ទេសចរវត្តអារាមជាជ្រុងមួយនៃផលិតផលទេសចរណ៍ដ៏សំខាន់ ដែលមានភាពទាក់ទាញភ្ញៀវទេសចរបរទេសឲ្យចូលមកទស្សនា ឬឈ្វេងយល់ពីទំនៀមទំលាប់សាសនា ហើយក៏មានការចាប់អារម្មណ៍ជាខ្លាំងក្រៅពីប្រាសាទបុរាណនានានៅក្នុងខេត្តសៀមរាប ក្រោយពីវិបត្តិជំងឺកូវិដ-១៩ មានភាពធូរស្បើយ ដោយក្នុងនោះចំនួនភ្ញៀវទេសចរក៏កាន់តែមានកំណើនជាបន្តបន្ទាប់។
ក្នុងឱកាសនាំភ្ញៀវបរទេសជាង ៤០នាក់មកទស្សនា និងឈ្វេងយល់ពីទំនៀមទំលាប ប្រពៃណី សាសនា នៅក្នុងវត្តស្វាយរមៀត ខេត្តសៀមរាប នាថ្ងៃទី២៧ ខែតុលា ឆ្នាំ២០២២នេះ លោក យុន គឹមយ៉ាន មគ្គុទេសក៍ទេសចរណ៍ប្រចាំតំបន់សៀមរាប បានឱ្យដឹងថា នៅពេលដែលរាជរដ្ឋាភិបាលកម្ពុជាបានបើកប្រទេសឡើងវិញយ៉ាងពេញលេញយើងសង្កេតឃើញថា មានភ្ញៀវបរទេសហូរចូលមកកាន់ខេត្តសៀមរាបជាបណ្តើរៗហើយ។ ជាក់ស្តែងនៅតាមទីវត្តអារាម និងប្រាង្គប្រាសាទនានា ដែលមានភ្ញៀវទេសចរណ៍កើនឡើងប្រមាណជា ២០ ទៅ ២៥ភាគរយហើយ បើធៀបទៅនឹងឆ្នាំ២០១៩កន្លងមក។
លោក យុន គឹមយ៉ាន ក៏បានឲ្យដឹងថា គោលដៅចម្បងរបស់ភ្ញៀវទេសចរណ៍បរទេសទាំងអស់ ដែលមកទស្សនាទីក្រុងអរិយធម៌របស់យើង គឺចង់ទៅទស្សនាប្រាសាទអង្គរវត្ត និងប្រាសាទបុរាណផ្សេងៗទៀត។ ក្រៅពីនេះភ្ញៀវទេសចរណ៍ ក៏តែងតែចង់ឈ្វេងយល់ពីវប្បធម៌ និងទំនៀមទម្លាប់ប្រពៃណីខ្មែរ នៅតាមភូមិរបស់ប្រជាពលរដ្ឋ ពួកគាត់ចង់ដឹងពីការរស់នៅរបស់ប្រជាជនខ្មែរ និងចង់ឈ្វេងយល់ពីព្រះពុទ្ធសាសនារបស់ជាតិយើងផងដែរ។ ហើយទេសចរណ៍វត្តអារាមនេះ ជាផលិតផលទេសចរណ៍មួយ ដែលភ្ញៀវទេសចរណ៍បរទេសមានការចាប់អារម្មណ៍ក្រៅពីប្រាសាទបុរាណ គឺកាលពីមិនទាន់មានកូវិដ-១៩ ភ្ញៀវទេសចរណ៍បរទេសតែងតែបានទៅទស្សនាវត្ត ប្រមាណ១០វត្ត ក្នុងក្រុងសៀមរាបយើង ដែលក្រសួងទេសចរណ៍ត្រូវបានកំណត់ជាវត្តអារាមទេសចរណ៍នោះ។
មគ្គុទេសក៍ទេសចរណ៍រូបនេះ ក៏បានបញ្ចាក់ថា ចំពោះកម្មវិធីនាំក្រុមភ្ញៀវបរទេសមកទទួលទានអាហារពេលព្រឹក នឹងទស្សនានៅវត្តស្វាយរមៀតនាពេលនេះដែរ មានចំនួន ៤៣នាក់ ដែលវាជាលើកទី២ ហើយ ដោយលើកទី១ មានភ្ញៀវចម្រុះជាតិប្រមាណជាង ១០០នាក់។ ហើយចាំការនាំភ្ញៀវមកទស្សនានៅវត្តស្វាយរមៀតនេះដែរ គឺដោយសារតែទីវត្តអារាមទេសចរណ៍មួយ មានបរិស្ថានបៃតងស្អាត មានអនាម័យល្អ ដែលធ្វើឱ្យភ្ញៀវទេសចរណ៍ចូលមកឈ្វេងយល់ពីព្រះពុទ្ធសាសនានៅទីនេះ មានការសប្បាយចិត្ត និងពេញចិត្តជាខ្លាំង ចំពោះវត្តដែលក្រសួងបរិស្ថានបានផ្តល់ប័ណ្ណសរសើរថា ជាវត្តមេត្រីបរិស្ថាន មានពណ៍បៃតងស្រស់ស្អាត មានអនាម័យល្អ មានសួនច្បារ និងបន្ទប់ទឹកស្អាតផងដែរ។
សូមបញ្ជាក់ថា វត្តបារាយមហានទីរតនារាម ហៅវត្តស្វាយរមៀត ស្ថិតនៅភូមិបន្ទាយឈើ សង្កាត់ទឹកវិល ក្រុងសៀមរាប ត្រូវបានកំណត់ជាវត្តអារាមទេសចរណ៍ ដែលមានអនាម័យល្អ និងបរិស្ថានបៃតងស្រស់បំព្រង នឹងមានទឹកបារាយណ៍ដ៏ថ្លា គួរជាទីគយគន់ នឹងធ្វើឱ្យអារម្មណ៍អ្នកទស្សនាមានភាពស្រស់ថ្លា៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
