អង្គកឋិនទានមហាសាមគ្គី ដែលផ្តួចផ្តើមឡើងដោយគណៈកម្មការ អាចា្យ និងប្រជាពុទ្ឋបរិស័ទជិតឆ្ងាយ ដង្ហែចូលវត្តដំណាក់ ស្ថិតក្នុងក្រុងសៀមរាប ដើម្បីវេប្រគេនដល់ព្រះភិក្ខុសង្ឃដែលគង់ចាំវស្សាអស់រយៈពេល ៣ខែកន្លងមក ត្រូវបានប្រារព្ធធ្វើឡើងកាលពីរសៀលថ្ងៃទី២៣ ខែតុលា ឆ្នាំ២០២២នេះ ដោយប្រមូលបច្ច័យអមត្រៃនៃអង្គកឋិនសរុបចំនួន ៩៩លាន ៥៤ម៉ឺនរៀល។
អង្គកឋិនទាននេះដែរ ក្រៅពីការផ្គត់ផ្គង់សម្រាប់ចង្ហាន់ប្រចាំថ្ងៃព្រះសង្ឃ បច្ច័យមួយចំនួនធំត្រូវបែងចែកយកទៅផ្គត់ផ្គង់ទិញសម្ភារៈសិក្សា និងឧបត្ថម្ភថ្លៃមធ្យោបាយធ្វើដំណើរ សម្រាប់ការសិក្សារបស់ភិក្ខុ សាមណេរ ដែលកំពុងសិក្សារៀនសូត្រផ្នែកពុទ្ឋកៈបឋមសិក្សា និងពុទ្ឋកៈវិទ្យាល័យ ជួសជុលកែលំអ ទីសេនាសនសង្ឃ និងរៀបចំបរិស្ថាន សួនច្បារ ស្ថិតនៅក្នុងវត្តក្នុងវត្តជាដើម។ល។
ព្រះគ្រូធម្មវិសុទ្ឋិរង្សី ឡាច ចន្ថា ព្រះចៅអធិការវត្តដំណាក់ មានថេរៈដិកាថា កឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយក ជាម្ចាស់ទានផង និងភិក្ខុសង្ឃដែលទទួលក្រាលគ្រងផង។ សម្រាប់ភិក្ខុសង្ឃទទួលបាននូវអានិស្សទាំង ៥យ៉ាងគឺ ត្រាច់ទៅកាន់ទីដទៃមិនមានទោសជាដើម។ សម្រាប់ប្រជាពុទ្ឋបរិស័ទដែលធ្វើកឋិន ក៍ទទួលបាននូវអានិសង្ឃ៥ ដែរគឺ មានរូបសម្បត្តិល្អផូរផង់ មានពណ៌សម្បុរស្រស់ថ្លាល្អ មានទ្រង់ទ្រាយល្អពេញលក្ខណៈ បើជាបុរសនឹងបានជាឯហិភិក្ខុ បើជាស្រ្តីវិញនឹងបរិបូរណ៍ទៅដោយបុណ្យជាបញ្ចពិតកល្យាណី ឬស្រ្តីគ្រប់លក្ខណ៍។ ព្រះអង្គមានថេរៈដិកាថា បញ្ជាក់ថា កឋិនទាន ជាទានមួយដែលប្លែកពីទានដទៃៗឯទៀត គឺប្លែកដោយកាលមានត្រឹមតែ ២៩ថ្ងៃតែប៉ុណ្ណោះ ហើយវត្តមួយទទួលកឋិបានតែម្តង ក្នុង១ឆ្នាំ។ ប្លែកដោយអានិសង្សអ្នកប្រគេនក៏បានអានិសង្ស និងអ្នកទទួលក្រាលគ្រងអនុមោទនាក៏បានអានិសង្ស។ ប្លែកដោយអំពើ គឺបុគ្គលអ្នកធ្វើតាមព្រះវិន័យ ប្រកបដោយធម៌ត្រឹមត្រូវ។ ប្លែកដោយវត្ថុ គឺវត្ថុសម្រាប់កឋិនមាន៣ សង្ឃាដី ចីវរ ស្បង់ តែប៉ុណ្ណោះ ក្រៅពីនោះជាបរិវាររបស់កឋិន។
ឧបាសិកា ង៉ែត វណ្ណដារ៉ា តំណាងប្រជាពុទ្ធបរិស័ទ បានបង្ហាញអារម្មណ៍រីករាយជ្រះថ្លា ដោយសារមានការជួបជុំឡើងវិញបន្ទាប់ពីអាក់ខានក្នុងការធ្វើពិធី ឬបុណ្យទានផ្សេងៗអស់ជាង ២ឆ្នាំមកហើយ ដោយសារតែវិបត្តិនៃជំងឺកូវីដ-១៩។ ហើយការជួបជុំនេះដែរអាចប្រព្រឹត្តិទៅបាន ក៏អាស្រ័យដោយកត្តាប្រទេសជាតិ មានសុខសន្តិភាពពេញលេញ មានស្ថិរភាពនយោបាយ និងមានការអភិវឌ្ឍរីកចម្រើនលើគ្រប់វិស័យ ក្រោមការដឹកនាំដ៏ត្រឹមត្រូវរបស់ សម្តេចតេជោ ហ៊ុន សែន នាយករដ្ឋមន្ត្រី ដែលជាប្រមុខដឹកនាំប្រកបដោយគតិបណ្ឌិត បានធ្វើឲ្យកម្ពុជាមានការអភិវឌ្ឍលើគ្រប់វិស័យ ទាំងផ្នែកពុទ្ធចក្រ និងអាណាចក្រ។
អត្ថបទ និងរូពភាព៖ លោក យូ វង្ស
កែសម្រួល៖ លោក អ៊ុន ណារាជ្យ
