យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ស្តីពីការចុះពិនិត្យផលប៉ះពាល់នៃការខូចខាតដំណាំស្រូវ និងវិធានការស្តារឡើងវិញ ក្រោយពីរងគ្រោះដោយជំនន់ទឹកភ្លៀង បានបង្ហាញថា គិតត្រឹមថ្ងៃទី១២ ខែតុលា ឆ្នាំ២០២២ ជំនន់ទឹកភ្លៀង បានធ្វើឱ្យដំណាំស្រូវ ក្នុងខេត្តរងផលប៉ះពាល់សរុបចំនួន ៣៧,៧៨៥ហិកតា នៅក្នុងស្រុកចំនួន៧ លើក្រុង ស្រុកចំនួន១២ ក្នុងខេត្ត ក្នុងនោះមានស្រុកស្រីស្នំ, ស្រុកអង្គរជុំ , ស្រុកពួក, ស្រុកវ៉ាវិន, ស្រុកជីក្រែង, ស្រុកក្រឡាញ់ និងស្រុកប្រាសាទបាគង។ ដំណាំស្រូវ ទទួលរងការខូចខាតសរុប ១៣,៨៥៥ហិកតា លើស្រុកចំនួន៦ ឃុំចំនួន ៣២ ភូមិចំនួន ២២១ និង៧,២៥២គ្រួសារ។ ជាមួយនោះ ចំពោះផលប៉ះពាល់ដោយជំនន់ទឹកទន្លេសាប លើដំណាំស្រូវមានចំនួន ២ស្រុក មាន ៩ឃុំ មានភូមិ៧២ និង២,២៤៧គ្រួសារ ស្មើនឹងផ្ទៃដី ២,២៨៩ហិកតា ក្នុងនោះ ស្រុកជីក្រែងមាន ៨ឃុំ, ៦៨ភូមិ, មាន ១,៩៦១គ្រួសារ ស្មើនឹងផ្ទៃដី ១,៩៥៩ហិកតា និងស្រុកពួក ១ឃុំ, មាន៤ភូមិ និង២៨៦គ្រួសារ ស្មើនឹងផ្ទៃដីចំនួន ៣៣០ហិកតា។
ដំណាំដំឡូងមី រងផលប៉ះពាល់លើផ្ទៃដីសរុបចំនួន ៧,៣៥១ហិកតា, មាន ២ស្រុក, ចំនួន ៨ឃុំ, ៥៦ភូមិ និងមាន ៤,៦៥៣គ្រួសាររងគ្រោះ។ ដំណាំដំឡូងមីទទួលរងការខូចខាតសរុប ៣,១២០ហិកតា លើស្រុកចំនួន២ មានឃុំចំនួន ៨, ភូមិចំនួន ៥៦ និង៤,០៤២គ្រួសារ។ ចំពោះសត្វចិញ្ចឹម នៅស្រុកវ៉ារិនមានសត្វគោងាប់ចំនួន ១ក្បាល និងបក្សីចំនួន ៦៧៦ក្បាល។
តាមការប៉ាន់ស្មានផ្ទៃដីអាចស្តារឡើងវិញមានចំនួនសរុប ៣,៧៧៤ហិកតាស្មើតម្រូវការពូជចំនួន ៣៧៧,៤តោន ក្នុងនោះស្រុកស្រីស្នំ ១,៥៧៥ហិកតា ស្រុកពួក ២៥៣ហិកតា និងស្រុកក្រឡាញ់ ១,៨៩៤ហិកតា ស្រុកជីក្រែង ៥២ហិកតា៕
ព័ត៌មានជាតិ ថ្មីៗ
អត្ថបទ និងរូបភាព: លោកឃុត សៅ កែសម្រួលដោយ លីវ សុខុន!!!
