នៅព្រឹកថ្ងៃទី២៤ ខែតុលា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានដឹកនាំកិច្ចប្រជុំសាមញ្ញប្រចាំសប្តាហ៍ទី៣ ខែតុលា ថ្នាក់ដឹកនាំក្រសួងព័ត៌មាន ដោយមានការចូលរួមផ្ទាល់ និងតាមរយៈប្រព័ន្ធ វីដេអូ Zoom ដើម្បីធ្វើការពិនិត្យពិភាក្សាផ្តាស់ប្តូរបទពិសោធន៍ពីគ្នាទៅវិញទៅមក ដើម្បីជម្រុញអោយការអនុវត្តន៍រាល់ផែនការ និងភារកិច្ចការងារកាន់តែមានប្រសិទ្ធភាព និងលទ្ធផលល្អប្រសើរបន្ថែមទៅមុខទៀត។ កិច្ចប្រជុំកក៏បានធ្វើការពិនិត្យ ការងារដែលអនុវត្តនាពេលកន្លងមក និងដាក់ចេញផែនការកិច្ចការងារព័ត៌មាន សម្រាប់ព្រឹត្តការណ៍អន្តរជាតិសំខាន់ៗ ដែលកម្ពុជាធ្វើជាម្ចាស់រៀបចំ។
នៅក្នុងឱកាសនោះ ឯកឧត្តម រដ្ឋមន្រ្តី ខៀវ កាញារីទ្ធ បានលើកឡើងនូវផែនការសកម្មភាពការងារជាច្រើនដែលក្រសួងព័ត៌មានទទួលខុសត្រូវធ្វើ ពិសេសដំណើរការរៀបចំទទួល និងចុះឈ្មោះអ្នកសារព័ត៌មានជាតិ និងអន្តរជាតិ ដែលកំពុងមានចំនួនកាន់តែច្រើនឡើងដែលបានចុះឈ្មោះ ដើម្បីចូលរួមថត និងយកព័ត៌មាននៃកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះរៀបចំនាខែវិច្ឆិកា ឆ្នាំ២០២២ខាងមុខនេះ។ ទន្ទឹមគ្នានេះដែរ នៅក្នុងឆ្នាំ២០២៣ ក៏មានព្រឹត្តការណ៍នៃការប្រកួតកីឡាស៊ីហ្គេម ដែលកម្ពុជាធ្វើជាម្ចាស់ផ្ទះរៀបចំផងដែរ។ ដូច្នេះក្រសួងព័ត៌មាន ត្រូវបន្តពង្រឹងសមត្ថភាពមន្រ្តី ដើម្បីបំពេញការងារអោយបានល្អ។
ក្នុងកិច្ចប្រជុំនាឱកាសនេះដែរ ឯកឧត្តមលោកជំទាវជាថ្នាក់ដឹកនាំតាមបណ្តាអគ្គនាយកដ្ឋានទាំង៥ ចំណុះឲ្យក្រសួងព័ត៌មាន រួមទាំងឯកឧត្តមលោកជំទាវ ជារដ្ឋលេខាធិការអនុរដ្ឋលេខាធិការ ជាប្រធានគណៈកម្មការ អនុគណៈកម្មការ បានធ្វើរបាយការណ៏ពីវឌ្ឍនភាពការងារសំខាន់ៗមួយចំនួន ដែលមន្រ្តី និងថ្នាក់ដឹកនាំគ្រប់ផ្នែកគ្រប់ជំនាញ សម្រេចបំពេញ និងអនុវត្តន៍បានក្នុង ១សប្តាហ៍ពេលកន្លងនេះ ដោយបានធ្វើអោយរាល់កិច្ចការងារបានដំណើរដោយរលូន។ ទន្ទឹមគ្នានេះដែរ ថ្នាក់ដឹកនាំតាមបណ្តាផ្នែកជំនាញនីមួយៗ ក៏បានលើកពីផែនការសកម្មភាពការងារដែល ត្រូវបន្តធ្វើសម្រាប់សប្តាហ៍បន្តបន្ទាប់ទៀត អោយបានកាន់តែល្អប្រសើរ។
ជាមួយគ្នានោះដែរ ឯកឧត្តម រដ្ឋមន្រ្តី ក៏បានជម្រុញលើកទឹកចិត្តដល់អគ្គនាយកដ្ឋានទូរទស្សន៍ជាតិកម្ពុជា និងអគ្គនាយកដ្ឋានទីភ្នាក់ងារសារព័ត៌មានកម្ពុជា AKP ត្រូវបន្តផ្សាយផ្សព្វផ្សាយព័ត៌មានទាន់ហេតុការណ៍ ដំណឹងផ្សេងៗ រួមទាំងបទយកការណ៍ និងផលិតឯកសារល្អៗ ដើម្បីអោយសាធារណៈជន បានអាន ទស្សនា កាន់តែច្រើនបន្ថែមទៀត ហើយនឹងអាចទាក់ទាញការផ្សាយពាណិជ្ជកម្មបានច្រើន។ ឯកឧត្តម រដ្ឋមន្ត្រី ក៏បានសំដែងនូវការកោតសរសើរ និងវាយតំលៃខ្ពស់ ចំពោះលទ្ធផលការងារដែលថ្នាក់ដឹកនាំ មន្រ្តីរាជការ អគ្គនាយកដ្ឋានទាំង៥ ចំណុះអោយក្រសួងព័ត៌មាន ក៏ដូចជាបណ្តាគណៈកម្មការទាំងអស់នៃក្រសួងព័ត៌មាន សម្រេចអនុវត្តន៍កន្លងមកនេះ ហើយអ្វីដែលសំខាន់គឺត្រូវបន្តស្មារតីសាមគ្គី កិច្ចសហការគ្នាអោយបានតែរឹងមាំ ដើម្បីបំពេញកិច្ចការងារដោយរលូន និងជោគជ័យ៕
