ប្រជាពលរដ្ឋជាច្រើនកុះករ បានសម្ដែងការសប្បាយរីករាយក្នុងពិធីប្រណាំងទូកបណ្ដែតប្រទីប នៅក្នុងសង្កាត់សៀមរាប ក្រុងសៀមរាប ដែលបានរៀបចំឡើងដោយ ព្រះសង្ឃវត្ដអារញ្ញសាគរ និងអាជ្ញាធរមូលដ្ឋាន ដើម្បីអបអរសាទរថ្ងៃចេញព្រះវស្សា និងដើម្បីរក្សាប្រពៃណីទំនៀមទម្លាប់របស់អ្នកភូមិដែលមានតាំងពីយូរលង់។
ពួកគាត់បានលើកឡើងថា ពិធីប្រណាំងទូកបែបលក្ខណៈប្រពៃណីខ្នាតតូច បន្ទាប់ពីខកខានរយៈពេល ២ឆ្នាំកន្លងមកនេះ បានធ្វើឱ្យប្រជាពលរដ្ឋទៅទស្សនាច្រើន ជាពិសេសពួកគាត់នៅមូលដ្ឋាន មានប្រាក់ចំណូលក្នុងគ្រួសារពីការបង្កើតការលក់ដូរនៅក្នុងពិធី។ ចំពោះការបង្កើតកម្មវិធីសប្បាយៗនេះបង្ហាញថា ប្រទេសកម្ពុជាបានរួចផុតការឆ្លងជំងឺកូវីដ-១៩ហើយ ព្រោះអ្នកដើរកំសាន្ដមិនសូវមានការពាក់ម៉ាស់នោះទេ ជាពិសេសពិធីអុំទូកនេះបានបង្ហាញថា កម្ពុជាមានការអភិវឌ្ឍន៍ខ្លាំងទើបបង្កើតការសប្បាយដល់ប្រជាពលរដ្ឋ និងរំលឹកឡើងវិញនៃពិធីបុណ្យអុំទូកនាថ្ងៃចេញព្រះវស្សា។
ពួកគាត់បន្ថែមថា ពិធីប្រពៃណីនេះ មិនត្រឹមតែផ្ដល់សេដ្ឋកិច្ចដល់អ្នកភូមិនោះទេ វាជាការទាក់ទាញអ្នកទេសចរទៅកំសាន្ដនៅបឹងទន្លេសាប និងរក្សានូវទំនៀមទម្លាប់ប្រពៃណីខ្មែរដល់កូនចៅជំនាន់ក្រោយផងដែរ។ ប្រជាពលរដ្ឋចង់ឱ្យអាជ្ញាធរបង្កើតពិធីបែបប្រពៃណីនេះឱ្យបានច្រើន ដើម្បីឱ្យយុវជន ក៍ដូចប្រជាពលរដ្ឋចូលរួមថែរក្សាវប្បធម៌ប្រពៃណីរបស់ខ្មែរនេះ។
បើតាមលោក ម៉ៃ សាមេត ចៅសង្កាត់សៀមរាប បានបង្ហាញនូវក្តីសោមនស្សដែលបានសហការរៀបចំកម្មវិធីនេះឡើង បន្ទាប់ពីត្រូវអាក់ខាន ដោយសារការឆ្លងរាលដាលនៃជំងឺកូវីដ-១៩។ លោកថា ដោយសារការយកចិត្តទុកដាក់ និងការលះបង់ខ្ពស់របស់ប្រមុខថ្នាក់ដឹកនាំរាជរដ្ឋាភិបាល ទើបយើងទាំងអស់គ្នាមានឱកាសជួបជុំនិងប្រាព្ឋពិធីផ្សេងៗ ឡើងវិញក្រោមម្លប់សុខសន្តិភាពតែមួយ។ ពិធីប្រណាំងទូកលក្ខណៈប្រពៃណីនេះមានរយៈពេល ២ថ្ងៃ និងពិធីបណ្ដែតប្រទីបមួយថ្ងៃ ចាប់ពីថ្ងៃទី១១ ដល់ថ្ងៃទី១៣ ខែតុលា ឆ្នាំ២០២២។ ពិធីអុំទូក និងបណ្ដែតប្រទីបនេះ មានទូកសរុបចំនួន ៣០ទូក ក្នុងនោះទូកង ចំណុះ ២២នាក់ ចំនួន៤ ជាទូកកិត្តិយសទូកប្រណាំងដណ្តើមជ័យលាភី ២៦ទូក មួយទូកៗចំណុះ ៦នាក់ ចំណាត់ថ្នាក់ជ័យលាភីនឹងជ្រើសយកពីលេខ១ ដល់លេខ៤៕
អត្ថបទ និង រូបភាព៖ លោក បូ សាវី
