នៅព្រឹកថ្ងៃទី២៤ ខែតុលា ឆ្នាំ២០២២ នៅសាលាខេត្តសៀមរាប មានរៀបចំកិច្ចប្រជុំបច្ចេកទេស ជាមួយមន្ទីរ អង្គភាពជុំវិញខេត្តស្ដីពីការផលិតវីដេអូសមិទ្ធផលរបស់ខេត្តសៀមរាប ក្នុងរយៈពេល៥ឆ្នាំ ដើម្បធ្វើការផ្សព្វផ្សាយជូនសាធារណជនពីការរីកចម្រើន និងវឌ្ឍនភាពរបស់ខេត្ត ក្រោមការដឹកនាំរបស់រាជរដ្ឋាភិបាលអាណត្តិទី៦។
មានប្រសាសន៍លើកឡើងទៅកាន់លោកប្រធាន និងអ្នកតំណាងមន្ទីរ អង្គភាពជុំវិញខេត្ត លោក លី វណ្ណៈ នាយករដ្ឋបាលសាលាខេត្តសៀមរាប បង្ហាញថា ក្រោមការដឹកនាំ និងយកចិត្តខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ខេត្តសៀមរាប មានការរីកចម្រើនយ៉ាងឆាប់រហ័សលើផ្នែកសេដ្ឋកិច្ច សង្គមកិច្ច និងវប្បធម៌។ ជាពិសេស ខេត្តទេសចរណ៍ វប្បធម៌ ប្រវត្តិសាស្ត្រ និងធម្មជាតិមួយនេះ គឺជាប៉ូលសេដ្ឋកិច្ចទី៣ បន្ទាប់ពីរាជធានីភ្នំពេញ និងខេត្តព្រះសីហនុ និងត្រូវបានប្រសិទ្ធនាមថាជា តារាទិសឧត្តរផងដែរ។
លោក លី វណ្ណៈ បញ្ជាក់ថា មុនវិបត្តិកូវីដ-១៩ ខេត្តសៀមរាបមាន វិស័យទេសចរណ៍ និងកសិកម្ម ដែលមានភាពលេចធ្លោខ្លាំង។ ដោយឡែក ស្ថិតក្នុងវិបត្តិកូវីដ-១៩ រាជរដ្ឋាភិបាលបានកែប្រែ ស្ថានភាពដ៏លំបាក និងការជាប់គាំងសេដ្ឋកិច្ចនៅទូទាំងពិភពលោក ទៅជាឱកាសរបស់ខេត្តសៀមរាប ដោយបានស្ថាបនាផ្លូវ ៣៨ខ្សែ និងកែលម្អសោភណ្ឌភាពក្នុងទីក្រុង និងដងស្ទឹងសៀមរាប ក្នុងពេលស្របគ្នានេះ អាកាសយានដ្ឋានអន្តរជាតិសៀមរាបថ្មី កម្រិត4E ក៏នឹងស្ថាបនារួចរាល់នាពេលខាងមុខផងដែរ ដែលនេះជាចក្ខុវិស័យដ៏វែងឆ្ងាយរបស់រាជរដ្ឋាភិបាល ជាមួយនិងការដឹកនាំ គ្រប់គ្រងប្រកបដោយប្រសិទ្ធភាពរបស់ឯកឧត្តម ទៀ សីហា អភិបាលខេត្តសៀមរាប ដើម្បីទាក់ទាញភ្ញៀវទេសចរមកពីជុំវិញពិភពលោកក្រោយវិបត្តិកូវីដ-១៩។
លោកនាយករដ្ឋបាល បញ្ជាក់បន្ថែមថា ការផលិតវីដេអូសមិទ្ធផលរាជធានី ខេត្តនាពេលនេះ គឺជាឱកាសសម្រាប់ខេត្តសៀមរាប ក៏ដូចជាមន្ទីរ អង្គភាពជុំវិញខេត្ត ធ្វើការផ្សព្វផ្សាយពីសក្ដានុពល សមិទ្ធផលលេចធ្លោ និងជាអាទិភាពរបស់ខ្លួន ដែលបានខិតខំបំពេញការងារក្នុងរយៈពេលកន្លងមក តាមរយៈក្រសួងព័ត៌មាន និងមន្ទីរព័ត៌មានខេត្ត។
គួរជម្រាបថា វីដេអូសមិទ្ធផល ៥ឆ្នាំរបស់រាជធានី ខេត្តនីមួយៗ ដែលមានរយៈពេល ៣០នាទីនេះ នឹងត្រូវយកទៅវាយតម្លៃនៅក្រសួងព័ត៌មាន និងធ្វើការដណ្ដើមយកចំណាត់ថ្នាក់ចាប់ពីលេខ១ រហូតដល់លេខ១០ និងប្រកាសលទ្ធផលនៅខែមេសា ឆ្នាំ២០២៣។
អត្ថបទ និងរូបភាព៖ លោក សេង ផល្លី និងលោក ហាំ ម៉េងហួត
