នៅព្រឹកថ្ងៃទី១៤ ខែតុលា ឆ្នាំ២០២២ ក្រុមការងាររាជរដ្ឋាភិបាលចុះជួយមូលដ្ឋានស្រុកសូទ្រនិគម ខេត្តសៀមរាប បានបើកវេទិការសាធារណៈ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៤ ស្ថិតក្នុងបរិវេនវត្តប្រាសាទបន្ទាយស្រី ក្នុងឃុំដំដែក ស្រុកសូទ្រនិគម ធ្វើក្រោមអធិបតីភាព ឯកឧត្តម ឯក វណ្ណឌី ប្រធានក្រុមការងាររាជរដ្ឋាភិបាលចុះជួយមូលដ្ឋានស្រុកសូទ្រនិគម លោកអភិបាលស្រុកសូទ្រនិគម រួមនឹងលោកលោកស្រីតំណាងមន្ទីរអង្គភាពស្ថាប័នពាក់ព័ន្ធ អាជ្ញាធរមូលដ្ឋានជាច្រើនរូប។
វេទិកានាពេលនេះដែរក៏មានការចូលរួមពីបងប្អូនប្រជាពលរដ្ឋជាង ៥៣០នាក់ មកពីឃុំចំនួន១០ ក្នុងស្រុកសូទ្រនិគម វេទិកានេះដែរក្នុងគោលបំណង ផ្ដល់ឱកាសជូនដល់ប្រជាពលរដ្ឋ លើកឡើងនូវបញ្ហា ក៏ដូចជាសំណួរសំណូមពរផ្សេងៗ មកកាន់អ្នកពាក់ព័ន្ធ ដើម្បីធ្វើការដោះស្រាយ។ ក្នុងនោះវេទិកាទាំងមូលបានទទួលនូវសំណួរសំណូមពរផ្ទាល់មាត់ចំនួន៨ និងជាលាយល័ក្ខអក្សរចំនួន១៩ ពាក់ព័ន្ធទៅនឹងបញ្ហារផ្លូវ អគ្គីសនី សៀវភៅគ្រួសារ អត្តសញ្ញាណប័ណ្ណ វ៉ាក់សាំងសត្វពាហនៈ និងបញ្ហាតម្លៃផលិតផល់ តម្លៃថ្នាំកសិកម្ម។ ក្នុងនោះមន្ត្រីជំនាញបានទទួល នឹងបានធ្វើការបកស្រាយ និងឆ្លើយតប បានចំនួន ២៥សំណួរសំណូមពរ ហើយនៅសល់ចំនួន២ នឹងធ្វើការបញ្ជូនទៅកាន់មន្ទីរអង្គភាពជំនាញដើម្បីរកដំណោះស្រាយបន្ត។
ឯកឧត្តម ឯក វណ្ណឌី បានមានប្រសាសន៍ថា វេទិកាផ្សព្វផ្សាយសាធារណៈរបស់រាជរដ្ឋាភិបាលនាពេលនេះ ពិតជាមានសារះសំខាន់ខ្លាំងណាស់ ដើម្បីផ្ដល់ឱកាសជូនដល់ប្រជាពលរដ្ឋ លើកឡើងនូវបញ្ហា ក៏ដូចជាសំណួរសំណូមពរផ្សេងៗមកកាន់មន្ទីរអង្គភាពជំនាញ និងអាជ្ញាធរមូលដ្ឋាន ដើម្បីធ្វើការដោះស្រាយ។ ជាក់ស្ដែងសំណួរ-សំណូមពរ ដែរប្រជាពលរដ្ឋបានលើកឡើងមន្ទីរ អង្គភាពជំនាញ បានធ្វើការឆ្លើយតប និងរកដំណោះស្រាយភ្លាមៗ ហើយចំពោះសំណួរ-សំណូមពរនៅសល់អំពីការស្នើរសុំផ្លូវពីរខ្សែ ដោយមួយខ្សែរមានប្រវែង ១៥គីឡូម៉ែត្រ និងមួយខ្សែរទៀត ៦គីឡូម៉ែត្រ ដែរនេះហួសសមត្ថភាពរបស់រដ្ឋបាលស្រុក តែឯកឧត្តមបានជំរុញ អោយប្រជាពលរដ្ឋលើកឡើងនូវសំណួរ-សំណូមពរ តាមរយះការធ្វើជាលិខិតស្នាមមកកាន់រដ្ឋបាលស្រុក បញ្ជូនទៅថ្នាក់លើដើម្បីរកដំណោះស្រាយ៕
អត្ថបទ និង រូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
