នៅព្រឹកថ្ងៃទី៣ ខែវិច្ឆិកា ឆ្នាំ២០២២នេះ ក្រុមប្រឹក្សាខេត្តសៀមរាប បានបើកកិច្ចប្រជុំសាមញ្ញលើកទី៤២ ក្នុងឆ្នាំទី៤ នៃអាណត្តិទី៣ ដឹកនាំដោយ ឯកឧត្តម អ៊ាន ឃុន ប្រធានក្រុមប្រឹក្សាខេត្ត ឯកឧត្តម ទៀ សីហា អភិបាលខេត្តសៀមរាប ព្រមទាំងវត្តមានចូលរួមពីឯកឧត្តម លោកជំទាវ ជាសមាជិកក្រុមប្រឹក្សាខេត្ត លោក លោកស្រីអភិបាលរងខេត្ត និងមន្ទីរ អង្គភាពជុំវិញខេត្តផងដែរ។
របៀបវារៈដែលត្រូវប្រជុំពិភាក្សានៅក្នុងកិច្ចប្រជុំនេះ មានចំនួន៧ រួមមាន ការសុំច្បាប់របស់សមាជិកក្រុមប្រឹក្សាខេត្ត សេចក្តីព្រាងកំណត់ហេតុកិច្ចប្រជុំសាមញ្ញលើកទី៤១ សេចក្តីព្រាងប្រជុំវិសាមញ្ញ សេចក្តីព្រាងរបាយការណ៍ប្រចាំខែ តុលា ការបង្កើតគណៈកម្មការដឹកនាំវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តឆ្នាំ២០២២ សេចក្តីព្រាងសម្រេចពីការទទួលស្គាល់ប្រធាន អនុប្រធាន សមាជិកគណៈកម្មាធិការពិគ្រោះយោបល់កិច្ចការស្រី្តនិងកុមារ និង បញ្ហាផ្សេងៗ ។
ក្នុងកិច្ចពិភាក្សានោះដែរសមាជិកក្រុមប្រឹក្សាខេត្ត បានលើកនូវបញ្ហារបស់សិស្សានុសិស្ស បើកបរមិនគោរពច្បាប់ចរាចរណ៍ ប្រជាពលរដ្ឋបើកបរបំពានស្លាកសញ្ញាចរាចរណ៍ និងបានស្នើដល់មន្ទីរអប់រំយុវជន និងកីឡាខេត្ត គួរបន្ថែមការបញ្ជ្រាបចំណេះដឹងអំពីច្បាប់ចរាចរណ៍នៅចុងម៉ោងសិក្សាផងដែរ។ បន្ថែមពីនោះ សមាជិកក្រុមប្រឹក្សាខេត្ត ស្នើអាជ្ញាធរពាក់ព័ន្ធចាត់វិធានការដល់ជនអនាថា និងអ្នកសុំទាននៅរមណីយដ្ឋានភ្នំគូលែន ដែលមានចំនួនកើនឡើងគួរឱ្យកត់សម្គាល់។
ព័ត៌មានជាតិ ថ្មីៗ
ជាការឆ្លើយតបឯកឧត្តម ទៀ សីហា បានទទួលស្គាល់ថា បញ្ហាមិនគោរពច្បាប់ចរាចរណ៍ក្នុងខេត្ត នៅកើតមានជារឿយ ក្នុងនោះឯកឧត្តមអភិបាលខេត្ត ធ្លាប់បានណែនាំដល់លោកប្រធានមន្ទីរអប់រំយុវជន និងកីឡាខេត្ត បញ្ជ្រាបពីចំណេះដឹងលើច្បាប់ចរាចរណ៍ និងស្វែងរកដៃគូសហការផ្សព្វផ្សាយឱ្យបានកាន់តែទូលំទូលាយផងដែរ។ ឯកឧត្តមបន្ថែមថា បច្ចុប្បន្នផ្លូវ ៣៨ខ្សែបានស្ថាបនា ដាក់ស្លាកសញ្ញាចរាចរណ៍ និងគំនូសចរាចរណ៍រួចរាល់ ហើយរយៈពេលនេះក៏សមរម្យ ដែលអនុគ្រោះដល់ប្រជាពលរដ្ឋ ធ្វើការស្វែងយល់ពីស្លាកសញ្ញាចរាចរណ៍ទាំងនេះ ដូច្នេះនេះជាពេលវេលាដែលនគរបាលចរាចរណ៍ត្រូវចាប់ផ្ដើមរឹតបន្តឹងការគោរពច្បាប់ចរាចរណ៍ក្នុងក្រុងឱ្យបានល្អប្រសើរ។
ដោយឡែក ចំពោះជនអនាថា និងអ្នកសុំទាននៅរមណីយដ្ឋានភ្នំគូលែន ដែលចេះតែមានចំនួនកើនឡើង ឯកឧត្តម ទៀ សីហា បានណែនាំដល់រដ្ឋបាលស្រុកក្នុងតំបន់នោះ សហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទា ធ្វើការកំណត់អត្តសញ្ញាណជនទាំងនោះ ដើម្បីចាត់វិធានសមស្របណាមួយ។
ឆ្លៀតក្នុងឱកាសនោះដែរ ឯកឧត្តមអភិបាលខេត្ត បានគូសបញ្ជាក់ថា ព្រឹត្តិការណ៍សំខាន់ៗក្នុង ក៏ដូចជាគ្រោះធម្មជាតិបានកន្លងផុតទៅ រដ្ឋបាលខេត្តនឹងបន្តអនុវត្ត និង ពន្លឿនកិច្ចការងារដោះស្រាយ វាស់វែងដីជុំវិញបឹងទន្លេសាប នៅតាមបណ្ដាក្រុង ស្រុកទាំង៦ និងធ្វើការកាត់ឆ្វៀលចេញពីតំបន់៣ មកជាតំបន់២ និងមកជាតំបន់១ ជូនបងប្អូនប្រជាពលរដ្ឋឱ្យបានឆាប់រហ័ស។ ជាមួយគ្នានោះ ឯកឧត្តម ក៏បានបង្ហាញដែរថា ក្រោយវិបត្តិកូវីដ-១៩ មានសភាពធូរស្រាល ក្នុងមួយថ្ងៃ មានអ្នកដំណើរតាមយន្តហោះមកកាន់ខេត្តសៀមរាប ចន្លោះ៦០០-៨០០នាក់ ព្រមជាមួយជើងហោះហើរត្រង់ថ្មីពីប្រទេសឡាវ និងប្រទេសវៀតណាមផងដែរ។ លើសពីនោះ កិច្ចប្រជុំសំខាន់ៗថ្នាក់ជាតិ និងអន្តរជាតិ បានបន្តរៀបចំជាបន្តបន្ទាប់នៅក្នុងខេត្តសៀមរាប ព្រមទាំងការត្រៀមទទួលធ្វើជាម្ចាស់ផ្ទះកីឡាស៊ីហ្គេម និងប៉ារ៉ាហ្គេម របស់កម្ពុជានៅឆ្នាំ២០២៣ ដែលជាឱកាសសម្រាប់ខេត្តសៀមរាប ទទួលបានលំហូរទេសចរ ក៏ដូចជាចំណូលសេដ្ឋកិច្ចឡើងវិញ។
ថ្លែងកោតសរសើរក្នុងកិច្ចប្រជុំនោះ ឯកឧត្តម អ៊ាន ឃុន បានថ្លែងអំណរគុណចំពោះការខិតខំប្រឹងប្រែងរបស់ គណៈអភិបាលខេត្ត លោក លោកស្រី ព្រមទាំងសមត្ថកិច្ចទាំងអស់ ដែលបានយកអស់កម្លាំងកាយ ស្មារតីក្នុងការអនុវត្តតួនាទី ភារកិច្ចបានយ៉ាងល្អប្រសើរ រួមមានការងារសន្តិសុខ សម្រាប់ប្រជាពលរដ្ឋ ថ្នាក់ដឹកនាំកំពូល ថ្នាក់ជាតិ អន្តរជាតិ ភ្ញៀវទេសចរណ៍ និងការបង្រ្កាបលុបបំបាត់នូវល្បែងស៊ីសងគ្រប់ប្រភេទក្នុងមូលដ្ឋាន ការបន្តយកចិត្តទុកដាក់លើព្រឹត្តិការណ៍នៅចំការម្រេចរបស់លោក ខឹម វាសនា និង ការសម្របសម្រួលដល់បងប្អូនស្ម័ត្រចិត្តចាកចេញពីតំបន់រមណីដ្ឋានអង្គរ ទៅទីតាំងថ្មីភូមិធម្មជាតិរុនតាឯក។
អត្ថបទ និងរូបភាព ៖ លោក ម៉ី សុខារិទ្ធ
កែសម្រួល៖ លោក សេង ផល្លី
