នៅព្រឹកថ្ងៃទី២៨ ខែតុលា ឆ្នាំ២០២២ ឯកឧត្តម គុជ លីណា អនុប្រធានគណ:កម្មាធិការសាខាកាកបាទក្រហមកម្ពុជាខេត្ត បានអញ្ជើញជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ចែកជូនគ្រួសារក្រឡាប់ផែ នៅភូមិដីក្រហម ឃុំកំពង់ភ្លុក ស្រុកប្រាសាទបាគង ខេត្តសៀមរាប។
មានប្រសាសន៍សំណេះសំណាលនាឱកាសនោះ ឯកឧត្តម គុជ លីណា បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណ:កម្មាធិការសាខាខេត្ត ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខប្រជាពលរដ្ឋ គ្រប់រូប ដោយមិនប្រកាន់វណ្ណ: ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ឯកឧត្តម បានលើកឡើងថា បន្ទាប់ពីបានទទួលទទួលព័ត៌មានពីអាជ្ញាធរមូលដ្ឋាន ឯកឧត្តម ប្រធានគណ:កម្មាធិការសាខា បានចាត់ក្រុមការងារចុះជួបសួរសុខទុក្ខ និងនាំយកអំណោយមនុស្សធម៌ចែកជូនផងដែរ។
ឯកឧត្តម បានសំដែងនូវការសោកស្ដាយជាពន់ពេកចំពោះ ហេតុការណ៍ក្រឡាប់ផែ ដែលបណ្ដាលឱ្យកូនតូចៗរងរបួស តែមិនបណ្ដាល់ឱ្យមានគ្រោះថ្នាក់ដល់អាយុជីវិតទេ។ ហើយនេះជាគ្រោះមហន្តរាយដោយធម្មជាតិ ដែលគ្មាននរណាម្នាក់ចង់ជួបប្រទះឡើយ ហើយឯកឧត្តម បានបន្តថា អំណោយមនុស្សធម៌ ដែលបាននាំយកមកជូនបងប្អូននាពេលនេះជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់ គ្រប់ៗគ្នា-មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា”។
អំណោយមនុស្សធម៌ ដែលបានផ្ដល់ជូនមាន៖ អង្ករ ៦០គីឡូក្រាម, មី ២កេស, ត្រីខ ២យួរ, ទឹកត្រី ១យួរ, មុង១, ភួយ១, សារុង និងថវិកា ៤សែនរៀល៕
អត្ថបទ និងរូបភាព៖ សាខាកាកបាទក្រហមខេត្តសៀមរាប
កែសម្រួល៖លោក លីវ សុខុន
