជុំ និងចុះត្រួតពិនិត្យសិក្សាគុណភាពសេវាទូរគមនាគមន៍តាមគោលដៅទេសចរណ៍អាទិភាព តំបន់ការពារធម្មជាតិ និងតំបន់ទេសចរណ៍ដាច់ស្រយាលនៅទូទាំងប្រទេសចាប់ពីខែកញ្ញា ឆ្នាំ២០២២នេះតទៅ ដើម្បីពង្រឹងគុណភាពសេវានិងបានជាមូលដ្ឋាន និងសាងសង់បង្គោលអង់តែនចំនួន១០០ ដូចដែលមានចែងក្នុងសេចក្ដីប្រកាសព័ត៌មានរបស់ក.ប.ទ. ចុះថ្ងៃទី១៤ ខែកក្កដា ឆ្នាំ២០២២ ជាមួយគ្នានេះក្រសួងក៏បានបង្កើតក្រុមការងារលើកកម្ពស់គុណភាពសេវា ដែលបានបែងចែកជា៥តំបន់ផងដែរ។ ឯកឧត្តមរដ្ឋលេខាធិការ បញ្ជាក់ថា សម្រាប់ខេត្តសៀមរាបជាតំបន់ទី៤ និងមាន៧គោលដៅ ស្ថិតនៅក្នុងតំបន់ប្រាសាទ គោដៅសហគមន៍ទេសចរណ៍ធម្មជាតិ និងតំបន់អាទិភាពមួយចំនួនទៀត។ ក្នុងនោះក្រុមការងារ នឹងធ្វើការចុះពិនិត្យ ចាប់ពីថ្ងៃទី១៥ ដល់ថ្ងៃទី១៩ ខែកញ្ញា ឆ្នាំ២០២២។
លោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានកត់សម្គាល់ថា មកដល់ពេលនេះតំបន់ជាច្រើននៅក្នុងខេត្តសៀមរាប ជាពិសេសគោលដៅសំខាន់ៗមួយចំនួនរបស់ខេត្ត មានការពិបាក ឬពុំអាចទំនាក់ទំនងគ្នាបាននោះទេ។ ជាឧទាហរណ៍ ចំណុចខ្លះនៃមណ្ឌលមន្ទីររដ្ឋបាលខេត្ត សាលាស្រុកបន្ទាយស្រី សាលាស្រុកអង្គរធំ តំបន់ភូមិធម្មជាតិរុនតាឯក ។ល។ លោកអភិបាលរងខេត្ត បានសម្តែងការគាំទ្រ និងផ្តល់កិច្ចសហការយ៉ាងពេញទំហឹង ជាមួយក្រុមការងារអន្តរក្រសួង ដើម្បីពន្លឿនការងារនេះ សម្រេចបានឆាប់រហ័ស។ ទន្ទឹមនោះ លោកក៏បានស្នើដល់ក្រុមការងារ ជួយរៀបចំសំណើរប្រព័ន្ឋសេវាអ៊ិនធើណិតសាធារណៈនៅតាមដងស្ទឹងសៀមរាប ពីចំណុចស្ពានអតិតមន្ទីរទេសចរណ៍ ទៅដល់ស្ពានវត្តព្រះព្រហ្មរ័ត្ន ព្រោះទីតាំងទាំងនេះ សំបូរភ្ញៀវទេសចរជាតិ និងអន្តរជាតិធ្វើដំណើរទៅមក។
ជាមួយនោះ ឯកឧត្តម ស៊ា ណារ៉េត អនុរដ្ឋលេខាធិការក្រសួងប្រៃសណីយ និងទូរគមនាគមន៍ និងជាប្រធានទទួលបន្ទុកតំបន់៤ ក៏បានរំលឹកដល់ក្រុមហ៊ុនផ្តល់សេវាទូរគមនាគមន៍ទាំងអស់ ត្រូវពង្រឹងការងារបច្ចេកទេសឡើងវិញ ចៀសវាងភាពព្រងើយកន្តើយចំពោះអតិថិជន ដែលអាចរងពិន័យអន្តរការណ៍។ ឯកឧត្តម ក៏បានបញ្ជាក់ដែរថា៖ យោងតាម“ប្រកាសស្តីពីគុណភាពសេវាទូរគមនាគមន៍” ប្រតិបត្តិករទូរគមនាគមន៍មាន រយៈពេល ១០ (ដប់) ខែ ដើម្បីកែលំអ និងពង្រឹងគុណភាពសេវាទូរគមនាគមន៍របស់ខ្លួន ក្នុងករណីប្រតិបត្តិករទូរគមនាគមន៍ណាមិនអនុវត្តន៍តាមស្តង់ដារអប្បបរមា ដែលបានកំណត់ក្នុងប្រកាសនេះទេ ប្រតិបត្តិករទូរគមនាគមន៍នោះនឹងត្រូវទទួលរងពិន័យ។
អត្ថបទ និង រូបភាព៖ លោក យូ វង្ស
កែសម្រួល៖ លោក សេង ផល្លី
