អ្នកបំរើសេវាកម្មទេសចរជាងមួយពាន់នាក់ មកពីតាមបណ្ដាសណ្ឋាគារ ផ្ទះសំណាក់ ក្រុមហ៊ុនទេសចរណ៍ មគ្គុទេសសចរណ៍ បានបញ្ចប់វគ្គបណ្តុះបណ្តាលរបស់ខ្លួន លើការពង្រឹងជំនាញដែលមានស្រាប់ ក្នុងវិស័យទេសចរណ៍ និងបដិសណ្ឋារកិច្ច ខណៈដែលក្រសួងទេសចរណ៍លើកឡើងថា ការពង្រឹងធនធានមនុស្សលើវិស័យទេសចរណ៍នេះ ស្របពេលភ្ញៀវទេសចរណ៍មកកម្សាន្តនៅកម្ពុជាមានសន្ទុះឡើងវិញជាបណ្តើរៗ។
នៅក្នុងពិធីបិទវគ្គបណ្តុះបណ្តាល និងចែកវិញ្ញាបនបត្រដល់សិក្ខាកាម នៃវគ្គបណ្ដុះបណ្ដាលពង្រឹងជំនាញដែលមានស្រាប់នូវជំនាញទេសចរណ៍ និងបដិសណ្ឋារកិច្ចសម្រាប់បុគ្គលិកកំពុងបំពេញការងារ ដែលធ្វើឡើងនៅខេត្តសៀមរាប កាលពីរសៀលថ្ងៃទី២៨ ខែតុលា ឆ្នាំ២០២២នេះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ មានប្រសាសន៍ថា ការស្តារឡើងវិញនៃធនធានមនុស្សក្នុងវិស័យទេសចរណ៍ទាំងសមត្ថភាពជំនាញ និងសតិអារម្មណ៍របស់អ្នកបម្រើការក្នុងវិស័យ ទេសចរណ៍គឺជាកត្តាចាំបាច់ ដែលមូលដ្ឋានអាជីវកម្មទេសចរណ៍ទាំងអស់ត្រូវយកចិត្តទុកដាក់ និងមានផែនការច្បាស់លាស់ នៅក្នុងការរៀបចំធនធានមនុស្សក្នុងមូលដ្ឋានអាជីវកម្មរបស់ខ្លួនឱ្យមានលក្ខណៈសមស្រប ទាំងបរិមាណ និងគុណភាព។
ឯកឧត្ដមបន្ដថា ការពង្រឹងគុណភាពសេវា កម្មទេសចរណ៍ ចាំបាច់ទាមទារឱ្យមានការគិតគូរដល់ការបណ្តុះបណ្តាលជំនាញថ្មី និងការអភិវឌ្ឍសមត្ថភាព អ្នកជំនាញបន្ថែម ដើម្បីមានសមត្ថភាពគ្រប់គ្រាន់ និងវិជ្ជាជីវៈខ្ពស់នៅក្នុងការផ្តល់សេវាកម្មដល់ទេសចរ កាន់តែប្រសើរ និងប្រកបដោយភាពពេញចិត្តដល់ភ្ញៀវដែលធ្វើដំណើរកំសាន្តនៅតាមគោលដៅទេសចរណ៍។ ការអភិវឌ្ឍធនធានមនុស្សក្នុងវិស័យទេសចរណ៍ ជាពិសេសការបណ្តុះបណ្តាលជំនាញទេសចរណ៍ និងបដិសណ្ឋារកិច្ច ត្រូវបានមើលឃើញថានៅមានកម្រិតទាំងបរិមាណ និងគុណភាព ព្រមទាំងប្រឈមនឹង បញ្ហាប្រឈមមួយចំនួន ដែលក្នុងនោះរួមមានការខ្វះខាតសម្បទាដើម្បីទ្រទ្រង់ការបណ្តុះបណ្តាល ជំនាញវិជ្ជាជីវៈទេសចរណ៍ ដូចជា សាលាវិជ្ជាជីវៈទេសចរណ៍ គ្រឹះស្ថានសិក្សាទេសចរណ៍ និងបដិសណ្ឋារកិច្ច ដែលកត្តានេះជំរុញឱ្យមានកង្វះខាតអ្នកជំនាញទេសចរណ៍។
ឯកឧត្ដមបន្ថែមថា ដើម្បីឆ្លើយតបទៅនឹងតម្រូវការធនធាន មនុស្សក្នុងវិស័យទេសចរណ៍ ក្រសួងទេសចរណ៍បាននឹងកំពុងយកចិត្ត ទុកដាក់ខ្ពស់ដល់ការអភិវឌ្ឍធនធានមនុស្សក្នុងវិស័យទេសចរណ៍ និងបានដាក់ចេញនូវចក្ខុវិស័យ “បុគ្គលិក ម្នាក់ ជំនាញមួយ ក្នុងការបំរើឱ្យវិស័យទេសចរណ៍។ឯកឧត្ដមបន្ដថា ក្រោមការដឹកនាំដ៏ត្រឹមត្រូវ និងឈ្លាសវៃប្រកបដោយគតិបណ្ឌិតរបស់សម្ដេចតីតេជោ ហ៊ុន សែន នាយករដ្ឋមន្ត្រី បានធ្វើឱ្យកម្ពុជាបច្ចុប្បន្នមានសុខសន្តិភាព ស្ថិរភាពនយោបាយ និងសន្តិសុខពេញលេញ ដែលជាស្នូលសម្រាប់ការអភិវឌ្ឍវិស័យទេសចរណ៍។ វិស័យទេសចរណ៍កម្ពុជា ត្រូវបានចាត់ទុកជាវិស័យអាទិភាពមួយដើរតួជា“មាសបៃតង” រួមចំណែកដល់ការអភិវឌ្ឍសេដ្ឋកិច្ច-សង្គម និងការការពារបរិស្ថាន ពោលគឺចូលរួមដល់ការកសាងសេដ្ឋកិច្ចបៃតងនៅកម្ពុជា ដែលជាផ្នែកមួយគាំទ្រដល់ការសម្រេចបាននូវគោលដៅអភិវឌ្ឍន៍ប្រកបដោយចីរភាព (SDGs) ឆ្នាំ២០៣០ របស់អង្គការសហប្រជាជាតិ (UN)។
លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា មានប្រសាសន៍ថា ការពង្រឹងជំនាញដែលមានស្រាប់ និងរំលឹកឡើងវិញ សម្រាប់បុគ្គលិកដែលកំពុងបំរើការងារ ឬត្រូវបានបាត់បង់ការងារ ក្នុងវិស័យទេសចរណ៍ និងបដិសណ្ឋារកិច្ច ក្នុងសកម្មភាពស្តារវិស័យទេសចរណ៍ក្រោយវិបត្តិកូវីដ-១៩។កម្មវិធីបណ្តុះបណ្តាលនេះ ត្រូវបានរៀបចំឡើងក្រោមកិច្ចសហការរវាងក្រសួងទេសចរណ៍(MOT)ជាមួយសមាគមទេសចរណ៍កម្ពុជា(CATA)និងគាំទ្រផ្នែកបច្ចេកទេសដោយទីភ្នាក់ងារប្រឹក្សាយោលបល់ជំនាញវិជ្ឋាជីវៈទេសចរណ៍អេធីភីនិងស៊ីអេចធី ដែលជាជំនួយថវិកាពីក្រសួងសេដ្ឋកិច្ចនិងហិរញ្ញវត្ថុតាមរយៈមូលនិធិអភិវឌ្ឍន៍ជំនាញ។សិក្ខាកាមដែលបានការបណ្តុះបណ្តាលមាន១០ផ្នែក៖ ផ្នែកទីភ្នាក់ងារទេសចរណ៍និងការីទេសចរណ៍ ផ្នែកមគ្គុទ្ទេសក៍ទេសចរណ៍ ផ្នែកការិយាល័យជួរមុខ គេហកិច្ច ម្ហូបអាហារ និងភេជ្ជៈ ផ្នែកផ្ទះបាយ ផ្នែកធនធានមនុស្ស ផ្នែកលក់ និងទីផ្សារឌីជីថល ផ្នែកស្ប៉ានិងម៉ាស្សា ផ្នែកវិស្វកម្ម។កម្មវិធីសិក្សានិងមេរៀនបណ្តុះបណ្តាលត្រូវបានរៀបចំឡើងដោយផ្អែកលើសមត្ថភាពនៃជំនាញនីមួយៗ សម្រាប់បុគ្គលិកបម្រើការផ្នែកសណ្ឋាគារ និងភោជនីយដ្ឋាន ផ្នែកទីភ្នាក់ងារនិងការីទេសចរណ៍និងផ្នែកមគ្គុទ្ទេសក៍ទេសចរណ៍។វគ្គបណ្តុះបណ្តាលខ្លីនេះ បានធ្វើឡើងចាប់ពីថ្ងៃខែសីហា ដល់ខែតុលាឆ្នាំ២០២២នេះ៕
អត្ថបទ និងរូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
