រដ្ឋមន្ត្រីទេសចរណ៍ នៃប្រទេសជាសមាជិក នៃយុទ្ធសាស្ត្រកិច្ចសហប្រតិបត្តិការសេដ្ឋកិច្ចក្នុងតំបន់ទន្លេអាយ៉េយ៉ាវ៉ាឌី-ចៅផ្រាយ៉ា-មេគង្គ ហៅកាត់ថាអេកម៉ិក (ACMECS) រួមមានប្រទេសកម្ពុជា ឡាវ មីយ៉ាន់ម៉ា ថៃ និងវៀតណាម បានគាំទ្រយ៉ាងពេញទំហឹង ក្នុងការជំរុញឱ្យមានតភ្ជាប់គោលដៅទេសចរណ៍រួមគ្នារវាងប្រទេសទាំង៥ក្នុងតំបន់ នេះបើតាមខ្លឹមសារនៃកិច្ចប្រជុំ រដ្ឋមន្ត្រីទេសចរណ៍អេកម៉ិកលើកទី៥ ក្រោមអធិបតីភាពឯកឧត្ដម ថោង ខុន រដ្ឋមន្ត្រីក្រសួងទេសចរណ៍កម្ពុជា និងជាប្រធានប្ដូរវេនអេកម៉ិក (ACMECS) នៅខេត្តសៀមរាប ថ្ងៃទី៣ ខែវិច្ឆិកា ឆ្នាំ២០២២។
កិច្ចប្រជុំអន្តរជាតិនេះ មានការចូលរួមពីប្រតិភូក្រសួងទេសចរណ៍កម្ពុជា ប្រតិភូប្រទេសឡាវ ដឹកនាំដោយលោកជំទាវ Suanesavanh Vignaket រដ្ឋមន្ត្រីព័ត៌មាន វប្បធម៌ និងទេសចរណ៍ ប្រតិភូប្រទេសមីយ៉ាន់ម៉ា ដឹកនាំដោយឯកឧត្តម Htay Aung រដ្ឋមន្ត្រីក្រសួងសណ្ឋាគារ ប្រតិភូប្រទេសថៃ ដឹកនាំដោយឯកឧត្តម Phiphat Ratchakitprakarn រដ្ឋមន្ត្រីទេសចរណ៍ និងកីឡា និងប្រតិភូប្រទេសវៀតណាម ដឹកនាំដោយឯកឧត្តម Doan Van Viet អនុរដ្ឋមន្ត្រីវប្បធម៌ កីឡា និងទេសចរណ៍។
បន្ទាប់ពីស្ដាប់នូវការថ្លែងសុន្ទរកថារបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងកិច្ចប្រជុំរដ្ឋមន្ត្រីទេសចរណ៍អេកម៉ិកលើកទី៥នេះ ឯកឧត្តម ថោង ខុន បានថ្លែងថា សម្តេចតេជោ ហ៊ុន សែន មានទស្សនវិស័យស៊ីជម្រៅលើវិស័យទេសចរណ៍ក្នុងតំបន់អេកម៉ិក (ACMECS) ជាមួយនោះ អង្គប្រជុំក៏បានគាំទ្រយ៉ាងពេញទំហឹង ចំពោះអនុសាសន៍ណែនាំទាក់ទងនឹងការលើកកម្ពស់ការធ្វើដំណើរផ្ទៃក្នុងតំបន់អេកម៉ិក (ACMECS-Intra Travelers) ដោយសង្កត់ធ្ងន់លើការតភ្ជាប់ផ្លូវអាកាស ផ្លូវគោក និងផ្លូវទឹកបន្ថែមទៀត រួមទាំងការជំរុញទេសចរណ៍បើកបរដោយខ្លួនឯង និងការបន្តយុទ្ធនាការ «ប្រទេសប្រាំ គោលដៅតែមួយ» ដើម្បីទាក់ទាញភ្ញៀវទេសចរមកពីក្រៅតំបន់ និងភាពចាំបាច់ក្នុងការពង្រឹងយន្តការស្ថាប័នទេសចរណ៍អេកម៉ិក។
ព័ត៌មានជាតិ ថ្មីៗ
ឯកឧត្ដម ថោង ខុន បង្ហាញថា កំណើនភ្ញៀវទេសចរអន្តរជាតិក្នុងប្រទេសជាសមាជិក អេកម៉ិក (ACMECS) បានកើនឡើងដល់ប្រមាណ១០លាននាក់ ក្នុងរយៈពេល៩ខែដំបូងនៃឆ្នាំ២០២២។ ក្នុងនោះចំនួនភ្ញៀវទេសចរផ្ទៃក្នុងមានប្រមាណ៤.៨លាននាក់ ស្មើនឹង៤៩ភាគរយនៃចំនួនភ្ញៀវទេសចរអន្តរជាតិសរុប។
ឯកឧត្ដម ថោង ខុន រួមនិងឯកឧត្ដមរដ្ឋមន្ត្រីទេសចរណ៍ នៃសមាជិកអេកម៉ិកទាំងអស់ បានគាំទ្រដល់ការជំរុញបង្កើតឱ្យមានកញ្ចប់ទស្សនកិច្ចរួមពីផ្នែកឯកជននៅក្នុងតំបន់អេកម៉ិក (ACMECS)និងលើកទឹកចិត្តអាកាសចរណ៍ជាតិ និងអន្តរជាតិពង្រីកប្រតិបត្តិការហោះហើរត្រង់បន្ថែមទៀត រវាងគោលដៅទេសចរណ៍នានាក្នុងប្រទេសជាសមាជិកអេកម៉ិក (ACMECS) ក៏ដូចជាពីគោលដៅចម្ងាយឆ្ងាយ ព្រមទាំងឯកភាពភ្ជាប់នូវគោលដៅទេសចរណ៍នានាតាមផ្លូវសមុទ្រ និងទន្លេផងដែរ។
ជាមួយគ្នានេះ រដ្ឋមន្ត្រីទេសចរណ៍អេកម៉ិកបានលើកទឹកចិត្តឱ្យបន្តការពង្រឹងបន្ថែមទៀត នូវកិច្ចសហប្រតិបត្តិការក្នុងវិស័យសចរណ៍ក្នុងចំណោមប្រទេសសមាជិកអេកម៉ិក (ACMECS) ដើម្បីធានាថាតំបន់នេះ នៅតែមានភាពប្រកួតប្រជែង និងក្លាយជាគោលដៅទេសចរណ៍តែមួយប្រកបដោយសុវត្ថិភាព និងកក់ក្តៅ។
អត្ថបទ និងរូបភាព ៖ លោក បូ សាវី និងលោក ជា ស្រស់
កែសម្រួល៖ លោក សេង ផល្លី
