នៅព្រឹកថ្ងៃទី២៥ ខែតុលា ឆ្នាំ២០២២នេះ លោក នាក់ ណេរ៉ុន អភិបាលរងខេត្ត តំណាងឯកឧត្តម ទៀ សីហា អភិបាលខេត្តសៀមរាប បានដឹកនាំក្រុមការងារខេត្ត រួមនិងអាជ្ញាធរស្រុក ចុះជួបសួរសុខទុក្ខ និងនាំយកអំណោយរបស់រាជរដ្ឋាភិបាល ចែកជូនប្រជាពលរដ្ឋរងគ្រោះដោយសារជំនន់ទឹកភ្លៀង និងខ្វះខាតស្បៀង ចំនួន ១,១១០គ្រួសារ មកពីឃុំចំនួន៥ ក្នុងស្រុកស្រីស្នំ ខេត្តសៀមរាប។
ក្នុងឱកាសនោះ លោក នាក់ ណេរ៉ុន លើកឡើងថា បានចូលរួមសោកស្ដាយ ជាមួយប្រជាពលរដ្ឋក្នុងស្រុកស្រីស្នំ ដែលបានបាត់បង់ និងខូចខាតទ្រព្យសម្បត្តិ ក៏ដូចជារងផលប៉ះពាល់នូវដំណាំកសិកម្មផ្សេងៗផងដែរ។ លោកបន្ថែមថា ដោយសារតែ ការខូចខាតមានទំហំធំ អំណោយសង្គ្រោះបន្ទាន់របស់រាជរដ្ឋាភិបាលនេះ ត្រូវបានធ្វើការចែកជូនដល់ប្រជាពលរដ្ឋដែលមានការខ្វះខាត និងរងគ្រោះធ្ងន់ធ្ងរ ទៅតាមដំណាក់កាល។
ទន្ទឹមនោះ លោកអភិបាលរងខេត្ត ក៏បានណែនាំដល់បងប្អូនប្រជាពលរដ្ឋទាំងអស់ ដែលបានរងផលប៉ះពាល់ដោយសារជំនន់ទឹកភ្លៀងដែលបណ្ដាលឲ្យខូចខាតស្រូវ និងផលដំណាំផ្សេងៗ សូមកុំបាក់ទឹកចិត្ត និងត្រូវត្រៀមខ្លួននៅពេលទឹកស្រក បន្តចាប់ផ្ដើមសកម្មភាពដាំដុះឡើងវិញ ដោយក្នុងនោះអាជ្ញាធរពាក់ព័ន្ធគ្រប់ជាន់ថ្នាក់ ក៏បាននឹងបន្តផ្ដល់ជូននូវពូជស្រូវ និងដំណាំរួមផ្សំផ្សេងៗទៀតដល់បងប្អូន សម្រាប់ទុកធ្វើការដាំដុះឡើងវិញ។ ជាពិសេស ការស្ដារឡើងវិញ នូវដំណាំស្រូវដែលជាដំណាំដង្ហើមសេដ្ឋកិច្ចនៃគ្រួសារកសិករ និងជាខ្នងបង្អែកដ៏មានអាទិភាពនៃសេដ្ឋកិច្ចជាតិ។ ដូច្នេះ រាជរដ្ឋាភិបាលរួមនឹងក្រសួង ស្ថាប័នពាក់ព័ន្ធ ក៏ដូចជាអាជ្ញាធរគ្រប់ជាន់ថ្នាក់ នឹងបន្តយកចិត្តទុកដាក់លើបញ្ហានេះ និងធ្វើយ៉ាងណាសដោះស្រាយបញ្ហាជូនបងប្អូនប្រជាពលរដ្ឋគ្រប់គ្នាឲ្យបានទាន់ពេលវេលា។
បើតាមលោក ហ៊ន់ ឬទ្ឋិ អភិបាលស្រុកស្រីស្នំ បង្ហាញថា អំណោយរបស់រាជរដ្ឋាភិបាល ដែលបានចែកជូនប្រជាពលរដ្ឋ នៅពេលនេះ ក្នុងមួយគ្រួសារទទួលបាន៖ អង្ករ ២៥គីឡូកាម, មី១កេស, ទឹកត្រី១យួរ, ទឹកស៊ីអីវ១យួរ, ត្រីខ១យួរ និងទឹកសុទ្ធ១កេស។ លោកបន្តថា នៅទូទាំងស្រុកស្រីស្នំ គិតចាប់ពីថ្ងៃទី១៦ ខែកញ្ញា ដល់ថ្ងៃទី១៦ ខែតុលា ឆ្នាំ២០២២ ជំនន់ទឹកភ្លៀងបានបណ្ដាលប៉ះពាល់ដល់ប្រជាពលរដ្ឋចំនួន ៥,៥៣៦គ្រួសារ ដោយក្នុងនោះប្រជាពលរដ្ឋលិចផ្ទះត្រូវទទួលបានស្បៀក ចំនួន ២,៦៦០គ្រួសារ និងប្រជាពលរដ្ឋខូចខាតដំណាំស្រូវចំនួន ២,៨៧៦គ្រួសារ។ ហើយកន្លងមកប្រជាពលរដ្ឋលិចផ្ទះចំនួន ១ពាន់គ្រួសារ ត្រូវបានទទួលអំណោយពីរាជរដ្ឋាភិបាល ក៏ដូចជាអាជ្ញាធរខេត្ត សាខាកាកបាទក្រហមកម្ពុជា និងសប្បុរសជននានា ជាក់ស្ដែងសម្រាប់ប្រជាប្រជាពលរដ្ឋដែលទទួលបានអំណោយពីរាជរដ្ឋភិបាលនាថ្ងៃនេះ មានចំនួន ១,១១០គ្រួសារ ដែលមកពី ៥ឃុំ និងនៅសល់ជាង ៥០០គ្រួសារទៀតនឹងត្រូវចែកជូនជាបន្តបន្ទាប់។ ដោយឡែក សម្រាប់ ដំណាំស្រូវ របស់ប្រជាពលរដ្ឋដែលរងការខូចខាតកន្លងមក មានជាង ១ពាន់គ្រួសារហើយ ដែលបានទទួលពូជស្រូវរបស់រាជរដ្ឋាភិបាលទុកដាំស្ដារឡើងវិញនៅពេលទឹកស្រក ចំពោះប្រជាពលរដ្ឋដែលនៅសល់មិនទាន់ទទួលបានគ្រាប់ពូជ អាជ្ញាធរនឹងបន្តចែកជូននៅពេលឆាប់ៗ ខាងមុខនេះ។
អត្ថបទ និងរូបភាព៖ លោក អ៊ុន ណារាជ្យ
កែសម្រួល៖ លោក សេង ផល្លី
