កាលពីល្ងាចថ្ងៃទី១៦ ខែតុលា ឆ្នាំ២០២២ម្សិលមិញនេះ សមត្ថកិច្ចនៃប្រទេសកម្ពុជា បានរំដោះជនបរទេសចំនួន ៧៥នាក់ ចេញពីកាស៊ីណូមួយកន្លែងស្ថិតក្នុងខេត្ដឧត្ដរមានជ័យ ដែលតាមការប៉ាន់ស្មានបឋម ពួកគេអាចត្រូវបានជួញដូរមកពីក្រៅប្រទេស ក្រោមរូបភាពផ្ដល់ប្រាក់កម្រៃការងារខ្ពស់នៅកម្ពុជា។
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ដ្រៃយ៍គណៈកម្មាធិការជាតិប្រយុទ្ធប្រឆាំងអំពើរជួញដូរមនុស្ស បង្ហាញថា ជនបរទេសទាំងនោះមកពីប្រទេសវៀតណាម ចិន ឥណ្ឌា ម៉ាឡេស៊ី ឥណ្ឌូនេស៊ី និងបានទៅធ្វើការនៅកាស៊ីណូអូរស្មាច់ ក្នុងទឹកដីប្រទេសកម្ពុជា។
លោកជំទាវរដ្ឋលេខាធិការ បន្ថែមថា ជនរងគ្រោះទាំងអស់ ត្រូវបានដឹកជញ្ជូនទៅឱ្យស្នាក់នៅបណ្ដោះអាសន្ននៅខេត្ដសៀមរាប ដែលមានលោកស្រី យូ សុភា តំណាងរដ្ឋបាលខេត្តសៀមរាប និងបន្តអនុវត្ដនីតិវិធី ជាមួយអ្នកជំនាញស៊ើបអង្កេតរកជនល្មើស ដែលបាននាំជនរងគ្រោះទាំងនោះ។
លោកជំទាវ បញ្ជាក់ថា ប្រតិបត្ដិការណ៍ចុះរំដោះនេះ កើតឡើងក្រោយជនរងគ្រោះបានដាក់ពាក្យបណ្ដឹង តាមរយៈប្រព័ន្ធបណ្ដាញសង្គមសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។ ក្នងប្រតិបត្តិការនេះដែរ បានបង្ហាញថា កម្ពុជាមិនមែនជាទីកន្លែងជួញដូរមនុស្ស និងមិនអត់ឱនដល់់សកម្មភាពជួញដូរមនុស្សជាដាច់ខាត។
គួរបញ្ជាក់ថា ជនរងគ្រោះ ជាជនបរទេសទាំង ៧៥នាក់នោះ រួមមានជនជាតិវៀតណាម៥២នាក់ ឥណ្ឌា៦នាក់ ឥណ្ឌូណេស៊ី៦នាក់ ម៉ាឡេស៊ី៤នាក់ និងជនជាតិចិន៧នាក់ ៕
អត្ថបទ និង រូបភាព៖ លោក បូ សាវី
កែសម្រួល៖ លោក សេង ផល្លី
