សាខាកាកបាទក្រហមកម្ពុជាខេត្តសៀមរាប នារសៀលថ្ងៃទី២៨ ខែតុលា ឆ្នាំ២០២២ លោក លី ប៊ុនណា លេខាធិការ នៃគណ:កម្មាធិការសាខាកាកបាទក្រហមកម្ពុជាខេត្ត បានអញ្ជើញជាអធិបតីក្នុងពិធីបពាក់ឯកសណ្ឋានជូនសមាជិកថ្មី នៃយុវជនកាកទក្រហមកម្ពុជា ក្នុងវិទ្យាល័យអង្គរ ចំនួន ៧០នាក់ ដែលពិធីនេះបានប្រារព្ធនៅសាលប្រជុំវិទ្យាល័យអង្គរ។
ក្នុងឱកាសនោះ លោក លី ប៊ុនណា បានលើកឡើង អំពីគោលការណ៍សំខាន់ៗ និងគោលបំណងរបស់កាកបាទក្រហមកម្ពុជា ដើម្បីផ្សព្វផ្សាយដល់សមាជិកយុវជនកាកបាទក្រហមកម្ពុជាថ្មី ឱ្យបានជ្រាប និងយល់ដឹងសម្រាប់ជាមូលដ្ឋាន ក្នុងការអភិវឌ្ឍធនធានមនុស្ស ដើម្បីការបំរើសេវាកម្មមនុស្សធម៌ និងចូលរួមការងារក្នុងសង្គម ជាពិសេសសាខាកាកបាទក្រហមកម្ពុជា ខេត្តសៀមរាប។ ការផ្តល់វគ្គបណ្តុះបណ្តាលនេះ មានរយ:ពេល ១ថ្ងៃ ដោយផ្តោតសំខាន់ ស្តីអំពី កាកបាទក្រហម អឌ្ឍចន្ទក្រហម វិជ្ជាសង្គ្រោះបឋម និងការងារគ្រប់គ្រងយុវជនកាកបាទក្រហមកម្ពុជា ព្រមទាំងបញ្រ្ចាបលើប្រធានបទសុវត្ថិភាពចរាចរណ៍ ដើម្បីបានជាមូលដ្ឋានក្នុងការបំពេញការងារមុនស្សធម៌។
លោកលី ប៊ុនណា បន្តថា បន្ថែមលើចំណេះដឹងនេះ ខ្ញុំសូមប្រគល់តួនាទី និងភារកិច្ចដល់ប្អូនៗ ដូចខាងក្រោម៖
– ប្អូនៗជាតំណាងឲ្យយុវជនកាកបាទក្រហមកម្ពុជា ក្នុងស្រទាប់យុវវ័យ។
– ប្អូនៗជាទំពាំងស្នងប្ញស្សីជាអ្នកបន្តវេនក្នុងសកម្មភាពមនុស្សធម៌របស់កាកបាទក្រហមកម្ពុជា។
– ត្រូវគោរពវិន័យសាលា ខិតខំរៀនសូត្រឲ្យបានពូកែ និងធ្វើជាគំរូល្អ ក្នុងស្រទាប់យុវវ័យ។
– ត្រូវផ្សព្វផ្សាយពីគោលការណ៍គ្រឹះនៃចលនាអន្តរជាតិកាកបាទក្រហម អឌ្ឍចន្ទក្រហម និងពីសកម្មភាពមនុស្សធម៌របស់កាកបាទក្រហមកម្ពុជា ក្នុងសាលា និងសហគមន៍។
– ចូលរួមបន្តការអប់រំសុខភាព អនាម័យ បង្ការជំងឺឆ្លង ក៏ដូចជាគ្រោះថ្នាក់ នៃគ្រឿងញៀន។
– ចូលរួមសកម្មភាពមនុស្សធម៌ ក្នុងសាលា ដូចជាជួយដល់មិត្តយុវសិស្សក្រីក្រ រៀនខ្សោយ និងលើកទឹក មិត្តយុវសិស្សពិការផងដែរ។
– ធ្វើជាគំរូល្អ ក្នុងការគោរពច្បាប់ចរាចរណ៍ ដើម្បីរួមចំណែកកាត់បន្ថយគ្រោះថ្នាក់ និងពិការភាពដោយសារគ្រោះថ្នាក់ចរាចរណ៍។
– មានទំនាក់ទំនងស្មើភាព ក្នុងជួរយុវជន ដោយសហការល្អ ចែករំលែកបទពិសោធន៍ជាមួយយុវកាយរឹទ្ធិជាតិកម្ពុជា សហភាពសហព័ន្ធយុវជនកម្ពុជា ក៏ដូចជាជាមួយយុវជនកាកបាទក្រហម អឌ្ឍចន្ទក្រហម នៃបណ្តាប្រទេសជាមិត្តនានាក្នុងសកលលោក។
បន្ទាប់ពីបានទទួលតួនារី និងភារកិច្ច និងដើម្បីឆ្លើយតបនឹងប្រសាសន៍ផ្ដាំផ្ញើ និងការប្រគល់ភារកិច្ចរបស់គណ:អធិបតី តំណាងយុវជនថ្មី បានធ្វើការប្ដេជ្ញាចិត្តដូចតទៅ៖
– ប្ដេជ្ញា រៀនសូត្រឱ្យបានពូកែ គោរពវិន័យ សីលធម៌ ឱ្យក្លាយជាសិស្សល្អ កូនល្អ និងមិត្តល្អ។
– ប្ដេជ្ញា បំពេញតួនាទីភារកិច្ចជា យុវជនកាកបាទក្រហមកម្ពុជា។
– ប្តេជ្ញា ទ្រទ្រង់ និងចូលរួមសកម្មភាពមនុស្សធម៌ឱ្យបានកាន់តែច្រើន ទាំងក្នុង និងក្រៅសាលារៀន។
– ប្ដេជ្ញា អភិវឌ្ឍសមត្ថភាពរបស់ខ្លួន ឱ្យក្លាយជាពលរដ្ឋល្អទៅអនាគត៕
អត្ថបទ និងរូបភាព៖សាខាកាកបាទក្រហមខេត្តសៀមរាប
កែសម្រួល៖ លោក លីវ សុខុន
