នៅថ្ងៃទី២៩ និងទី៣០ ខែតុលា ឆ្នាំ២០២២ ព្រះបវរវិជ្ជា ទេព ភឿន ព្រះរាជាគណៈថ្នាក់កិត្តិយស និងជាព្រះចៅអធិការវត្តបុព្វទិសារាម ហៅវត្តកំពង់ក្តី រួមជាមួយនឹងពុទ្ឋបរិសទជិតឆ្ងាយ រួមទាំងគណៈកម្មការអាចារ្យវត្ត បានមូលមតិគ្នាជាឯកច្ឆ័ន្ទរៀបចំអង្គកឋិនទានសាមគ្គីដង្ហែចូលទៅកាន់វត្តប្រាសាទលលៃ ស្ថិតក្នុងឃុំបាគង ស្រុកប្រាសាទបាគង ខេត្តសៀមរាប ដើម្បីវេរប្រគេនព្រះសង្ឃ ដោយប្រមូលបច្ច័យបានចំនួនជាង ២៥លានរៀលសម្រាប់បន្តសាងសង់កុដិព្រះចៅអធិការវត្ត ដែលទើបតែកសាងបានបាតគ្រឺះ និងសសរនៅឡើយ។
ព្រះបវរវិជ្ជា ទេព ភឿន មានសង្ឃដីកាថា ឆ្នាំនេះដោយសារតែវិបត្តិជំងឺកូវីដ-១៩ នៅកម្ពុជាមានការថយចុះជាលំដាប់ អាស្រ័យដោយគុណបុណ្យ និងការគិតគូរយ៉ាងប្តូរផ្តាច់របស់សម្តេចតេជោសែន នាយករដ្ឋមន្ត្រី សម្តេចបានខិតខំប្រឹងប្រែងពុះពារស្វែងរកវ៉ាក់សាំងចាក់ការពារជូនបងប្អូនប្រជាពលរដ្ឋនៅទូទាំងប្រទេសដោយឥតគិតថ្លៃ បានធ្វើឱ្យស្ថានភាពនៃការឆ្លងមានការថយចុះជាលំដាប់ហើយសម្រេចបើកប្រទេសពេញលេញឡើងវិញ តាមរយៈការណែនាំឱ្យបងប្អូនគ្រប់ទីកន្លែងរៀនរស់តាមបែបគន្លងថ្មី ដើម្បីទប់ស្កាត់ ការពារការឆ្លងរីករាលដាលទៅក្នុងសហគមន៍ ទើបមានការជួបជុំធ្វើបុណ្យទានឡើងវិញ បន្ទាប់ពីអាក់ខានអស់រយៈពេលជាង ២ឆ្នាំ។
ព្រះអង្គ មានសង្សដីកាបញ្ជាក់ថា កឋិនទាន ជាកាលទានមានផលវិសេសជាងទានទាំងពួង ព្រោះបានផលដល់ទាយកម្ចាស់ទានផង បានអានិសង្ឍដល់ភិក្ខុជា អ្នកទទួលក្រាលគ្រងផង។ កឋិនទាន ជាពិធីបែបព្រះពុទ្ឋសាសនា តែងត្រូវបានដង្ហែចូលគ្រប់ទីអារាមទាំងអស់ ពុំមានទំនេរវត្ដណាមួយត្រូវបានខកខានឡើយ។ ដូច្នេះគេតែងតែឃើញក្បួនកឋិនទានតែងបានដង្ហែទៅកាន់ទីអារាមនានា ហើយបើទីអារាមណាមួយ មិនមានកឋិនណាមួយហែចូលទេ ទីអារាមនោះក៏ត្រូវតែរៀបចំជាកឋិនជើងវត្តដែរ។ ជាធម្មតាព្រះសង្ឃពឹងលើទាននិងបច្ច័យពីប្រជាពុទ្ឋបរិស័ទ ទីវត្តអារាមដែលមានការរីកចំរើនទៅបាន គឺមិនអាចខ្វះបានពីការចូលរួមរបស់ប្រជាពុទ្ឋបរិស័ទជិតឆ្ងាយដែលមានសទ្ឋាជឿជាក់លើព្រះពុទ្ឋសាសនា ក្រោមគោលការណ៍ជាមូលដ្ឋាន ព្រះពុទ្ធសាសនា ផ្សារភ្ជាប់ សង្គម ទើបអាចអភិវឌ្ឍន៍និងកសាងទីអារាមបានសមរម្យ៕
អត្ថបទ និងរូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
