ថ្ងៃទី១៤ ខែតុលា ឆ្នាំ២០២២នេះ លោក ពិន ប្រាកដ អភិបាលរងខេត្តតំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយ ឯកឧត្តម លន់ សុធី ប្រធានក្រុមការងារថ្នាក់កណ្តាលចុះមូលដ្ឋានស្រុកស្រីស្នំ និង លោក ទា គឹមសុទ្ឋ ប្រធានមន្ទីរកសិកម្មរុក្ខាប្រមាញ់និងនេសាទខេត្ត តាមរយៈគម្រោងថវិកាកម្មវិធី មន្ទីរកសិកម្មខេត្ត បាននាំយកគ្រាប់ស្រូវពូជចំនួន៤តោន ផ្តល់ជូនដល់ប្រជាកសិករចំនួន៥០គ្រួសារ ក្នុងស្រុកស្រីស្នំ ដែលបានរងផលប៉ះពាល់ធ្ងន់ធ្ងរជាងគេ ដោយសារជំនន់ទឹកភ្លៀងកាលពីកន្លងទៅនេះ ។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់និងនេសាទខេត្ត បានឲ្យដឹងថា ស្រុកស្រីស្នំជាស្រុកទទួលរងផលប៉ះពាល់ធ្ងន់ធ្ងរជាងគេ ក្នុងចំណោមស្រុកចំនួន៧ដែលទទួលរងគ្រោះដោយសារទឹកជំនន់ទឹកភ្លៀងឆ្នាំ២០២២នេះ ដែលខូចខាតសរុបចំនួនជាង៨ពាន់ហិកតា ប៉ុន្តែក្នុងឱកាសនេះ សុំការអាធ្យាស្រយ ពីប្រជាកសិករ ដែលរងគ្រោះដោយទឹកជំនន់ទាំងអស់ ដោយសារការចែកជូនពូជស្រូវនេះ គឺធ្វើទៅតាមជំហានៗ ហើយជំហានដំបូង គឺចែកជូន ដល់ប្រជាកសិករដែល ជួបការលំបាកនិងរងគ្រោះខ្លាំងមុនគេ ដើម្បីឲ្យពួកគាត់ អាចស្ដារឡើងវិញ ឲ្យបានឆាប់រហ័ស ហើយនៅពេលឆាប់ៗខាងមុខនេះ បងប្អូនដែលមិនទាន់ទទួលបានគ្រាប់ស្រូវពូជ ក៍នឹងទទួលបានពីគណៈកម្មាធិការគ្រប់គ្រងប្រព័ន្ឋស្បៀងបំរុងកម្ពុជា ។
ព័ត៌មានជាតិ ថ្មីៗ
លោក ពិន ប្រាកដ អភិបាលរងខេត្ត មានប្រសាសន៍ថា៖ ក្រោយពីជំនន់ទឹកភ្លៀងត្រូវបានថមថយទៅវិញ និង ដោយមានការយកចិត្តទុកដាក់ខ្ពស់ពីសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំដល់ក្រសួង ស្ថាប័ន គណៈកម្មាធិជាតិគ្រប់គ្រងគ្រោះមហន្តរាយ គណៈកម្មាធិការគ្រប់គ្រងគ្រោះមហន្តរាយខេត្ត ស្រុក ឃុំ និងសប្បុរសជននានា បានធ្វើការចែកជូននូវស្បៀងបរិភោគ និងគ្រឿងឧបភោគ ជូនដល់បងប្អូនប្រជាពលរដ្ឋ ដែលទទួលនូវផលប៉ះពាល់ និងខូចខាត បានមួយចំនួនរួចមកហើយកន្លងមកនេះ។
លោក ពិន ប្រាកដ បន្តថា សម្រាប់គ្រាប់ពូជស្រូវនេះ ទោះបីជាពុំបានគ្រប់គ្រាន់តាមតម្រូវការរបស់បងប្អូន និងក្រុមគ្រួសារក៏ពិតមែន តែនេះជាការចូលរួមចំណែកជួយសម្រាលទុក្ខជីវភាពរបស់បងប្អូនបានមួយកម្រិតផងដែរ ដើម្បីយកទៅបង្កបង្កើនផល ពោលគឺសំដៅទៅលើការគិតគូអំពីដំណាំស្រូវ ដែលត្រូវរងការបំផ្លិចបំផ្លាញនោះ ព្រោះថា ដំណាំស្រូវ គឺជាដង្ហើមសេដ្ឋកិច្ចនៃគ្រួសារកសិករ និងជាខ្នងបង្អែកដ៏មានអទិភាពលើវិស័យសេដ្ឋកិច្ចជាតិផងដែរ ដូច្នេះហើយរដ្ឋបាលខេត្តនិងមន្ទីរកសិកម្មខេត្ត ចាត់សកម្មភាពបន្ទាន់ ផ្តល់គ្រាប់ស្រូវពូជដើម្បីឱ្យគ្រួសារកសិកររងផលប៉ះពាលធ្ងន់ធ្ងរជាងគេធ្វើការសាបព្រួសស្តារឡើងវិញឱ្យទាន់រដូវ។
ឯកឧត្តម លន់ សុធី ប្រធានក្រុមការងារថ្នាក់កណ្តាលចុះមូលដ្ឋានស្រុកស្រីស្នំខេត្តសៀមរាប មានប្រសាសន៍ថា៖រាជរដ្ឋាភិបាល តែងតែគិតគូរ យកចិត្តទុកដាក់ ចំពោះប្រជាពលរដ្ឋទាំងអស់ ពិសេសប្រជាកសិករ ដែលបានរងគ្រោះដោយទឹកជំនន់ ក៏ដូចជាគ្រោះថ្នាក់ ដែលបង្កឡើងដោយធម្មជាតិនិងឧបត្តិហេតុផ្សេងៗ ដើម្បីជួយសម្រាលទុក្ខ ក៏ដូចជាការជួយស្ដារឡើងវិញ នៃជីវភាពរស់នៅ ឱ្យមានភាពល្អប្រសើរ ឡើងវិញ ដូច្នេះ ពេលដែលទទួលបានគ្រាប់ពូជនេះហើយ សូមប្រញាប់ប្រញាល់យកទៅសាបព្រោះឲ្យបានទាន់ពេលវេលា ។
សូមជំរាបថា៖នៅរដូវវស្សាឆ្នាំ២០២២នេះ ខេត្តសៀមរាបជួបប្រទះនូវ ទឹកជំនន់ទឹកភ្លៀង បណ្តាលឱ្យប៉ះពាល់ដល់ស្រុក ចំនួន ០៩ស្រុក រួមមាន ៖ ស្រុកស្រីស្នំ ស្រុកក្រឡាញ់ ស្រុកជីក្រែង ស្រុកអង្គរជុំ ស្រុកវ៉ារិន ស្រុកពួក ស្រុកសូទ្រនិគម ស្រុកប្រាសាទបាគង និងស្រុកអង្គរធំ ហើយប៉ះពាល់ដល់ប្រជាពលរដ្ឋចំនួន ៣៥ ៥៦៣គ្រួសារ ភូមិចំនួន ៣២៥ភូមិ ឃុំចំនួន៦៣ ក្នុងនោះស្រុកស្រីស្នំបានប៉ះពាល់ដំណាំស្រូវ ចំនួន ១៦ ៨២១ហិកតា ខូចខាតផ្ទៃដីចំនួន ៨០៩៤ហិកតា និងផ្ទៃដីអាចស្តារឡើងវិញ ចំនួន ១ ៥៧៥ហិកតា និងប៉ះពាល់ដំណាំឧស្សាហកម្ម ផ្ទៃដីចំនួន ៣៥០២ហិកតា ខូចខាតផ្ទៃដីចំនួន ២១៤៧ហិកតា និងផ្ទៃដីអាចស្តារឡើងវិញ ចំនួន ២១៤៧ហិកតា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
