ប្រជាពលរដ្ឋដែលរងផលប៉ះពាល់ដោយទឹកជំនន់ ក្នុងស្រុកអង្គរជុំ ចំនួន៣៤០គ្រួសារ បានទទួលអំណោយស្បៀងអាហារពីរាជរដ្ឋាភិបាលកម្ពុជា តាមរយៈគណៈកម្មាធិការគ្រប់គ្រងប្រព័ន្ធស្បៀងកម្ពុជា ដែលការផ្ដល់ជូននេះ ធ្វើឡើងនៅក្នុងវត្តក្រឡាញ់ ឃុំតាសោម ស្រុកអង្គរជុំ ខេត្តសៀមរាប នាព្រឹកថ្ងៃទី២៦ ខែតុលា ឆ្នាំ២០២២នេះ ក្រោមវត្តមានលោក ឃឹម ហ្វីណង់ អភិបាលរងខេត្ដ ដោយមានការចូលរួមពីសំណាក់ថ្នាក់ដឹកនាំមន្ទីរ-អង្គភាពមួយចំនួនក្នុងខេត្ត និងអាជ្ញាធរមូលដ្ឋានជាច្រើនរូប។
លោក ឃឹម ហ្វី ណង់ មានប្រសាសន៍ថា ការផ្ដល់ស្បៀងនាឱកាសនេះ គឺជាការយកចិត្ដទុកដាក់ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី ដែលកន្លងមកសម្ដេចតែងតែបានគិតគូរខ្ពស់ និងបានឧបត្ថម្ភគាំទ្រជាបន្តបន្ទាប់ដល់ប្រជាពលរដ្ឋដែលរងផលប៉ះពាល់ពីគ្រោះមហន្តរាយផ្សេងៗ ជាពិសេសប្រជាពលរដ្ឋដែលរងគ្រោះដោយសារទឹកជំនន់នាពេលបច្ចុប្បន្ននេះ។ ហើយការបះពាល់ទាំងនេះ មិនមែនទេតែស្រុកអង្គរជុំមួយទេ គឺមានស្រុកជាច្រើនដែលរងផលបះពាល់ ដូច្នេះបន្ទាប់ពីទឹកបានស្រកជាបណ្តើៗ សូមឲ្យបងប្អូនប្រជាពលរដ្ឋទាំងអស់មេត្តាប្រុងប្រយ័ត្នឲ្យបានខ្ពស់ ចំពោះអនាម័យ បរិស្ថាន និងសុខភាពឲ្យបានល្អប្រសើរជៀសវាងការឆ្លងរីករាលដាលពីជម្ងឺផ្សេងៗ ដោយប្រការណាមួយជាយថាហេតុ ក្នុងការរស់នៅប្រចាំថ្ងៃរបស់យើងជាដើម។
បើតាមលោក លុក ផុស អភិបាលស្រុកអង្គរជុំ បានឲ្យដឹងថា ទូទាំងស្រុកអង្គរជុំ ជំនន់ទឹកភ្លៀងបានបណ្ដាលឲ្យរងផលប៉ះពាល់ដល់ប្រជាពលរដ្ឋ មានចំនួនជាង ៩០០គ្រួសារ ស្ថិតក្នុងឃុំចំនួន៣ គឺឃុំតាសោម ឃុំនគរភាស និងឃុំគោកដូង ហើយប្រជាពលរដ្ឋដែលបានទទួលអំណោយនាពេលនេះមាន ចំនួន ៣៤០គ្រួសារ ដែលរងផលប៉ះពាល់ខ្លាំង ដោយក្នុងមួយគ្រួសារទទួលបាន៖ អង្ករ ២៥គីឡូកាម, មី១កេស, ទឹកត្រី១យួរ, ទឹកស៊ីអីវ១យួរ, ត្រីខ១យួរ និងទឹកសុទ្ធ១កេស។
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
