ក្រសួងទេសចរណ៍កម្ពុជា បានដឹកនាំរៀបចំកិច្ចប្រជុំមន្ត្រីជាន់ខ្ពស់ទេសចរណ៍អេកម៉ិក (ACMECS) លើកទី៥ កិច្ចប្រជុំរដ្ឋមន្ត្រី និងឧត្តមមន្ត្រីទេសចរណ៍កម្ពុជា ឡាវ ម៉ីយ៉ាន់ម៉ា ថៃ និងវៀតណាម (CLMV) លើកទី៦ អមដោយកិច្ចសន្ទនាទេសចរណ៍ ACMECS-CLMV លើកទី១ ដែលកិច្ចប្រជុំនេះចាប់ពីថ្ងៃទី១ ដល់ទី៥ ខែវិច្ឆិកា ឆ្នាំ២០២២ នៅខេត្តសៀមរាប ដោយមានការចូលរួមពីថ្នាក់រដ្ឋមន្ត្រីទេសចរណ៍អេកម៉ិក អគ្គនាយកទេសចរណ៍ ACMECS ដែលមានសមាសភាពជិត ៥០នាក់។
ក្នុងកិច្ចប្រជុំនេះដែរ ឧត្តមមន្ត្រីទេសចរណ៍ ACMECS បានដាក់ចេញផែនការយុទ្ធសាស្ត្រស្តារ និងអភិវឌ្ឍស័យទេសចរណ៍ ACMECS ក្នុងអំឡុង និងក្រោយវិបត្តិកូវីដ-១៩ ឆ្ពោះទៅកាន់ចីរភាព និងភាពធន់កាន់តែប្រសើរឡើង។ កិច្ចប្រជុំក៏បានពិភាក្សា និងឯកភាពគ្នា ដើម្បីគាំទ្រដល់ផែនការសកម្មភាព និងកិច្ចសហប្រតិបត្តិការរបស់ទេសចរណ៍ ACMECS រួមមានពិនិត្យ និងវាយតម្លៃលើផែនការសកម្មភាពទេសចរណ៍ ACMECS ២០១៩-២០២៣ ដែលបានអនុម័តកាលពីកិច្ចប្រជុំរដ្ឋមន្ត្រីទេសចរណ៍ ACMECS លើកទី៤ នៅឈៀងរៃ ប្រទេសថៃ ដោយពិនិត្យឃើញថា ដោយសារវិបត្តិកូវីដ-១៩ កំណើនទេសចរណ៍ផ្ទៃក្នុងតំបន់ ACMECS មានការកើនឡើងធៀបទៅនឹងទេសចរណ៍ផ្ទៃក្នុងមុនកូវីដ-១៩។
កិច្ចប្រជុំក៏បានរៀបចំនូវសកម្មភាពការងារ ២០២៣-២០២៥ ដែលផ្តោតសំខាន់លើការអភិវឌ្ឍន៍ផលិតផលទេសចរណ៍ ការផ្លាស់ប្តូរព័ត៌មានទេសចរណ៍ ការអភិវឌ្ឍធនធានមនុស្ស ការផ្សព្វផ្សាយទីផ្សារទេសចរណ៍ និងការរៀបចំបង្កើតផលិតផលទេសចរណ៏ផ្សារភ្ជាប់ជាមួយវិស័យឯកជន ដើម្បីចូលរួមអនុវត្តផែនការស្តារ និងអភិវឌ្ឍន៍វិស័យទេសចរណ៍ ACMECS ក្នុងអំឡុង និងក្រោយវិបត្តិកូវីដ-១៩ ឆ្ពោះទៅកាន់ចីរភាព និងភាពធម៌កាន់តែប្រសើរឡើង។ ជាមួយគ្នានោះ ការរៀបចំ និងបង្កើតក្របខណ្ឌគោលនយោបាយសម្រាប់ការអភិវឌ្ឍទេសចរណ៍ ACMECS ប្រកបដោយចីរភាព ដោយផ្អែកលើការសិក្សាវាយតម្លៃលើទំហំប៉ះពាល់លើរដ្ឋមន្ត្រី និងថ្នាក់ដឹកនាំទេសចរណ៍នៃអនុតំបន់នីមួយៗ នឹងពិភាក្សា និងវាយតម្លៃដាក់ចេញនូវយុទ្ធសាស្ត្រ និងផែនការការងារស្តារ និងអភិវឌ្ឍន៍វិស័យទេសចរណ៍រួមគ្នា ព្រមទាំងបង្កើនកិច្ចសហប្រតិបត្តិការអនុតំបន់របស់ខ្លួនស្របតាមនិន្នាការទេសចរណ៍នាពេលបច្ចុប្បន្ន និងអនាគត៕
ព័ត៌មានជាតិ ថ្មីៗ
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
