ថ្ងៃទី២៥ ខែតុលា ឆ្នាំ២០២២ ក្រសួងការងារ និងបណ្តុះបណ្តាលវិជ្ជាជីវៈ បានបើកសិក្ខាសាលាពិគ្រោះយោបល់បច្ចេកទេសលើសេចក្តីព្រាងច្បាប់ស្តីពីសុវត្ថិភាព និងសុខភាពការងារ នៅខេត្តសៀមរាប ក្នុងគោលបំណង ប្រមូលធាតុចូល និងមតិយោបល់ពីអង្គសិក្ខាសាលា ក្នុងការកែសម្រួលសេចក្តីព្រាងច្បាប់ស្តីពី សុវត្ថិភាព និងសុខភាពការងារឱ្យកាន់តែប្រសើរឡើងបន្ថែមទៀត។
ថ្លែងនៅចំពោះមុខ លោកប្រធានគ្រប់គ្រងគម្រោងនៃទីភ្នាក់ងារសុវត្ថិភាព និង សុខភាពការងារកូរ៉េ (KOSHA) និងមន្ត្រីគ្រប់ជាន់ថ្នាក់នៃក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ផេង សុខាំ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បង្ហាញថា រាជរដ្ឋាភិបាលកម្ពុជាដែលមានសម្ដេចតេជោ ហ៊ុន សែន ជាប្រមុខដឹកនាំដ៏ឈ្លាសវៃ បានយកចិត្តទុកយ៉ាងខ្លាំង ក្នុងគាំពារដល់បងប្អូនកម្មករនិយោជិត តាមរយៈការដាក់ចេញនូវ គោលនយោបាយជាបន្តបន្ទាប់ ដើម្បីធានានូវកំណើនការងារ ការបណ្តុះបណ្តាលវិជ្ជាជីវៈ សុវត្ថិភាព និងសុខភាពការងារ ប្រព័ន្ធរបបសន្តិសុខសង្គម សម្រាប់ជនទាំងឡាយដែលស្ថិត នៅក្រោមបទប្បញ្ញត្តិនៃច្បាប់ស្តីពីការងារ និងការលើកកម្ពស់ជីវភាពរបស់កម្មករនិយោជិត។ តាមរយៈការអនុវត្តគោលនយោបាយខាងលើ
ក្រសួង បានបន្តអនុវត្តន៍ផែនការយុទ្ធសាស្ត្រអភិវឌ្ឍន៍វិស័យការងារ និងបណ្តុះបណ្តាលវិជ្ជាជីវៈ ដំណាក់កាលទី២ ឆ្នាំ២០១៨-២០២២ នៃកម្មវិធីទី៤- ការលើកកម្ពស់សុខភាព និងសុវត្ថិភាព ការងាររបស់ខ្លួន ការរៀបចំគោលនយោបាយ ស្តីពីសុខភាព និងសុវត្ថិភាពការងារ ដែលក្នុងសម្រេចបាននូវលទ្ធផលការងារសំខាន់ៗជាបន្តបន្ទាប់ដូចជា ១/ ការដាក់ចេញនូវ ផែនការមេលើកទី២ ស្តីពីសុវត្ថិភាព និងសុខភាពការងារឆ្នាំ២០១៨-២០២២ ២/ ការរៀបចំកម្រងព័ត៌មានលើកទី២ ស្តីពីសុវត្ថិភាព និងសុខភាពការងារ និងកម្រងព័ត៌មាន ជាតិស្តីពីសារធាតុអាបេស្តូសនៅកម្ពុជា ៣/ ការរៀបចំការដាក់ចេញនូវគោលការណ៍ ប្រតិបត្តិស្តង់ដារ ស្ដីពីដំណើរការរោងចក្រ សហគ្រាស តាមគន្លងប្រក្រតីភាពថ្មីក្នុងបរិបទ នៃជំងឺកូវីដ-១៩ ៤/ ការរៀបចំគោលការណ៍ណែនាំស្តីពីសុវត្ថិភាពក្នុងការប្រើប្រាស់សារ ធាតុគីមីនៅកន្លែងធ្វើការ ៥. ការរៀបចំឯកសារមេរៀនបណ្តុះបណ្តាលស្តីពីការកែលម្អ របៀបធ្វើការសម្រាប់ការដ្ឋានសំណង់អគារខ្ពស់ (WILCON)។ លើសពីនេះ ឯកឧត្តម បញ្ជាក់ថា ក្រោមកិច្ចសហការ និងគាំទ្រពីទីភ្នាក់ងារសុវត្ថិភាព និងសុខភាពការងារកូរ៉េ និងក្រសួងការងារកូរ៉េ នាយកដ្ឋានពេទ្យការងារកម្ពុជា បាននឹងកំពុងអនុវត្តគម្រោងចំនួន ២ រួមមាន ១/ ការរៀបចំច្បាប់ស្តីពីសុវត្ថិភាព និងសុខភាពការងា ២/ ការបង្កើតមជ្ឈមណ្ឌលបណ្តុះបណ្ដាលសុវត្ថិភាព និងសុខភាពការងារ។
ព័ត៌មានជាតិ ថ្មីៗ
គួរជម្រាបថា តាមរយៈកិច្ចសហប្រតិបត្តិការរវាងក្រសួងការងារ និងបណ្តុះបណ្តាលវិជ្ជាជីវៈ និងទីភ្នាក់ងារ សុវត្ថិភាព និងសុខភាពការងារកូរ៉េ នាពេលកន្លងមក ភាគីទាំងពីរបានទទួលលទ្ធផលការងារគួរឱ្យកត់សម្គាល់ រួមមានការពង្រឹងសមត្ថភាពដល់មន្ត្រីក្រសួងការងារ និងបណ្តុះបណ្ដាលវិជ្ជាជីវៈ ដើម្បីស្វែងយល់អំពីប្រព័ន្ធច្បាប់ និងប្រព័ន្ធគ្រប់គ្រងសុវត្ថិភាព និងសុខភាពការងារនៅសាធារណរដ្ឋកូរ៉េ ការប្រគល់ឯកសារមេរៀនចំនួន ១០ប្រធានបទទាក់ទងនឹង សុវត្ថិភាពសំណង់ និងការបន្តផ្តល់ឧបករណ៍បណ្តុះបណ្តាលតាមរយៈវីដេអូ (Virtual Reality & Mixed Reality) និងរថយន្តចល័តសម្រាប់ធ្វើការបណ្ដុះបណ្ដាលដល់ប្រទេសកម្ពុជាផងដែរ៕
អត្ថបទ និងរូបភាព៖ លោក ជា ស្រស់ និងលោក ស៊ាន សុផាត
កែសម្រួល៖ លោក សេង ផល្លី
