នាសាលប្រជុំព្រះវិហារ ក្រសួងព័ត៌មាន នៅព្រឹកថ្ងៃទី៣១ ខែតុលា ឆ្នាំ២០២២នេះ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន អញ្ជើញជាអធិបតីនៃប្រជុំសាមញ្ញ ប្រចាំសប្តាហ៍ទូ៤ ចុងខែតុលា ឆ្នាំ២០២២ ថ្នាក់ដឹកនាំក្រសួងព័ត៌មាន ដោយមានការចូលរួមផ្ទាល់ និងតាមរយៈប្រព័ន្ធ វីដេអូ Zoom ដើម្បីពិនិត្យវឌ្ឍនភាពការងារ ដែលសម្រេចអនុវត្តន៍បាននាពេលកន្លងមក និងផែនការការងារដែលត្រូវបំពេញបន្តបន្ទាប់ខាងមុខទៀត។
ឯកឧត្តមរដ្ឋមន្រ្តី ខៀវ កាញារីទ្ធ បានសំដែងនូវការកោតសរសើរ និងវាយតំលៃខ្ពស់ ចំពោះថ្នាក់ដឹកនាំមន្រ្តីរាជការគ្រប់លំដាប់ថ្នាក់ ក្នុងការខិតខំប្រឹងប្រែងទោះបីខ្វះខាតសំភារៈ និងមន្រ្តីបំពេញការងារនៅមានចំនួនតិច ប៉ុន្តែបានព្យាយាមបំពេញរាល់គ្រប់ភារកិច្ចបានដោយរលូន ក្នុងកិច្ចការងារលើកកម្ពស់វិស័យព័ត៌មាន និងផ្សព្វផ្សាយបានយ៉ាងល្អប្រសើរ។ អ្វីដែលសំខាន់ និងជាមុខមាត់សម្រាប់ប្រទេសជាតិ គឺនៅក្នុងខែវិច្ឆិកាខាងមុខនេះ មានព្រឹត្តការណ៍ជាប្រវត្តិសាស្រ្តមួយថ្មីទៀត គឺដំណើរការរៀបចំកិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំពាក់ពន្ធ័នានា ដែលកម្ពុជាធ្វើជាម្ចាស់ផ្ទះរៀបចំ ហើយក្នុងនោះមានកិច្ចការងារធ្ងន់ៗ និងសំខាន់ៗ ដែលក្រសួងព័ត៌មា មានភារកិច្ចទទួលខុសត្រូវធ្វើអោយបានល្អបំផុត ព្រោះជាកិត្តិយសដ៏ធំធេងរបស់ប្រទេសកម្ពុជា។
ទន្ទឹមនេះក្រសួងព័ត៌មាន ក៏បាននឹងកំពុងត្រៀមរៀបចំពិធីជួបជុំរវាងសម្តេចតេជោនាយករដ្ឋមន្រ្តី ហ៊ុន សែន ជាមួយអ្នកសារព័ត៌មាន នាថ្ងៃទី១៤ ខែមករា ឆ្នាំ២០២៣ រួមទាំងកិច្ចការងារសំខាន់ៗជាច្រើនទៀត ដូចជាការជម្រុញដល់មន្ទីរព័ត៌មានផលិតឯកសារវីដេអូ បង្ហាញពីស្នាដៃ និងសមិទ្ធិផលសំខាន់តាមបណ្តាខេត្ត រាជធានី ដើម្បីចាក់ផ្សាយអោយសាធារណជនបានឃើញពីអ្វីដែលបណ្តាខេត្តរាជធានីខិតខំធ្វើបានក្នុងរយៈពេល ១អាណត្តិកន្លងទៅនេះ៕
