គិតក្នុងឆ្នាំ២០២១ មន្ទីរពេទ្យកុមារអង្គរ ខេត្តសៀមរាប បានពិនិត្យ ព្យាបាល និងថែទាំកុមារមហារីកចំនួន ៥០៨ករណី ក្នុងនោះ កុមារមានជំងឺមហារីក បីភាគបួន (៣/៤) បានជាសះស្បើយ និងក៏កំពុងតែបន្តទទួលការព្យាបាល នេះបើតាមការបញ្ជាក់របស់វេជ្ជបណ្ឌិត សំ លីវណ្ណៈ វេជ្ជបណ្ឌិតឯកទេសជំងឺមហារីក នៃមន្ទីរពេទ្យកុមារអង្គរ នៅក្នុងសន្និសីទសារព័ត៌មាន យុទ្ធនាការ “ជួយសង្គ្រោះជីវិតកុមារពីជំងឺមហារីក” នៅថ្ងៃទី២៤ ខែតុលា ឆ្នាំ២០២២។
លោកវេជ្ជបណ្ឌិត សំ លីវណ្ណៈ បង្ហាញថា ជំងឺមហារីកគឺជាជំងឺមួយ ដែលអាចកើតឡើងលើមនុស្សគ្រប់គ្នា រួមទាំងកុមារ បច្ចុប្បន្ននៅក្នុងប្រទេសកម្ពុជា ចំនួនអ្នកកើតមហារីកកំពុងមានការកើនឡើង។ យោងតាមទិន្នន័យប្រទេសជិតខាងនៅក្នុងតំបន់ ជារៀងរាល់ឆ្នាំ មានមនុស្សប្រមាណ១៥,០០០ ទៅ ១៨,០០០នាក់ ត្រូវបានធ្វើរោគវិនិច្ឆ័យលើជំងឺមហារីក ក្នុងនោះជាង ៥៥០នាក់ជាកុមារ។ ទន្ទឹមនោះ ចំនួនកុមារ ដែលស្លាប់មុនការធ្វើរោគវិនិច្ឆ័យ គឺមិនមានទិន្នន័យច្បាស់លាស់នោះទេ ប៉ុន្តែការស្រាវជ្រាវបង្ហាញពីអត្រារស់រានសម្រាប់អ្នកដែលបានធ្វើរោគវិនិច្ឆ័យ មានកម្រិតទាប ត្រឹមតែ២០ភាគរយប៉ុណ្ណោះ។
លោកវេជ្ជបណ្ឌិត បន្តថា មន្ទីរពេទ្យកុមារអង្គរ បានបើកដំណើរការផ្នែកជំងឺមហារីក ក្នុងឆ្នាំ២០១២ ដើម្បីពិនិត្យ ព្យាបាល និងថែទាំកុមារ ចំពោះជំងឺដ៏កាចសាហាវនេះ ស្របពេលការព្យាបាលមហារីកបាតភ្នែកក៏បានចាប់ផ្តើមផងដែរ។ លោកពន្យល់បន្ថែមថា ការព្យាបាលជំងឺមហារីករួមបញ្ចូលគ្នានូវការវះកាត់ ការព្យាបាលដោយការចាក់ថ្នាំគីមី (ថ្នាំមហារីក) ការព្យាបាលដោយឡាស៊ែរ និងការព្យាបាលដោយប្រើគ្រីស្តាល់ (ដោយប្រើភាពត្រជាក់ខ្លាំង ដើម្បីបង្កកជាលិកាមិនធម្មតា) និង ព្យាបាលបំបាត់ការឈឺចាប់។ ការព្យាបាលជំងឺមហារីក មានភាពតានតឹងខ្លាំងសម្រាប់កុមារ និងក្រុមគ្រួសារ ដូច្នេះ មន្ទីរពេទ្យកុមារអង្គរ ក៏មានរួមបញ្ចូល នូវសេវាគាំទ្រផ្នែកផ្លូវចិត្ត និងហិរញ្ញវត្ថុដល់អ្នកជំងឺមហារីក និងអាណាព្យាបាល ដូចជាការផ្តល់ប្រឹក្សា ប្រាក់ឧបត្ថម្ភធ្វើដំណើរ និងកញ្ចប់អាហារជាដើម។ មិនត្រឹមតែប៉ុណ្ណោះ ឪពុកម្តាយអ្នកជំងឺ ក៏ទទួលបានការអប់រំចំណេះដឹង ពីស្ថានភាពរបស់កូនៗ ផែនការព្យាបាល ផលប៉ះពាល់នៃការព្យាបាល និងរបៀបថែទាំកូនរបស់ពួកគេនៅផ្ទះថែមទៀតផង។
បើតាមការលោកវេជ្ជបណ្ឌិត ងួន ច័ន្ទភក្ត្រា នាយកមន្ទីរពេទ្យកុមារអង្គរ បញ្ជាក់ថា ដើម្បីដំណើរការផ្តល់សេវាពិនិត្យ ព្យាបាល និងថែទាំជំងឺមហារីកទាំងមូល មន្ទីរពេទ្យត្រូវការចំណាយថវិកា ចន្លោះពី ៣៥០,០០០ដុល្លារ ទៅ ៤៥០,០០០ដុល្លារអាមេរិក ក្នុងមួយឆ្នាំៗ។ បច្ចុប្បន្ន មន្ទីរពេទ្យកុមារអង្គរ បាននិងកំពុងប្រឈមនឹងបញ្ហាខ្វះខាតមូលនិធិ និងការកើនឡើងអ្នកជំងឺ ដែលតម្រូវឱ្យមន្ទីរពេទ្យធ្វើការអំពាវនាវដល់សាធារណជនទាំងអស់ សូមមេត្តាចូលរួមគាំទ្រដល់យុទ្ធនាការផ្សព្វផ្សាយរៃអង្គាសមួយនេះ តាមរយៈការបរិច្ចាគថវិកាជាប្រចាំខែ ឬប្រចាំឆ្នាំ មកកាន់មន្ទីរពេទ្យកុមារអង្គរផ្ទាល់។
សូមបញ្ជាក់ថា មន្ទីរពេទ្យកុមារអង្គរ គឺជាអង្គការក្រៅរដ្ឋាភិបាល មិនស្វែងរកប្រាក់ចំណេញ មានទីតាំងនៅក្នុងខេត្តសៀមរាប និងបានចាប់ដំណើរការតាំងពីឆ្នាំ១៩៩៩មក។ មន្ទីរពេទ្យកុមារអង្គរ បានផ្តល់ការពិនិត្យ ព្យាបាល ថែទាំជំងឺប្រកបដោយគុណភាពខ្ពស់ និងក្តីមេត្តាករុណា និងឥតគិតកម្រៃ ដល់កុមារកម្ពុជាប្រមាណជាង ២,៥លានករណី។
អត្ថបទ និងរូបភាព៖ លោក បូ សាវី និងលោក ស៊ាន សុផាត
កែសម្រួល៖ លោក សេង ផល្លី
