នៅព្រឹកថ្ងៃទី៣០ ខែតុលា ឆ្នាំ២០២២ ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានដឹកនាំសហការី នាំយកអំណោយមនុស្សធម៌ចូលរួមបុណ្យសពជនរងគ្រោះដោយគ្រោះថ្នាក់ចរាចរណ៍ចំនួន ៤នាក់ កាលពីយប់ថ្ងៃទី២៨ ខែតុលា ឆ្នាំ២០២២កន្លងទៅ នៅចំណុចផ្លូវលេខ២០១ ក្នុងភូមិចុងថ្នល់ ឃុំយាង ស្រុកពួក ខេត្តសៀមរាប។
មានប្រសាសន៍នាឱកាសនោះ ឯកឧត្តម គុជ លីណា បានជម្រាបជូនដល់ក្រុមគ្រួសារសពថា បន្ទាប់ពីទទួលបានព័ត៌មាននេះភ្លាម ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានចាត់ឲ្យឯកឧត្តម និងក្រុមប្រតិបត្តិសាខាកាកបាទក្រហមកម្ពុជាខេត្ត នាំយកនាំយកអំណោយមនុស្សធម៌មកចូលរួមបុណ្យសព និងសូមចូលរួមនូវការរំលែកទុក្ខយ៉ាងក្រៀមក្រំជាមួយក្រុមគ្រួសារទាំងអស់។ ឯកឧត្តមបន្ដថា ក្នុងនាមគណៈកម្មាធិការសាខា និងក្រុមប្រតិបត្តិ សូមចូលរួមរំលែកទុក និងសោកស្ដាយជាពន់ពេក ចំពោះការបាត់សមាជិកកគ្រួសារជាទីស្រលាញ់ ជាពិសេសគ្រួសារប្អូនប្រុសដែលបានបាត់បង់សមាជិករហូតដល់ ៣នាក់ ក្នុងពេលតែមួយគឺ ភរិយា និងកូនៗជាទីស្រលាញ់ស្មើជីវិត។ ទុក្ខព្រួយនៃការបាត់បង់នេះគ្មានអ្វីប្រៀបបានឡើយ ហេតុនេះ ក្រុមការងារសាខា និងកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន សូមសំដែងនូវការចូលរួមរលែកទុក្ខដ៏ក្រៀមក្រំនេះផង។
គួរឲ្យដឹងថា ជនរងគ្រោះដែលបានស្លាប់ក្នុងករណីគ្រោះថ្នាក់ចរាចរណ៍ទាំង ៤នាក់ខាងលើនេះគឺ៖១-ឈ្មោះ សោម អ៊ាង ភេទស្រី អាយុ៣០ឆ្នំា ត្រូវជាម្ដាយ, ២-ឈ្មោះ ឆេង ឧត្ដម ភេទប្រុស អាយុ ៩ឆ្នំា ត្រូវជាកូន, ៣-ឈ្មោះ ឆេង វ៉ាន់ ឌី ភេទ ប្រុសអាយុ ៤ឆ្នំា ត្រូវជាកូន និង៤-ឈ្មោះ រឹទ្ធ ផល្លា ភេទស្រី អាយុ ១៧ឆ្នំា ដែលអ្នកទាំង៤ រស់នៅក្នុងភូមិឃុំខាលើជាមួយគ្នា។
ចំពោះអំណោយដែលបានចូលរួមបុណ្យសពនាពេលនេះដែរមាន៖ គ្រួសារសព ៣នាក់ម្ដាយកូនទទួលបាន៖ អង្ករ ៩០គីឡូក្រាម មុង៣ ភួយ៣ សារុង៣ ក្រមា៣ ត្រីខ៣យួរ ទឹកត្រី៣យួរ មី៣កេស ថវិកា១លានរៀល។ ចំនែកគ្រួសារសពម្នាក់ទៀតទទួលបាន៖ អង្ករ ៣០គីឡូក្រាម មុង១ ភួយ១ សារុង១ ក្រមា១ ត្រីខ១យួរ ទឹកត្រី១យួរ មី១កេស ថវិកា២សែនរៀល។ ជាមួយគ្នានោះអនុសាខាកាកបាទក្រហមកម្ពុជាស្រុកពួក ក៏បានចូលរួមបុណ្យនូវសម្ភារ និងថវិកាមួយចំនួនផងដែរ៕
#សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក អ៊ុន ណារាជ្យ
