នៅព្រឹកថ្ងៃទី២៥ ខែតុលា ឆ្នាំ២០២២នេះ ឯកឧត្តម អ្នកឧកញ៉ា សៀង ណាំ តំណាងរាស្ត្រមណ្ឌលសៀមរាប និងលោកជំទាវ បានដឹកនាំក្រុមការងារ រួមនឹងអាជ្ញាធរមូលដ្ឋាន បាននាំយកអំណោយមាន៖ អង្ករ ជាង១២តោន, សារ៉ុង៤៨៨ និងថវិកាមួយចំនួន ដែលជាអំណោយដ៍ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រី និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប ចែកជូនប្រជាពលរដ្ឋចំនួន ៤៨៨គ្រួសារ នៅឃុំពោធិ៍ទ្រាយ ស្រុកពួក ខេត្តសៀមរាប ស្ថិតក្នុងភូមិសាស្ត្រក្នុងបឹងតំបន់បឹងទន្លេសាប។
មានប្រសាសន៍ក្នុងឱកាសនោះ ឯកឧត្តម អ្នកឧកញ៉ា សៀង ណាំ បាននាំយកនូវការផ្ដាំផ្ញើសុខទុក្ខពីសំណាក់សម្ដេចតេជោ ហ៊ុន សែន និងសម្ដេចពិជ័យសេនា ទៀ បាញ់ ដែលសម្ដេចតែងគិតគូរខ្ពស់បំផុត និងមុនគេបង្អស់ចំពោះសុខទុក្ខប្រជាពលរដ្ឋគ្រប់រូប ពិសេសក្នុងកាលៈទេសៈជួបការលំបាក។ ក្នុងនោះបងប្អូនប្រជាពលរដ្ឋនៅតំបន់នេះ ភាគច្រើនអាស្រ័យផលលើរបរនេសាទ និងការលក់ដូរបន្តិចបន្តួច ពុំមានស្រែចម្ការ ដើម្បីបង្កបង្កើនផលឡើយ ហើយម្យ៉ាងទៀតស្ថានភាពផ្លូវទៅកាន់មូលដ្ឋាននេះ នៅរដូវវស្សាត្រូវធ្វើដំណើរដោយកាណូត នៅរដូវទឹកស្រក ផ្លូវភក់រអិលពិបាកធ្វើដំណើរទៅកាន់ទីប្រជុំជន។ ជាមួយគ្នានោះក៍សមាជិកគ្រួសារខ្លះនាំកូនចៅវិលត្រឡប់មករស់នៅជាមួយគ្រួសារដោយសារបានផ្អាកបណ្តោះអាសន្នពីការងារក្នុងទីប្រជុំជន តាំងពីអំឡុងសកលលោកជួបវិបត្តិដោយសារជំងឺកូវីដ-១៩ ហើយបច្ចុប្បន្នថ្វីត្បិតតែការឆ្លងរាលដាលនៃជំងឺកូវីដ-១៩ នៅកម្ពុជាមានថមថយជាលំដាប់ក្តី តែក៍មានសមាជិកគ្រួសារខ្លះពុំទាន់វិលត្រឡប់ទៅរកការងារធ្វើនៅឡើយទេ។
អ្នកឧកញ៉ា សៀង ណាំ ក៏បានសម្ដែងនូវអំណរគុណយ៉ាងជ្រាលជ្រៅ ចំពោះប្រមុខរាជរដ្ឋាភិបាលកម្ពុជា ក្រោមការដឹកនាំដ៍ឈ្លាសវៃ និងប៉ិនប្រសព្វរបស់សម្តេចតេជោ ដែលជានិច្ចកាលតែងយកចិត្តទុកដាក់ខ្ពស់នូវសុខទុក្ខរបស់ប្រជាពលរដ្ឋគ្រប់មូលដ្ឋាន គ្រប់កាលៈទេសៈ ដែលជួបប្រទះនូវភាពខ្វះខាត ដោយមិនទុកឱ្យពលរដ្ឋណាម្នាក់ស្លាប់ដោយសាររងគ្រោះព្រោះអត់ម្ហូបអាហារឬដាច់បាយឡើយ។ ឯកឧត្តម ក៏បានសំណូមពរ និងផ្តាំផ្ញើដល់បងប្អូនប្រជាពលរដ្ឋ នៅក្នុងមូលដ្ឋាននេះ ប្រុងប្រយ័ត្នឲ្យបានខ្ពស់ កុំមានការធ្វេប្រហែសចំពោះកូនចៅតូចៗ ចៀសវាងារលង់ទឹក ឬសត្វអសិរពិសទិច ឬខាំ ព្រោះនេះជាតំបន់ទន្លេសាប កុំឲ្យមានហេតុការអាក្រក់ណាមួយកើតឡើង និងប្រុងប្រយ័ត្នចំពោះជំងឺឆ្លង និងរាគរូសផ្សេងៗ ដោយត្រូវបរិភោគចំណីអាហារណាដែលមានអនាម័យត្រឹមត្រូវ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
