អគារសិក្សា១ខ្នង ស្ថិតក្នុងអនុវិទ្យាល័យធ្លក ក្នុងឃុំត្រាំសសរ ស្រុកស្រីស្នំ ខេត្តសៀមរាប ត្រូវបានដាក់សម្ពោធឱ្យប្រើប្រាស់ជាផ្លូវការហើយ ក្រោមអធិបតីភាពលោកស្រី យូ សុភា អភិបាលបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប។
អគារសិក្សា មាន៤បន្ទប់នេះសាងសង់ក្រោមជំនួយឧបត្ថម្ភរបស់អង្គការសម្រេចសុបិនកុមារកម្ពុជា ក្នុងទំហំទឹកប្រាក់ ៤៩,០០០ ដុល្លារ និងចូលរួមថវិកាពីសហគមន៍ក្នុងមូលដ្ឋាន ៨,៩០០,០០០រៀល។
លោក ម៉ាក ថូម៉ាស់ ជេននី សហស្ថាបនិរបស់សមាគមសម្រេចសុបិនកម្ពុជា លើកឡើងថា លោកតែងតែមានក្ដីស្រមៃ និងចង់ឃើញកុមារកម្ពុជាបានចូលរៀនគ្រប់ៗគ្នា ដូចនៅប្រទេសរបស់លោក ដោយសារការអបរំពិតជាមានសារសំខាន់ណាស់ សម្រាប់អនាគតពួកគេ និងប្រទេសជាតិ។ គិតមកដល់បច្ចុប្បន្ន អង្គការរបស់លោក បានសាងសង់អគារសិក្សាជិត២០០អគារ នៅតាមសាលារៀនក្នុងប្រទេសកម្ពុជា ដោយឡែកអង្គការរបស់លោក ក៏បានសាងសង់អគារសិក្សាចំនួន ៤០០អគារ នៅតាមប្រទេសគោលដៅចំនួនបីទៀតរួមមានប្រទេសភូមា ឡាវ និងថៃ ផងដែរ។
លោកស្រី យូ សុភា លើកឡើងថា ការអភិវឌ្ឍធនធានមនុស្សប្រកបដោយគុណភាព សមត្ថភាព និងគុណធម៌ គឺជាកត្តាគន្លឹះ សម្រាប់ទ្រទ្រង់ កំណើនសេដ្ឋកិច្ច និង ភាពប្រកួតប្រជែងរបស់ប្រទេស ជាពិសេសនៅពេលដែលកម្ពុជាឈានចូលទៅជាប្រទេស មានចំណូលមធ្យមកម្រិតទាបក្នុងពេលដ៏ខ្លីខាងមុខ ហើយបន្តទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសអភិវឌ្ឍនៅឆ្នាំ២០៥០ តាមចក្ខុវិស័យវែងឆ្ងាយរបស់រាជរដ្ឋាភិបាលកម្ពុជា។
លោកស្រី អភិបាលរងខេត្ត ក៏បានថ្លែងអំណរអរគុណ និងកោតសរសើរ ចំពោះអង្គការសម្រេចសុបិនកុមារកម្ពុជា ដែលបានផ្តល់នូវ សមិទ្ធផលដ៏សំខាន់ និងមានតំលៃដ៏វិសេសវិសាល ក្នុងការរួមចំណែកយ៉ាងថ្លៃថ្លាដល់ការស្តារ និងអភិវឌ្ឍន៍វិស័យអបរំនៅកម្ពុជា។
គួរជម្រាបថា អនុវិទ្យាល័យធ្លក មានអគារសិក្សាសរុបចំនួន ៣ខ្នង ស្មើនឹង១៤បន្ទប់ មានសិស្សសរុប ២១០នាក់ ស្រី១៤៣នាក់ មកពីភូមិចំនួន៧។
