នៅរាត្រីពេញបូរមី ថ្ងៃទី១០ ខែតុលា ឆ្នាំ២០២២ ដែលជាថ្ងៃចេញព្រះវស្សា ព្រះសង្ឃ គណៈកម្មការ អាចារ្យវត្ត និងបងប្អូនប្រជាពលរដ្ឋតាមភូមិនានា ចំណុះជើងវត្តអារញ្ញសាគរ ក្នុងក្រុងសៀមរាប បានមូលមតិគ្នារៀបចំនូវពិធីដង្ហែសង្ឃឹកប្រទីបជ្វាលា ទៅកាន់ចុងទឹកក្បែរភូមិសាស្ត្របឹងទន្លេសាប បន្ទាប់ពីពិធីនេះ ត្រូវបានអាក់ខានអស់មួយរយៈមកហើយដោយសារតែវិបត្តិនៃការឆ្លងរាលដាលជំងឺកូវីដ-១៩ តែយ៉ាងណាជារៀងរាល់ឆ្នាំគណៈកម្មការ និងចៅអធិការវត្តមួយចំនួន ក្នុងក្រុងសៀមរាប នៅតែបន្តរៀបចំពិធីនេះបង្ក្រប់កិច្ចទៅតាមទំនៀម ប៉ុន្តែមិនបានរៀបពិធីដង្ហែដូចពេលនេះឡើយ។
ព្រះវិភត្តិមុនីញាណ ហ៊ាក់ គឹមហ៊ត់ ចៅអធិការវត្តអារញ្ញសាគរ មានសង្ឃដិកាថា ពិធីដង្ហែសង្ឃឹកប្រទីបជ្វាលា ត្រូវបានធ្វើជាមួយគ្នានឹងពិធីបុណ្យចេញព្រះវស្សា ដើម្បីបង្ហាញជាសញ្ញាថា រដូវវស្សាឆ្នាំនេះបានឆ្លងផុតហើយ ជាពិសេសពិធីនេះ គឺជាការសុំខមាទោសដល់ព្រះគង្គាដែលឱ្យយើងប្រើប្រាស់ជារៀងរាល់ថ្ងៃ ដើម្បីទ្រទ្រង់ជីវិតរបស់យើងគ្រប់គ្នា ក្រែងយើងធ្វើអំពើមិនគប្បីណាមួយដោយចេតនាក្តី អចេតនាក្តី ទៅលើព្រះគង្គារ ព្រះធរណី។ រួចមកព្រះសង្ឃ ក៍ធ្វើពិធីសូត្រមន្ត ចម្រើនព្រះបរិត្ត ដើម្បីឧទ្ទិសបុណ្យកុសលដល់ម្ចាស់ទឹកម្ចាស់ដី ព្រៃព្រឹក្សាផងទាំងឡាយ និងងាកមកឱ្យពរសព្វសាធុកាជ័យមង្គល ដល់ប្រជាពុទ្ឋបរិស័ទគ្រប់រូប ឱ្យជួបតែសេចក្តីសុខចំរើន។
ព្រះអង្គមានថេរដិកាទៀតថា ពិធីនេះដែរគ៏ដើម្បីបង្ហាញដល់ក្មេងៗស្រករក្រោយ ឱ្យបានដឹងបានយល់អំពីវប្បធម៌ប្រពៃណីទំនៀមទំលាប់ដែលបុព្វបុរសរបស់ខ្មែរ បានបន្សល់ទុកមក ហើយនាំគ្នាគោរព និងថែរក្សាកុំឱ្យសាបរលាប និងបាត់បង់ សម្រាប់ទុកជាកេរ្តិ៍ដំណែលតកូនចៅគ្រប់ៗជំនាន់ទៅថ្ងៃក្រោយរបស់យើង ឱ្យពួកគាត់បានស្គាល់ផង។ ពិធីដង្ហែសង្ឃឹកជ្វាលានេះ ជាពិធីនិយមធ្វើតៗគ្នាទៅតាមប្រពៃណីទំនៀមទំលាប់នៃប្រជាពលរដ្ឋនៅតំបន់ណាមួយមិនជាទូទៅទេ។ ហើយសព្វថ្ងៃប្រពៃណីនេះ នៅខេត្តសៀមរាប ស្ទើរតែបាត់បង់អស់ហើយមាននៅតែវត្តតិចតួចដែលផ្តួចផ្តើមនឹងប្រារព្ឋនាំគ្នាធ្វើតែប៉ុណ្ណោះ។
គួរឲ្យដឹងថា អង្គសង្ឃឹកនេះត្រូវបានដង្ហែយកទៅតម្កលក្បែរវត្តទឹករហូតដល់ថ្ងៃទី១៦ នឹងដង្ហែរចេញទៅទីវត្តសុវណ្ណសាគរ ដែលជាវត្តស្ថិតនៅចុងគេប៉ែកខាងក្រោម នៃក្រុងសៀមរាប។ សង្ឃឹក ជាឈ្មោះប្រដាប់មួយប្រភេទ មានជើង៤ មានដង២ មានរនាប មានជញ្ជាំងតឿជារបាំង សម្រាប់ដាក់គ្រឿងបរិក្ខារច្រើនមុខ បម្រុងនឹងប្រគេនភិក្ខុសង្ឃ ឬប្រគេនភិក្ខុតែមួយរូបក៏បាន ហើយសង្ឃឹកក៏សម្រាប់ដាក់គ្រឿងសំណែនបណ្តែតតាមខ្សែទឹក ឬសែងទៅដាក់លើគោក ដើម្បីឧទ្ទិសដល់ព្រះគង្គា ព្រះធរណី និងទេវតា អារុក្ខអារក្សអ្នកតាម្ចាស់ទឹកម្ចាស់ដី ព្រៃព្រឹក្សា ដែលថែរក្សាស្ថិតនៅតាមព្រៃភ្នំជ្រោះជ្រងជ្រលងដងអូរផងដែរ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
