នៅព្រឹកថ្ងៃទី២៨ ខែតុលា ឆ្នាំ២០២២ ឯកឧត្ដម ផុស សុវណ្ណ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានព៍ត៌មាន និងសោតទស្សន៍នៃក្រសួងព័ត៌មាន បានអញ្ជើញចូលរួមជាអធិបតីក្នុងពិធីបើកសិក្ខាសាលាស្ដីពីសុវត្ថិភាពអ្នកសារព៍ត៌មាន និងការរៀបចំផែនការគ្រប់គ្រងហានិភ័យ ក្រោមកិច្ចសហប្រតិបត្តិការមេគង្គ-ទ្បាងឆាង ឆ្នាំ២០២២-២០២៣ ដែលប្រារព្ធធ្វើទ្បើងនៅសណ្ឋាគារសុខាភ្នំពេញ រ៉េស៊ីដង់។
សិក្ខាសាលានេះ ដែរធ្វើឡើងដោយមានការចូលរួមដោយផ្ទាល់ និងប្រព័ន្ធហ្សូម និងមានការអញ្ជើញចូលរួមជាវាគ្មិនកិត្តិយសពីសំណាក់ ឯកឧត្ដម ប្រាក់ វ៉ាន់ដា ទីប្រឹក្សាក្រសួងព៍ត៌មាន ឯកឧត្ដម ឆាយ សុផល អនុរដ្ឋលេខាធិការក្រសួងព៍ត៌មាន ព្រមទាំងសិក្ខាកាមមកពីគ្រប់បណ្តាក្រសួង ស្ថាប័នពាក់ព័ន្ធទាំងរដ្ឋ និងឯកជនផងដែរ។
ឯកឧត្ដម ផុស សុវណ្ណ បានមានប្រសាសន៍ថា ព័ត៌មាន គឺជាអាហារចាំបាច់ប្រចាំថ្ងៃដែលមិនអាចខ្វះបានដែលធ្វើឱ្យយើងបានដឹងពីព្រឹត្តិការណ៍នានា ដែលកំពុងកើតឡើងក្នុងប្រទេស តំបន់ និងលើសកលលោក ដែលជាលទ្ធផលនៃការខិតខំប្រឹងប្រែងរបស់អ្នកសារព័ត៌មាន។ សារៈសំខាន់នៃការទទួលបានព័ត៌មានដែលអាចជឿទុកចិត្តបានតាមរយៈសារព័ត៌មាន គឺជាបញ្ហាស្លាប់រស់ដែលអាចស្តែងចេញ ជាពិសេសក្នុងករណីមានវិបត្តិដូចជាវិបត្តិនៃការរីករាលដាលនៃជំងឺកូវីដ-១៩ ជាដើម។ អ្នកសារព័ត៌មានហ៊ានលះបង់ពលីជិវិត ដើម្បីរាយការណ៍ព័ត៌មានពិតជូនសាធារណជន ស្របតាមវិជ្ជាជីវៈរបស់ខ្លួន។ ទោះយ៉ាងណាអ្នកសារព័ត៌មានមិនអាចចុះយកព័ត៌មានដោយប្រថុយប្រថាន ដោយគ្មានការគិតគូរពីសុវត្ថិភាពរបស់ខ្លួន និងរៀបចំផែនការគ្រប់គ្រងហានិភ័យមុនចុះទៅយកព័ត៌មាននោះដែរ។ នេះគឺជាការចាំបាច់ដែលអ្នកសារព័ត៌មាន ត្រូវមានសុវត្ថិភាពក្នុងការរាយការណ៍ព័ត៌មាននៃព្រឹត្តិការណ៍ដែលមានហានិភ័យខ្ពស់ និងអាចរាយការណ៍ព័ត៌មានពិតពីព្រឹត្តិការណ៍នោះបាន។
ក្នុងឱកាសនោះដែរ ឯកឧត្ដម ផុស សុវណ្ណ បានមានប្រសាសន៍ថ្លែងអំណរគុណដល់រដ្ឋាភិបាលនៃសាធារណរដ្ឋប្រជាមានិតចិន ដែលបានឧបត្ថម្ភគាំទ្របង្កើតនូវសិក្ខាសាលាដ៏មានសារៈសំខាន់នេះឡើង ក្រោមមូលនិធិមេគង្គ-ទ្បាងឆាង ដែលសិក្ខាសាលាមានគោលបំណង៖
១.ចូលរួមចែករំលែកបទពិសោធន៍ និងចំណេះដឹង ស្តីពីសុវត្ថិភាពអ្នកសារព័ត៌មានក្នុងពេលបំពេញបេសកកម្មការងារក្នុងព្រឹត្តិការណ៍ដែលមានហានិភ័យខ្ពស់
២.ចូលរួមចែករំលែកបទពិសោធន៍ និងចំណេះដឹងស្តីពីការរៀបចំផែនការគ្រប់គ្រងហានិភ័យមុនពេលចុះបំពេញបេសសកម្មការងារ
៣.ប្រមូលធាតុចូល និងការអនុវត្តល្អៗ ដើម្បីរៀបចំគោលនយោបាយ និងបទដ្ឋានគតិយុត្តដើម្បីការពារអ្នកសារព័ត៌មាន និងលើកកម្ពស់សិទ្ធិសេរីភាពអ្នកសារព័ត៌មាន។
ព្រមជាមួយនេះ ឯកឧត្ដម ឆាយ សុផល អនុរដ្ឋលេខាធិការក្រសួងព៍ត៌មាន បានលើកទ្បើងពីចំណុចសំខាន់ៗរបស់អ្នកសារព៍ត៌មានត្រូវមានដូចជា សីលធម៌ និងក្រមសីលធម៌ជាអ្នកសារព័ត៌មាន។ ក្នុងនាមជាអ្នកសារព៍ត៌មាន ត្រូវបែងចែកឲ្យច្បាស់អំពីអត្ថបទដំណឹង និងអត្ថបទទស្សនៈ។ អត្ថបទដំណឹងបែងចែកជា ៤ប្រភេទ គឺដំណឹងទាន់ហេតុការណ៍, អត្ថបទបទយកការណ៍, អត្ថបទដំណឹងវិភាគ, អត្ថបទសេចក្ដីរាយការណ៍ស៊ើបអង្កេត។ ចំពោះអត្ថបទទស្សនៈបែងចែកជា៤ដូចជា បទវិចារណកថា, អត្ថបទស្មេរ, បទអត្ថាធិប្បាយ និងលិខិតមិត្តអ្នកអាន។ ឯកឧត្ដម ឆាយ សុផល ក៏បានលើកឡើងអំពីប្រសាសន៍របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាថា “អ្នកកាសែត កុំបំពានអ្នកដទៃ កុំបំភ្លៃការពិត” ជូនដល់សិក្ខាកាមដែលជាអ្នកសារព័ត៌មានទាំងអស់ ត្រូវគោរព និងអនុវត្តឲ្យបានខ្ជាប់ខ្ជួន៕
