នៅព្រឹកថ្ងៃទី១៤ ខែតុលា ឆ្នាំ២០២២ មន្ទីរផែនការខេត្តសៀមរាប សហការជាមួយរដ្ឋបាលស្រុកប្រាសាទបាគង បានរៀបចំសិក្ខាសាលា សមាហរណកម្ម កម្មវិធីវិនិយោគបីឆ្នាំរំកិលស្រុក ឃុំ ២០២៣-២០២៥ នៅថ្នាក់ស្រុកឆ្នាំ២០២២ ស្ថិតនៅសាលាស្រុកប្រាសាទបាគង ខេត្តសៀមរាប ក្នុងគោលបំណង បន្ស៊ីការរៀបចំផែនការអភិវឌ្ឍនៅថ្នាក់ស្រុក និងឃុំឱ្យមានភាពរលូន ដើម្បីឆ្លើយតបទៅតាមតម្រូវការអាទិភាពរបស់មូលដ្ឋាន និងចូលរួមកាត់បន្ថយភាពក្រីក្ររបស់ប្រជាពលរដ្ឋប្រកបដោយប្រសិទ្ធភាព។
លោក ប្រាក់ សុឃី អនុប្រធានមន្ទីរផែនការខេត្តសៀមរាប បញ្ជាក់ថា សិក្ខាសាលាដែលបានរៀបចំនៅពេលនេះ នឹងបន្តធ្វើតាមបណ្ដាក្រុង ស្រុកទាំង១២ ក្នុងខេត្ត ដើម្បីពង្រឹងសមត្ថភាពរបស់មន្ត្រីនៅតាមមូលដ្ឋាន ក៏ដូចជាបង្កើននូវទំនាក់ទំនងល្អរវាងរដ្ឋអំណាចមូលដ្ឋាន និងអង្គការដៃគូ តាមរយៈការពិភាក្សា និងស្វែងយល់ពីគម្រោងទាំងអស់របស់ឃុំនីមួយៗ។
តាមការសង្កេតនាពេលកន្លងមក លោកអនុប្រធានមន្ទីរ លើកបង្ហាញថា ការលើគម្រោងនៅថ្នាក់ឃុំនាពេលបច្ចុប្បន្នមានភាពល្អប្រសើរ ដោយសារមានអង្គការដៃគូជាច្រើនបានចូលរួមក្នុងគម្រោងទាំងនោះ ទន្ទឹមនោះមន្ត្រីឃុំមានការយកចិត្តទុកដាក់ជាមួយសកម្មភាពជួបប្រជុំរបស់អង្គការ និងរក្សាសន្តិសុខបានល្អ។ ប៉ុន្តែលោក ក៏បានបញ្ជាក់ដែរថា ក្រោយវិបត្តិកូវីដ-១៩ អង្គការដៃគូ ដែលចូលរួមអភិវឌ្ឍនៅមូលដ្ឋានមានការថយចុះ ដោយសារអង្គការទាំងនោះខ្វះខាតថវិកាគាំទ្រនៅតាមឃុំគោលដៅរបស់ពួកគេ។
តំណាងឱ្យរដ្ឋបាលស្រុកប្រាសាទបាគង លោក នឹម សុវណ្ណ អភិបាលរងស្រុកប្រាសាទបាគង លើកឡើងថា ចំពោះគម្រោងដែលបានលើកស្នើមកនេះ ពិតជាមានការចាំបាច់ណាស់ ដែលរាជរដ្ឋាភិបាលពុំអាចតែម្ខាង មិនអាចឆ្លើយតបបានទាំងស្រុងនោះឡើយ។ ក្នុងនោះទាមទារដល់ អង្គការក្រៅរដ្ឋាភិបាល វិស័យឯកជន និងសប្បុរសជននានា ចូលរួមឧបត្ថម្ភគាំទ្រ។ លោក បានបញ្ជាក់ថា ចំពោះគម្រោងដែលបានដាក់បង្ហាញទាំងអស់នេះ តំណាងមន្ទីរ អង្គការដៃគូអភិវឌ្ឍអាចគាំទ្រនៅពេលនេះតែម្ដង ឬអាចយកទៅពិនិត្យនៅក្រោយបញ្ចប់សិក្ខាសាលានេះក៏បាន។
គួរជម្រាបថា សិក្ខាសាលា សមាហរណកម្ម កម្មវិធីវិនិយោគបីឆ្នាំរំកិលស្រុក ឃុំ ២០២៣-២០២៥ នៅថ្នាក់ស្រុកឆ្នាំ២០២២នេះ ដឹកនាំដោយលោក ទៀ ប៊ុនឈួយ ប្រធានក្រុមប្រឹក្សាស្រុកប្រាសាទបាគង និងមានអ្នកចូលរួមសរុបចំនួន ៩២រូប ក្នុងនោះអង្គការដៃគូចំនួន ១១អង្គភាព។
អត្ថបទ និងរូបភាព៖ លោក សេង ផល្លី
