សួនឧទ្យានសិប្បនិមិត្តឬអាងពិព័រណ៍ត្រីទឹកសាប ទឹកប្រៃ និងមានសត្វជាច្រើនប្រភេទទៀត ដែលមានទំហំប្រមាណជាង ១ម៉ឺនម៉ែត្រត្រីគុណ បានដាក់តាំងបង្ហាញប្រភេទត្រីទឹកសាប ត្រីទឹកប្រៃ ដែលមានស្រាប់ក្នុងប្រទេសកម្ពុជា និងមួយចំនួនទៀតនាំចូលមកពីបរទេស ព្រមទាំងមានសត្វច្រើនប្រភេទ ដូចជា សត្វខ្លាមកពីប្រទេសអាហ្វ្រិចខាងត្បូង ខ្លាឃ្មុំ សត្វភេ អណ្តើកហ្លួង ក្រពើភ្នំ និងសត្វដទៃទៀតជាច្រើនប្រភេទទៀត។ សួននេះ ស្ថិតនៅតាមបណ្ដោយផ្លូវជាតិលេខ៦ ក្នុងភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។
ក្នុងនាមរដ្ឋបាលខេត្ត ក្រុមប្រឹក្សាខេត្ត ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានសម្តែងការអបអរសាទរ និងគាំទ្រចំពោះការវិនិយោគរបស់ដៃគវិនិយោគនានា ចូលមកវិនិយោគ ក្នុងខេត្តសៀមរាប សម្រាប់ជាឱកាសបង្កើនការងារ មុខរបរនិងប្រាក់ចំណូលដល់ប្រជាពលរដ្ឋ និងប្រជាសហគមន៍មូលដ្ឋានខេត្តសៀមរាប។ឯកឧត្តម អភិបាលខេត្ត មានប្រសាសន៍បន្តថា៖ អាងពិពរណ៌ត្រីទឹកសាប ត្រីទឹកប្រៃ និងសត្វជាច្រើនប្រភេទនេះ ជាសួនឧទ្យានសិប្បនិមិត្តដំបូងគេបង្អស់នៅក្នុងព្រះរាជាណាចក្រកម្ពុជា និងក៏ជាចំណុចចាប់ផ្តើមថ្មីមួយរបស់ខេត្តសៀមរាប ដែលពីដើមយើងមានតំបន់ទាក់ទាញភ្ញៀវទេសចរ តែនៅតំបន់ប្រាសាទ ឥឡូវយើងមានមជ្ឈមណ្ឌលកំសាន្តក្រៅពីប្រសាទមួយថ្មីបន្ថែមទៀត ដែលជាគោលដៅទេសចរណ៍ថ្មី លំដាប់អន្តរជាតិ ជាក់ស្តែង Angkor Wildlife and Aquarium ជាកញ្ចប់គោលដៅទេសចរណ៍ថ្មីដ៏អស្ចារ្យ ដែលប្រទេសកម្ពុជាយើងមិនធ្លាប់មានពីមុនមក។ នេះជាប្រសាសន៍បញ្ជាក់ពីការគាំទ្រ និងមោទកភាពជាមួយនឹងផលិតផលទេសចរណ៍ថ្មីនៅខេត្តសៀមរាប របស់ ឯកឧត្តម ក្នុងឱកាសឯកឧត្តម និង លោកជំទាវ បានដឹកនាំកុមារគថ្លង់ និងកុមារកំព្រាមកពីសាលាកុមារពិការ និងគថ្លង់ខេត្តសៀមរាប និងក្រុមការងារយុវជនស្ម័គ្រចិត្តកាកបាទក្រហមជាច្រើនរយនាក់ ទៅទស្សនាកំសាន្តនៅទីនោះ ដើម្បីឲ្យសិស្សានុសិស្ស និងយុវជន បានស្គាល់ ពីប្រភេទត្រីទឹកសាប និងសត្វកម្រជិតផុតពូជ នៅក្នុងប្រទេកម្ពុជាយើង ។លោក Benoit Jancloes អ្នកគ្រប់គ្រងទូទៅ Angkor Wildlife and Aquarium បានមានប្រសាសន៍ថា៖ គម្រោងសាងសង់ឧទ្យានសិប្បនិម្មិតនេះគឺបានចាប់ផ្តើមសាងសង់ កាលពីថ្ងៃទី២៩ ខែមេសា ឆ្នាំ២០១៩ ហើយបានបញ្ចប់ដំណាក់កាលទី១ នៅក្នុងខែតុលា ឆ្នាំ២០២២។ អាងពិព័រណ៍ត្រីនេះ មានទំហំជាង១ម៉ឺនម៉ែត្រគូប ដោយមានដាក់តាំងបង្ហាញប្រភេទត្រីទឹកសាប និងត្រីទឹកប្រៃ ដែលមានស្រាប់ក្នុងប្រទេសកម្ពុជា និងមួយចំនួននាំចូលមកពីបរទេស។
សួនឧទ្យានសិប្បនិមិត្ត Angkor Wildlife and Aquarium ក្នុងដំណាក់កាលទី២ នឹងបន្តសាងសង់ជា បន្តបន្ទាប់លើផ្ទៃដីសរុប ១០០ហិកតា និងមានដាក់បង្ហាញសត្វច្រើនប្រភេទ ដូចជា សត្វខ្លាមកពីប្រទេសអាហ្វ្រិកខាងត្បូង ខ្លាឃ្មុំ ភេ អណ្ដើកហ្លួង និងក្រពើភ្នំជាដើម ។ គម្រោងទាំងនេះ លោកសង្កត់ធ្ងន់លើការអភិរក្ស និងអប់រំ ជាមួយនឹងកន្លែងកម្សាន្តប្លែកៗសម្រាប់ភ្ញៀវទេសចរជាតិនិងអន្តរជាតិ ដែលមកទស្សនាប្រាសាទអង្គរវត្ត ក្នុងខេត្តសៀមរាប ពួកគេនឹងទទួលបានផលិតផលទេសចរណ៍ប្លែកមួយទៀត ដែលមិនធ្លាប់មានពីមុនមក។ បើតាមអ្នកគ្រប់គ្រងទូទៅនៃសួនសិប្បមិនិត្តនេះ ថា៖ សួនឧទ្យាន Angkor Wildlife and Aquarium នឹងចូលរួមចំណែកក្នុងការអភិវឌ្ឍវិស័យទេសចរណ៍ក្នុងខេត្តសៀមរាប ដូចជា បង្កើនរយ:ពេលស្នាក់នៅសម្រាប់ភ្ញៀវទេសចរ ដែលមកលេងខេត្តនេះ បង្ហាញពីភាពអស្ចារ្យ នៃធនធានធម្មជាតិក្នុងបឹងទន្លេសាប ជាសួនកម្សាន្តស្ដង់ដាអន្តរជាតិ ចូលរួមចំណែកក្នុងវិស័យអប់រំ ផ្ដោតលើបរិស្ថាន និងការអភិរក្ស ជាពិសេស អភិរក្សសត្វ ដែលរងការទន្ទ្រាន ប្រភេទសត្វកម្រ ឬប្រភេទសត្វជិតផុតពូជ និងផ្តល់ការងារដោយប្រយោលដល់សហគមន៍ ក្នុងស្រុកសូទ្រនិគម ព្រមទាំងអ្នកមានរបរដឹកភ្ញៀវ និងមគ្គុទ្ទេសក៍ទេសចរណ៍ជាដើម។ ផ្តល់ការងារ និងប្រាក់ចំណូលដល់សហគមន៍ ដូចជា ការដាំបន្លែ ដំណាំអំពៅ ឫស្សី ដូង ចេក។ល។ ក្រៅពីការទស្សនាកម្សាន្តនៅក្នុងឧទ្យាននេះក៏មានសកម្មភាពជាច្រើនទៀត ដូចជា ផ្សារអណ្តែតទឹក ហាងលក់ទំនិញ ភោជនីយដ្ឋានសម្រាប់ទទួលទានអាហារ និងភេសជ្ជ: និងហាងលក់វត្ថុអនុស្សាវរីយ៍ផងដែរ៕
ព័ត៌មានជាតិ ថ្មីៗ
អត្ថបទ និងរូបភាព: លោកយូ វង្ស កែសម្រួលដោយ លីវ សុខុន!!!
