យោងតាមស្ថិតិរបស់អង្គការអន្តរជាតិផ្នែកការងារ សហគ្រាសធុនតូច និងមធ្យម (SMEs) មានភាគច្រើនបំផុតនៅលើពិភពលោក ជាមួយនោះសម្រាប់តំបន់អាស៊ានសហគ្រាសធុនតូច និងមធ្យមយ៉ាងហោចណាស់ ៩៧ភាគរយ នៃសហគ្រាសសរុបក្នុងតំបន់ បានប្រើប្រាស់កម្លាំងពលកម្មប្រមាណពី ៦០ភាគរយ ដល់៨០ភាគរយ នៃកម្លាំងពលកម្មសរុបក្នុងតំបន់ផងដែរ។
នេះបើតាមប្រសាសន៍របស់ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងពិធីបើកសិក្ខាសាលា ការចងក្រងឯកសារនៃឧត្តមានុវត្តន៍ ស្តីពី សុវត្ថិភាព និងសុខភាពការងារក្នុងសហគ្រាសធុនតូច និងមធ្យម និងសេដ្ឋកិច្ចក្រៅប្រព័ន្ធក្នុងចំណោមរដ្ឋជាសមាជិកអាស៊ាន នៅថ្ងៃទី១៧ ខែតុលា ឆ្នាំ២០២២ ក្នុងខេត្តសៀមរាប។
ទន្ទឹមនឹងនេះ ឯកឧត្តមរដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រែងរួមគ្នា ជាមួយដៃគូទាំងអស់ ដែលបានចូលរួមយ៉ាងសកម្មក្នុងការធ្វើឱ្យប្រសើរឡើងនូវសុវត្ថិភាព និងសុខភាពការងារនៅកន្លែងធ្វើការ ជាពិសេសការជំរុញ ការអនុវត្តផែនការសកម្មភាពការងាររបស់បណ្តាញសុវត្ថិភាព និងសុខភាពការងារអាស៊ាន ឆ្នាំ២០២១-២០២៥ ដែលស្ថិតនៅក្នុងសកម្មភាពអាទិភាពទី៣ នៃកម្មវិធីការងាររបស់រដ្ឋមន្ត្រីខាងការងារអាស៊ាន និងសកម្មភាពទី២ នៃ “ស្តង់ដាសុវត្ថិភាព និងសុខភាពការងារ និងការអនុវត្តល្អប្រសើរ” នៃសកម្មភាពការងាររបស់អាស៊ាន អូស្ហណេត។
ប៉ុន្តែសង្កេតកន្លងមក ឯកឧត្តមរដ្ឋមន្ត្រី បានលើកឡើងថា រាជរដ្ឋាភិបាល ក៏ដូចជាដៃគូសង្គមនានា បានជួបប្រទះនូវបញ្ហាប្រឈមសំខាន់ៗមួយចំនួនក្នុងការផ្តល់សេវា និងការធានាអនុលោមភាពតាមបទបញ្ញត្តិផ្សេងៗទាក់ទងនឹងសុវត្ថិភាព និងសុខភាពការងាររបស់កម្មករ ដែលនេះបណ្តាលមកពីកត្តាផ្សេងៗ ដូចជា៖ ការមិនស្ថិតនៅក្នុងប្រព័ន្ធការងារសេដ្ឋកិច្ចក្នុងប្រព័ន្ធ (Formal Economy) និងកង្វះខាតការយល់ដឹងផ្នែកសុវត្ថិភាពការងារនៅកន្លែងធ្វើការជាដើម។ កត្តាទាំងនេះ បានធ្វើឱ្យលក្ខខណ្ឌសុវត្ថិភាព និងសុខភាពការងាររបស់កម្មករនិយោជិតនៅតាមបណ្តាសហគ្រាសទាំងនេះនៅមានលក្ខណៈមិនគ្រប់ជ្រុងជ្រោយនៅឡើយ។
ឯកឧត្តមរដ្ឋមន្ត្រី បញ្ជាក់ថា សេដ្ឋកិច្ចក្នុងប្រព័ន្ធ និងសេដ្ឋកិច្ចក្រៅប្រព័ន្ធ បានដើរតួនាទីសំខាន់ក្នុងការជំរុញកំណើនសេដ្ឋកិច្ចជាតិ ដែលធ្វើឱ្យសេដ្ឋកិច្ចកាន់តែមានភាពធន់ខ្ពស់ចំពោះផលប៉ះពាល់ ពីកត្តាខាងក្រៅ។ បច្ចុប្បន្ន រាជរដ្ឋាភិបាលកម្ពុជា កំពុងផ្តោតការយកចិត្តទុកដាក់ខ្ពស់ ដោយបានខិតខំអនុវត្តន៍ គោលនយោបាយសម្រាប់សហគ្រាសធុនតូច និងមធ្យម និងកម្មករនិយោជិតនៃសេដ្ឋកិច្ចក្រៅប្រព័ន្ធ រួមមាន៖ ទី១- លើកកម្ពស់តួនាទី កិត្តិយស និងសេចក្តីថ្លៃថ្នូររបស់សហគ្រិន និងកម្មករនិយោជិតនៃសេដ្ឋកិច្ចក្រៅប្រព័ន្ធ ដែលជាកម្លាំងចលករដ៏សំខាន់ក្នុងការអភិវឌ្ឍសេដ្ឋកិច្ច និងមានគំនិតច្នៃប្រឌិតសហគ្រិនភាព បង្កើតមុខរបរការងារធ្វើ ដោះស្រាយបាននូវជីវភាពគ្រួសារ រួមចំណែកក្នុងការពង្រឹងស្ថិរភាពសេដ្ឋកិច្ចសង្គម និងការកាត់បន្ថយភាពក្រីក្រ។ ទី២- លើកទឹកចិត្ត និងផ្តល់កិច្ចគាំពារនានា ដូចជាការផ្តល់បណ្ណមូលនិធិសមធម៌សុខាភិបាល ការបណ្តុះបណ្តាលជំនាញវិជ្ជាជីវៈ ការទទួលស្គាល់សមត្ថភាពជំនាញតាមប្រព័ន្ធតេស្តសមត្ថភាព ការជួយរកការងារឱ្យធ្វើ ឬការបង្កើតមុខរបរ ការចូលរួមក្នុងរបបប្រាក់សោធននិវត្តន៍ និងការទទួលបានប្រាក់ឧបត្ថម្ភសម្រាប់ស្ត្រីនៅពេលសម្រាលកូន។ ទី៣-ជួយគាំទ្រដល់ការអភិវឌ្ឍមុខរបរ និងការងារ តាមរយៈគោលនយោបាយពន្ធដារ ការចុះបញ្ជី ដើម្បីទទួលបាននូវអត្ថប្រយោជន៍ផ្សេងៗ ស្របតាមច្បាប់។ ទី៤- ជួយសម្រួលដល់បរិយាកាសនៃការធ្វើអាជីវកម្ម ការប្រកបរបររកស៊ីរបស់សហគ្រិន និងកម្មករ និយោជិតនៃសេដ្ឋកិច្ចក្រៅប្រព័ន្ធ។ និងទី៥- លើកទឹកចិត្តការចូលរួមសកម្មភាពសង្គម សកម្មភាពមនុស្សធម៌។
ឯកឧត្តមបណ្ឌិត អ៉ិត សំហេង សង្ឃឹមថាអង្គសិក្ខាសាលាដែលមានរយៈពីរថ្ងៃនេះ (ចាប់ពីថ្ងៃទី១៧-១៨ ខែតុលា ឆ្នាំ២០២២) នឹងរួមគ្នាចែករំលែក និងផ្លាស់ប្តូរបទពិសោធន៍ ព្រមទាំងវិធីសាស្រ្តថ្មីៗយ៉ាងផុលផុស ដើម្បីលើកកម្ពស់លក្ខខណ្ឌការងារនៅក្នុងសហគ្រាសធុនតូច និងមធ្យម និងផ្នែកសេដ្ឋកិច្ចក្រៅប្រព័ន្ធក្នុងតំបន់អាស៊ាន និងប្រទេសដៃគូអាស៊ាន។ ការកំណត់បាននូវឧត្តមានុវត្តន៍ និងវិធីសាស្រ្តផ្នែកសុវត្ថិភាព និងសុខភាពការងារ គឺមានសារៈសំខាន់យ៉ាងខ្លាំង ដើម្បីផ្តល់ធាតុចូលបន្ថែមទៀត ក្នុងការចងក្រងជាឯកសារ និងការបង្ហាញឱ្យឃើញអំពីការអនុវត្តល្អៗ ផ្នែកសុវត្ថិភាព និង សុខភាពការងារនៅក្នុងតំបន់អាស៊ាន ព្រមទាំងជាកាលានុវត្តភាព សម្រាប់សហគ្រាសធុនតូច និងមធ្យម និងផ្នែកសេដ្ឋកិច្ចក្រៅប្រព័ន្ធក្នុងតំបន់អាស៊ាន ដើម្បីយកទៅអនុវត្ត ផងដែរ៕
អត្ថបទ និង រូបភាព៖ លោក យូ វង្ស និងលោក បូ សាវី
កែសម្រួល៖ លោក សេង ផល្លី
