នាព្រឹកថ្ងៃទី៣១ ខែតុលា ឆ្នាំ២០២២ លោក នាក់ ណេរ៉ុន អភិបាលរងខេត្ដសៀមរាប បានដឹកនាំក្រុមការងារ រួមនឹងលោកលោកស្រីប្រធានមន្ទីរអង្គភាពក្នុងខេត្ត រួមជាមួយអភិបាលស្រុក នាំយកអំណោយជាគឿងឧបភោគបរិភោគ របស់រាជរដ្ឋាភិបាលកម្ពុជាចែកជូនដល់ប្រជាពលរដ្ឋរងគ្រោះទឹកជំនន់ចំនួន ១,០៥៣គ្រួសារ ក្នុងស្រុកវ៉ារិន រួមមាន៖ ឃុំស្វាយសចំនួន ២៥៣គ្រួសារ ឃុំប្រាសាទចំនួន ៤០០គ្រួសារ និងឃុំវ៉រិនចំនួន ៤០០គ្រួសារ ដែលពិធីនេះធ្វើឡើងក្នុងបរិវេនសាលាស្រុកវ៉ារិន។
លោក នាក់ ណេរ៉ុន មានប្រសាសន៍ថា ការផ្ដល់ជូនស្បៀងនេះជាការយកចិត្ដទុកដាក់ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលកន្លងមកប្រមុខរាជរដ្ឋាភិបាលតែងតែបានគិតគូរ និងបានឧបត្ថម្ភគាំទ្រជាបន្តបន្ទាប់ដល់ប្រជាពលរដ្ឋដែលរងផលប៉ះពាល់ពីគ្រោះមហន្តរាយផ្សេងៗជាដើម។ ចំពោះអំណោយដែលចែកជូននាពេលនេះដែរ វាអាចជួយសម្រួលដល់ជីវភាពរបស់បងប្អូនប្រជជាពលរដ្ឋបានមួយគ្រាៗ ដែលជាការបង្ហាញឲ្យឃើញពីការយកចិត្ដទុកដាក់ពីរាជរដ្ឋាភិបាល ចំពោះបងប្អូនដែលបានរងនូវផលបះពាល់ពីគ្រោះមហន្តរាយដោយសារទឹកជំនន់នោះ។
លោក នាក់ ណេរ៉ុន ក៏បានណែនាំដល់បងប្អូនទាំងអស់សូមឲ្យបងប្អូនប្រជាពលរដ្ឋទាំងអស់មេត្តាប្រុងប្រយ័ត្នឲ្យបានខ្ពស់ចំពោះអនាម័យ បរិស្ថាន និងសុខភាពឲ្យបានល្អប្រសើរជៀសវាងការឆ្លងរីករាលដាលពីជម្ងឺផ្សេងៗដោយប្រការណាមួយជាយថាហេតុក្នុងការរស់នៅប្រចាំថ្ងៃរបស់យើងជាដើម។
បើយោងតាមរបាយការណ៍ របស់រដ្ឋបាលខេត្ដសៀមរាប បានបង្ហាញថា គិតចាប់ពីថ្ងៃទី១៧ ខែតុលា ឆ្នាំ២០២២នេះ ការបែងចែកស្បៀង និងគ្រឧងឧបភោគ បរិភោគ ដល់ប្រជាពលរដ្ឋមានផលប៉ះពាល់ដោយគ្រោះមហន្ដរាយពីគណៈកម្មការគ្រប់គ្រងប្រព័ន្ធស្បៀងបម្រុងកម្ពុជាមានចំនួនជាង ៦ពាន់គ្រួសារ ក្នុងចំណោមប្រជាពលរដ្ឋរងគ្រោះដោយទឹកជំនន់ ១ម៉ឺន ៤៥០គ្រួសារ ក្នុងស្រុកចំនួន ៨ស្រុកនៃខេត្ដសៀមរាប៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
