ថ្លែងក្នុងវេទិកាពិគ្រោះយោបល់ ស្តីពីភាពជាដៃគូរវាងរដ្ឋបាលខេត្តសៀមរាប ជាមួយសមាគម អង្គការ-សង្គមស៊ីវិល និងសហគមន៍ នៅព្រឹកថ្ងៃទី៣១ ខែតុលា ឆ្នាំ២០២១ លោក អ៊ឹង គឹមលាង អភិបាលរងខេត្តសៀមរាប បានលើកឡើងថា ក្នុងនាមជាសេនាធិការជូនក្រសួងមហាផ្ទៃ សូមថ្លែងនូវការស្វាគមន៍ និងស្នើឲ្យដៃគូអភិវឌ្ឍទាំងអស់បន្តការគំាទ្រ និងចូលរួមដោយស្មោះត្រង់បំផុតជាមួយរាជរដ្ឋាភិបាលកម្ពុជា អាជ្ញាធរខេត្ត ក្នុងការលើកកម្ពស់លទ្ធិប្រជាធិបតេយ្យ សេរីពហុបក្ស និងការគោរពសិទ្ធិមនុស្ស គំាទ្រកិច្ចដំណើរការវិស័យកំណែទម្រង់នានា របស់រាជរដ្ឋាភិបាល ជាពិសេសកំណែទម្រង់វិមជ្ឈការ និងវិសហមជ្ឈការនៅរដ្ឋបាលថ្នាក់ក្រោមជាតិ។
លោក អ៊ឹង គឹមលាង បានបញ្ជាក់ថា សមាគម និងអង្គការមិនមែនរដ្ឋាភិបាលដែលបានចុះបញ្ជីនៅក្រសួងមហាផ្ទៃ ព្រមទាំងសមាគម និងអង្គការក្រៅរដ្ឋាភិបាលបរទេស ដែលបានចុះអនុស្សរណៈជាមួយក្រសួងការបរទេស និងសហប្រតិបត្តិការអន្តរជាតិ ត្រូវបន្តអនុវត្តសកម្មភាពរបស់ខ្លួន ស្របតាមបទប្បញ្ញត្តិនៃច្បាប់ស្តីពីសមាគម និងអង្គការមិនមែនរដ្ឋាភិបាល ច្បាប់ និងលិខិតបទដ្ឋានគតិយុត្តនានានាជាធរមាន។ ក្នុងនាមអភិបាលរងខេត្ត ទទួលបន្ទុកកិច្ចការអង្គការ សមាគមស៊ីវិល លោកបានសង្កត់ធ្ងន់ថា សមាគម និងអង្គការមិនមែនរដ្ឋាភិបាលទាំងអស់ ត្រូវចៀសវាងឲ្យបានដាច់ខាត នូវសកម្មភាពទំាងឡាយណា ដែលអាចជាប់ពាក់ព័ន្ធ ឬគំាទ្រដល់ការលាងសម្អាតប្រាក់ ហិរញ្ញប្បទាន ភេរវកម្ម និងហិរញ្ញប្បទានអាវុធប្រល័យលោកជាដើម ដើម្បីចៀសផុតពីការធ្វើឱ្យកម្ពុជាធ្លាក់ចូលទៅក្នុងបញ្ជីប្រផេះ និងទទួលបច្ច័យជាអវិជ្ជមានលើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយ។
លោកអភិបាលរងខេត្ត ក៏បានថ្លែងកោតសរសើរផងដែរ៖ ចំពោះអង្គការសមាគមស៊ីវិលក្នុងខេត្ត ដែលបានដើរតួនាទីយ៉ាងសំខាន់ ក្រោមកិច្ចសហការជាមួយស្ថាប័នរដ្ឋ ចូលរួមក្នុងការងារអភិវឌ្ឍសង្គម ពាក់ព័ន្ធលើវិស័យអប់រំ កសិកម្ម សិប្បកម្ម សុខាភិបាល សង្គមកិច្ច បណ្តុះបណ្តាលវិជ្ជាជីវៈ សិល្បៈ កិច្ចការបរិស្ថាន និងអភិរក្សធនធានធម្មជាតិ ព្រៃឈើ ទេសចរណ៍ គ្រឿងញៀន សាសនា លើកកម្ពស់សិទ្ធិស្ត្រី កុមារ និងការពារជនងាយរងគ្រោះ ច្បាប់ និងសិទ្ធិមនុស្ស ជាដើម។
ព័ត៌មានជាតិ ថ្មីៗ
បើតាមលោកស្រី ញាណ ភួងម៉ាលី ប្រធានបណ្ដាញសមាគម-អង្គការមិនមែនរដ្ឋាភិបាលប្រចាំខេត្តសៀមរាប បានបង្ហាញថា កន្លងមកសមាគម និងអង្គការមិនមែនរដ្ឋាភិបាលមួយចំនួនក្នុងខេត្ត ពុំបានជូនដំណឹងជាលាយលក្ខណ៍អក្សរទៅក្រសួងមហាផ្ទៃ ក្រសួងការបរទេស និងសហប្រតិបត្តិការអន្តរជាតិ និងក្រសួងសេដ្ឋកិច្ច និងហិរញ្ញវត្ថុ អំពីការធ្វើវិសោធនកម្មលក្ខន្តិកៈ ឬផ្លាស់ប្តូរទីស្នាក់ការ ឬការផ្លាស់ប្តូរតួនាទីថ្នាក់ដឹកនាំស្ថាប័ន ឬការប្រែប្រួលព័ត៌មានគណនីធនាគារ របាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំ ជូនទៅក្រសួង-ស្ថាប័ន តាមច្បាប់បានកំណត់នៅឡើយ។ ជាមួយគ្នានោះក៏មានសមាគម និងអង្គការមិនមែនរដ្ឋាភិបាលមួយចំនួនក្នុងខេត្ត បានធ្វើសកម្មភាព និងដើរតួនាទីជាអាជ្ញាធរមានសមត្ថកិច្ច ក្នុងការរៀបចំដីសម្បទានសង្គមកិច្ច និងការទប់ស្កាត់សកម្មភាពល្មើសច្បាប់មួយចំនួន ជាពិសេសបទល្មើសព្រៃឈើ ជលផល និងធនធានធម្មជាតិ និងពុំសូវមានកិច្ចសហការជាមួយអាជ្ញាធរមានសមត្ថកិច្ច និងអាជ្ញាធរមូលដ្ឋានឡើយ ជាពិសេសការដាក់ទីតាំងត្រួតពិនិត្យដូចជាអាជ្ញាធរមានសមត្ថកិច្ច។
គួរជម្រាបថា៖ សមាគម អង្គការក្រៅរដ្ឋាភិបាល និងសហគមន៍ ដែលក្រសួងស្ថាប័នពាក់ព័ន្ធទទួលស្គាល់ជាផ្លូវការកំពុងប្រតិបត្តិការ និងមានស្នាក់ការនៅក្នុងខេត្តសៀមរាប សរុបមានចំនួន ៣៩១ស្ថាប័ន ក្នុងនោះសមាគម និងអង្គការមិនមែនរដ្ឋាភិបាល ក្នុងស្រុកមានចំនួន ២៦១ សមាគម និងអង្គការមិនមែនរដ្ឋាភិបាលបរទេស មានចំនួន៤៦ រួមទាំងសហគមន៍ព្រៃឈើ មានចំនួន៦២ និងសហគមន៍នេសាទ មានចំនួន ២២៕
អត្ថបទ និងរូបភាព៖ លោក អ៊ុន ណារាជ្យ
