អគ្គលេខាដ្ឋានក្រុមប្រឹក្សាសកម្មភាពជនពិការ និងក្រុមប្រឹក្សាសកម្មភាពជនពិការ ខេត្តសៀមរាប បានរៀបចំកិច្ចប្រជុំបូកសរុបវឌ្ឍនភាពការងារត្រីមាសទី៣ ឆ្នាំ២០២២ និងទិសដៅការងារបន្តសម្រាប់ខេត្តសៀមរាប តាមរយៈការចូលរួមដោយផ្ទាល់ និងតាមប្រព័ន្ធហ្សូម ដោយមានការគាំទ្រដោយកម្មវិធីអភិវឌ្ឍសហប្រជាជាតិ UNDP ក្រោមកម្មវិធី ACCESS (អាសេស)
ដើម្បីពិភាក្សាលើលទ្ធផលសម្រេចរបស់ ក.ស.ជ ខេត្តត្រឹមត្រីមាសទី៣ ឆ្នាំ២០២២ ពីមន្ទីរអង្គភាពពាក់ព័ន្ធពិនិត្យ និងសម្ររចលើផែនការសកម្មភាព ក្នុងត្រីមាសទី៤ ឆ្នាំ២០២២ ពិនិត្យ និងសម្រេចលើផែនការសកម្មភាពប្រចាំឆ្នាំ២០២៣ របស់ ក.ស.ជ ខេត្តសៀមរាប។
កិច្ចប្រជុំនេះដែរប្រព្រឹត្តិទៅក្រោមធិបតីភាព ឯកឧត្តម អ៊ុង សម្បត្តិ អគ្គលេខាធិការរង នៃអគ្គលេខាធិការដ្ឋានក្រុមប្រឹក្សាសកម្មភាពជនពិការ លោក នាក់ ណេរ៉ុន អភិបាលខេត្តសៀមរាប និងជាប្រធាន ក.ស.ជ ខេត្តសៀមរាប ព្រមទាំងមានការចូលរួមពីសមាជិសមាជិកាក្រុមប្រឹក្សាសកម្មភាពជនពិការខេត្តសៀមរាប និងដៃគូពាក់ព័ន្ធ ប្រមាណជាង ៦០នាក់ ធ្វើឡើងនៅសណ្ឋាគារ សូម៉ាទេវី នៅព្រឹកថ្ងៃទី២២ ខែតុលា ឆ្នាំ២០២២នេះ។
លោក នាក់ ណេរ៉ុន មានប្រសាសន៍ថា ជនមានពិការភាពមិនមែនជាបន្ទុកសង្គមនោះទេ ជាក់ស្ដែងក្នុងបរិបទឧស្សាហកម្មបច្ចេកវិទ្យា៤.០ ជនដែលមានពិការភាព ពួកគាត់ទទួលបាននូវចំណេះដឹង ជំនាញ ដែលជំនាញខ្លះអាចពូកែជាងមនុស្សធម្មតា ហើយពួកគាត់ក៏បានចូលរួមយ៉ាងសំខាន់ផងដែរ ក្នុងការអភិវឌ្ឍសេដ្ឋកិច្ចសង្គមជាតិ ស្របទៅតាមគោលនយោបាយរបស់រដ្ឋាភិបាលកម្ពុជាក្នុងការកាត់បន្ថយ កម្រិតជីវះភាព និងភាពក្រីក្ររបស់ប្រជាជន ក្នុងការសម្រេចគោលដៅឆ្នាំ២០៣០ ជាប្រទេសមានចំណូលមធ្យមកម្រិតខ្ពស់ ២០៥០ ជាប្រទេសដែលមានចំណូលខ្ពស់។ ហេតុនេះបើយើងមិនបានគិតដិតដល់ ចំពោះជនមានពិការភាពនោះទេ កម្ពុជាពុំសម្រេចទៅតាមគោលនោយោបាយរបស់រដ្ឋាភិបាលនោះទេ ក្នុងនោះក្រុមប្រឹក្សាសកម្មភាពជនពិការ ក៏កំពុងយកចិត្តទុកដាក់ជំពោះបញ្ហារនេះ។
តាមរយះកិច្ចប្រជុំនេះដែរ លោកអភិបាលរងខេត្ត ក៏បានជំរុញដល់បណ្ដាមន្ទីរ-អង្គភាពពាក់ព័ន្ធ ត្រូវរួមគ្នាជួយដល់ជនពិការតាមវិស័យ និងជំនាញរបស់ខ្លួន ថាតើត្រូវជួយបែបណាដល់ជនមានពិការភាព ហើយអាជ្ញាធរក្រុង ស្រុក ឃុំសង្កាត់ ត្រូវយកចិត្តទុកដាក់ ចំពោះផ្លូវសម្រាប់ជនមានពីការភាព ជាពិសេសតាមនៅតាមទីកន្លែងសាធារណៈ។
មានប្រសាសន៍ក្នុងឱកាសនោះដែរ ឯកឧត្តម អ៊ុង សម្បត្តិ បានបញ្ជាក់ថា កិច្ចប្រជុំបូកសរុបវឌ្ឍនភាពការងារត្រីមាសទី៣ ឆ្នាំ២០២២ និងទិសដៅបន្ត នាពេលនេះពិតជាមានសារះសំខាន់ខ្លាំងណាស់ ដោយតាមវិស័យ និងមន្ទីរ-អង្គភាពពាក់ព័ន្ធ ពិនិត្យ និងសម្ររចលើផែនការសកម្មភាព អនុវត្តកន្លងមកទៅតាមអង្គភាពនីមួយៗ យកមកដាក់ពិភាក្សា និងរកដំណោះស្រាយ។ ឯកឧត្ដមបានទទួលស្គាល់ថា ក្រុមប្រឹក្សាសកម្មភាពជនពិការ ខេត្តសៀមរាប ពិតជាបានយកចិត្តទុកដាក់កសាងហេដ្ឋារចនាសម្ព័ន្ឋ មានផ្លូវជំរាលជាដើម ពិតជាជួយបង្កភាពងាយស្រួលដល់ជនមានពិការភាព ស្របតាមគោលនយោបាយរបស់រាជរដ្ឋាភិបាលក្នុងការលើកកម្ពស់សិទ្ឋិ សេក្តីថ្លៃថ្នូរ និងផលប្រយោជន៍របស់បងប្អូនជនពិការ។ ហើយការងារពិការភាព ជាការងារអន្តរវិស័យ មិនមែនជាការងារស្នូលឬការងារផ្តាច់មុខ របស់ក្រសួងឬអង្គភាព ស្ថាប័នណាមួយនោះឡើយ គឺជាការងាររួមគ្នានិងប្រទាក់ក្រឡា រវាងអង្គភាព ស្ថាប័ន ក្រសួងនានា វាទាមទារឱ្យមានការចូលរួមក្នុងគ្រប់វិស័យពាក់ព័ន្ឋទាំងអស់៕
អត្ថបទ និងរូបភាព៖ លោក ធន់ ពូថេ
កែសម្រួល៖ លោក អ៊ុន ណារាជ្យ
