ថ្ងៃទី២៧ ខែតុលា ឆ្នាំ ២០២២ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញបើកសន្និសីទថ្នាក់ជាតិស្តីពីការអភិវឌ្ឍប្រព័ន្ធផ្សព្វផ្សាយ ការកសាងភាពជាដៃគូ សម្រាប់ការអភិវឌ្ឍប្រព័ន្ធផ្សព្វផ្សាយ រៀបចំដោយ ក្រសួងព័ត៌មាន សហការជាមួយ អង្គការយូណេស្កូ ដើម្បីកំណត់របៀបវារៈសម្រាប់ដំណោះស្រាយតម្រង់ទិស និងបញ្ហាប្រឈមទូទៅ លើការអភិវឌ្ឍន៍ប្រព័ន្ធផ្សព្វផ្សាយនៅក្នុងប្រទេសកម្ពុជា ដោយមានកិច្ចសហការយ៉ាងរឹងមាំ និងការចូលរួមពីគ្រប់ភាគីពាក់ព័ន្ធនៃប្រព័ន្ធផ្សព្វផ្សាយទាំងអស់។
លោក SardarUmarAalm តំណាងអង្គការ UNESCOប្រចាំកម្ពុជា លើកឡើងថា ប្រព័ន្ធផ្សព្វផ្សាយសេរី ឯករាជ្យ និងចម្រុះគឺជាកត្តាសំខាន់ក្នុងការលើកកម្ពស់សិទ្ធិរបស់ប្រជាពលរដ្ឋ និងធានាថាប្រជាពលរដ្ឋអាចចូលរួម និងចូលរួមយ៉ាងពេញលេញនៅក្នុងសង្គមរបស់គេ។ វេទិកាពិភាក្សានាពេលនេះ នឹងស្វែងរកដំណោះស្រាយរួមគ្នា ដើម្បីដោះស្រាយបញ្ហាបន្ទាន់បំផុត ដែលប្រព័ន្ធផ្សព្វផ្សាយនៅកម្ពុជាកំពុងប្រឈម ក្រោយជំងឺរាតត្បាត កូវីត-១៩ បានធូរស្រាល។
លោកប្រី Susanna Elmberger អ្នកទទួលបន្ទុកសិទ្ធិមនុស្ស លទ្ធិប្រជាធិបតេយ្យ និងនីតិរដ្ឋ នៃស្ថានទូតស៊ុយអ៊ែតប្រចាំប្រទេសកម្ពុជា លើកឡើងថា ប្រព័ន្ធផ្សព្វផ្សាយសេរី ឯករាជ្យ និងចម្រុះ គឺជាមូលដ្ឋានគ្រឹះ នៃសង្គមប្រជាធិបតេយ្យ។ ប្រព័ន្ធផ្សព្វផ្សាយវិជ្ជាជីវៈ មានតួនាទីយ៉ាងសំខាន់ក្នុងការប្រឆាំងនឹងព័ត៌មានមិនពិត។ ការផ្សព្វផ្សាយព័ត៌មានប្រឌិតកំពុងបំផ្លាញលទ្ធិប្រជាធិបតេយ្យនៅជុំវិញពិភពលោក ហើយវាក៏បានប៉ះពាល់ដល់ការជឿទុកចិត្តដែលមនុស្សមាននៅក្នុងប្រព័ន្ធផ្សព្វផ្សាយផងដែរ។
មានប្រសាសន៍បើកសន្និសីទថ្នាក់ជាតិនាពេលនោះ ឯកឧត្តម ខៀវ កាញារីទ្ធ លើកឡើងថា សន្និសីទនេះបានផ្ដល់នូវឱកាសដ៏វិសេសវិសាលសម្រាប់អង្គភាពសារព័ត៌មាន អ្នកជំនាញសារព័ត៌មាន អ្នកសារព័ត៌មាន និងអ្នកសិក្សាស្រាវជ្រាវអំពីវិស័យព័ត៌មាន ដើម្បីពិភាក្សាគ្នា ចែករំលែក បទពិសោធន៍ និងការអនុវត្តល្អៗ ដើម្បីបានជាធាតុចូលសម្រាប់អភវិឌ្ឍន៍ប្រព័ន្ធផ្សព្វផ្សាយនៅកម្ពុជា។
ឯកឧត្តមរដ្ឋមន្ត្រី បញ្ជាក់ថា រាជរដ្ឋាភិបាលកម្ពុជា តែងតែបានប្រកាន់ខ្ជាប់នូវការប្ដេជ្ញាចិត្តយ៉ាងមុតមាំ ក្នុងការធ្វើឲ្យ ប្រសើរឡើងនូវការគោរពសិទ្ធិសេរីភាពខាងសារព័ត៌មាន សេរីភាពខាងបោះពុម្ពផ្សាយ សិទ្ធិសេរីភាព ក្នុងការបញ្ចេញមតិ ដូចដែលមានចែងក្នុងរដ្ឋធម្មនុញ្ញ។ ទន្ទឹមនេះ រាជរដ្ឋាភិបាលតែងតែយកចិត្តទុកដាក់ក្នុងការរក្សានូវបរិយាកាសល្អនៃវិជ្ជាជីវៈសារព័ត៌មាន និងសោតទស្សន៍នៅកម្ពុជា តាមរយៈការធានាបាននូវការគោរពសិទ្ធិសេរីភាពខាង សារព័ត៌មាន និងសេរីភាពខាងបោះពុម្ពផ្សាយដោយស្មើភាព គ្មានការរើសអើង គ្មានការគំរាមកំហែង និងមិនប្រកាន់និន្នាការនយោបាយឡើយ។ បន្ថែមពីនេះ រាជរដ្ឋាភិបាលកម្ពុជាតែងតែចាត់ទុកអ្នកសារព័ត៌មានជាដៃគូ ដែលមិនអាចខ្វះបាន ក្នុងការឆ្លុះបញ្ចាំងពីតថភាពសង្គមគ្រប់ជ្រុងជ្រោយ និង បានចូលរួមចំណែកជាមួយរាជរដ្ឋាភិបាល ក្នុងការប្រយុទ្ធប្រឆាំងអំពើពុករលួយ ការកែទម្រង់ច្បាប់ និងប្រព័ន្ធយុត្តិធម៌ និងការកែទម្រង់រដ្ឋបាលសាធារណៈក្នុងគោលដៅពង្រឹងអភិបាលកិច្ចល្អ ដើម្បីលើកកម្ពស់ឲ្យកាន់តែប្រសើរឡើងនូវលទ្ធិប្រជាធិបតេយ្យ នីតិរដ្ឋ សុខសន្តិភាព និងការអភិវឌ្ឍ សង្គមប្រកបដោយចីរភាព។
ក្នុងឱកាសនោះដែរ ឯកឧត្តម ខៀវ កាញារីទ្ធ បានអំពាវនាវ ដល់អ្នកប្រកបអាជីពសារព័ត៌មានទាំងអស់នៅកម្ពុជា សូមបន្តចូលរួមគោរពច្បាប់លិខិតបទដ្ឋានគតិយុត្តនានា ប្រកាន់ខ្ជាប់ជានិច្ចនូវក្រមសីលធម៌ និង វិជ្ជាជីវៈសារព័ត៌មាន ដោយកុំបំពានសិទ្ធិអ្នកដទៃ និងកុំបំភ្លៃការពិត ព្រមទាំងបន្តអភិវឌ្ឍន៍សមត្ថភាពរបស់ខ្លួន ដើម្បីចូលរួមចំណែកអភិវឌ្ឍន៍វិស័យព័ត៌មានឲ្យកាន់តែរីកចម្រើន ។ លើសពីនេះ អ្នកសារព័ត៌មាន ត្រូវរាយការណ៍នូវព័ត៌មានពិតត្រឹមត្រូវ និងមិនត្រូវធ្វើជាភ្នាក់ងារផលិត និងផ្សព្វផ្សាយនូវព័ត៌មានក្លែងក្លាយ ដែលអាចបង្ករការបែកបាក់ ការស្អប់ខ្ពើម គុំគួន រើសអើង បង្ករជំលោះ និងអរិភាពផ្សេងៗ ក្នុងសង្គម។
អត្ថបទ៖ ក្រសួងព័ត៌មាន
