នៅថ្ងៃទី២៤ ខែតុលា ឆ្នាំ២០២២ ថ្នាក់ដឹកនាំ និង មន្ត្រីរាជការជាង ១៥០នាក់នៃលេខាធិការដ្ឋានក្រុមប្រឹក្សាជាតិកម្ពុជាដើម្បីស្ត្រី ក្រសួងកិច្ចការនារី នៅថ្នាក់កណ្តាល និងថ្នាក់រាជធានី ខេត្តទាំង២៥ បានចូលរួមសិក្សា ស្វែងយល់ពីវិធាន និង និតិវិធី នៃការធ្វើអធិការកិច្ចហិរញ្ញវត្ថុ ទំនាក់ទំនងរវាង សវនកម្មផ្ទៃក្នុង និង សវនកម្មផ្ទៃក្រៅ ដើម្បីរួមចំណែកអនុវត្តន៍ផែនការសកម្មភាព នៃកម្មវិធីកែទម្រង់ហិរញ្ញវត្ថុសាធារណៈ របស់ក្រសួងកិច្ចការនារី។
ថ្លែងបើកសិក្ខាសាលាដែលមានរយៈពេល២ថ្ងៃនេះ លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី បង្ហាញថា រាជរដ្ឋាភិបាលបានសម្រេចនូវជោគជ័យ ក្នុងការកសាងនូវប្រព័ន្ធគ្រប់គ្រងហិរញ្ញវត្ថុសាធារណៈ រឹងមាំកម្រិតថ្នាក់ជាតិ ដែលសមិទ្ធផលសំខាន់ៗទាំងនេះរួមមាន (១) ការប្រមូលចំណូលគួរឱ្យកត់សម្គាល់ (២) ការលុបបំបាត់ពេញលេញនូវបំណុលកកស្ទះគិតចាប់ពីឆ្នាំ២០០៧ មក (៣) ការកែលម្អកិច្ចដំណើរការថវិកាជាមួយនឹងវដ្តនៃការរៀបចំថវិកា និង (៤) ការដាក់ឱ្យអនុវត្តនូវប្រព័ន្ធព័ត៌មានវិទ្យា សម្រាប់ការគ្រប់គ្រងហិរញ្ញវត្ថុសាធារណៈ (FMIS) ដែលបានក្លាយជាប្រព័ន្ធនៃការកត់ត្រា សម្រាប់រាជរដ្ឋាភិបាល ចាប់ពីខែមករា ឆ្នាំ២០១៧ មក ដើម្បីទ្រទ្រង់ដល់ការទូទាត់បានទាន់ពេលវេលា និងធានានូវសុក្រឹតភាព នៃការរៀបចំរបាយការណ៍ហិរញ្ញវត្ថុ។
លោកជំទាវ បន្ថែមថា ការរៀបចំសិក្ខាសាលានេះឡើង គឺជាការចូលរួមអភិវឌ្ឍធនធានមនុស្ស ដែលរាជរដ្ឋាភិបាលកម្ពុជា ចាត់ទុកជាចំណុចអាទិភាព នៃការអនុវត្តយុទ្ធសាស្រ្តចតុកោណ នៅគ្រប់ដំណាក់កាល។ កន្លងមក តាមរយៈការអនុវត្តថវិកាកម្មវិធី ចាប់តាំងពីឆ្នាំ ២០០៥ និងបានឈានដល់ការអនុវត្តថវិកាកម្មវិធីពេញលេញនៅឆ្នាំ ២០១៥ មកដល់បច្ចុប្បន្ន ក្រសួងកិច្ចការនារី មានអង្គភាពថវិកា ចំនួន ៣៧ ក្នុងនោះ មានអង្គភាពថវិកា ចំនួន១២ នៅថ្នាក់កណ្តាល និង អង្គភាពថវិកាចំនួន ២៥ នៅថ្នាក់ខេត្តរាជធានី។ ទន្ទឹមនោះ ក្រសួងបាន ជំរុញ និងលើកកម្ពស់ស្មារតីទទួលខុសត្រូវ របស់អង្គភាពថវិកាទាំងអស់ ដោយអនុវត្តន៍របៀបរបបធ្វើការងារមួយ ដែលអង្គភាពថវិកាទាំងអស់ គឺជាអ្នកព្រាងដោយខ្លួនឯង នូវផែនការសកម្មភាព ដើម្បីតបឆ្លើយ ទៅនឹងផែនការយុទ្ធសាស្ត្រនារីរតនៈ និង យុទ្ធសាស្ត្រចតុកោណ របស់រាជរដ្ឋាភិបាល៕
អត្ថបទ និងរូបភាព៖ លោក យូ វង្ស
កែសម្រួល៖ លោក សេង ផល្លី
